3 A pe plɛ naa yuu mbo, “Ŋga klo na to kre, o na o trɛ, na o seele, na o kalonyi tle leele pan mna shɔlɔ shɔ.” 4 A pe plɛ naa wa na yuu mbo, “O swɛ jin mu sɛ o trɛ, na o seele yire tɔɔ tɔ ŋunu katoo. 5 Ande Judah leele lɛ o kro, a o kro yiri waŋgra nunu nu. Imi na o biile nyi kre chɔɔ, pan pe biile nyi na, kena ŋgi ki tia pe wre bibilɛ wru mu pe na tinlɛ lɛ ŋga hin? Fuŋgaami ŋga pe o bichiɛlɛ pre plɛ wru tinlɛ. A jaŋga ka n wa o pan, ŋgi ndra na hin? O trɛ, na o seele kro sɛ kaari pe wee.”

6 Ŋga ndaa kee nyjɛ na praa taanri yire loo kre, ni krɔ na kun kpɔɔ. 7 A ndaa kee kre jawa mna pe yɛkulo pre, na pe loplombo pre yeeri, mna pe wie na, “Mni a yire titi leele pre swa jin e pan, a e na nyumu leni pe pan hin?” A ndaa kɛ wa mna leele pre kro yeeri, mbe kee kre le mbe yo. 8 Ŋga pra pan mu fni kre, a ndaa yo pe pan na, “O gbeŋmba mu o wolo Judah leele mblɛ pra peyɛ prɛ mu waŋgrɛ leele pre ŋga pre ndra lɔ. Fuŋgaami yire titi e kna mu na e wolo pre fiŋge jaŋga na, pra peyɛ prɛ e pan.” Ŋga ndaa yo ma kre, loplombo pre wa nsra ja mu kee ka ta mu yo. 9 A ndaa yo pe pan na, “Kee ŋga e pini kre n nyu. Ki fna mbe e Nyiɛkpɔɔ fiɛ, mbe li u nyu kee na, mbe ki ti o loŋgoolo mblɛ pe n Nyiɛkpɔɔ chin pre wa o ta mbra o pini mbra tɛɛ. 10 Mi na ni wolo pre, na ni leele pre, o wolo Judah leele pre plɛ jin swa, na shɔlɔ, la, oo le na waa nyumu le pe pan. 11 E e wolo pre trɛ, na pe tre seele, na pe olive seele, na pe kalonyi yire, na nyumu nyjɛ e le pe pan mbe pe tɔ yire kro ndro e pe ŋga fuŋgaami.”

12 A pe yɛkulo pre na kna mbo, “Kee ŋga mu yo o pan kre, oo li ki na. Oo yirɛ yire ndro mbe pe ŋga, a waa fɔɔlɛɛ nyjɛ pe li yire wie na.”

A ndaa srawɔfɛɛnlɛ pre yeeri mna tia pe yɛkulo pre, na loplombo pre na da na pie li pe nyu ŋga pe yo kre na. 13 A ndaa ni dodonyi bɔtɔe nyaara mna pe nyina, mna yo pe pan na, “Ndro ŋmba u nsra li u nyu kee na kpan, Nyiɛkpɔɔ we ufun yirɛ kro shɔ u kɛɛ, na u katoo ni kro.”

A leele pre na kna mbo, “Ami.” A pe kro na o Tafun Nyiɛkpɔɔ wre ŋga mɛɛ. A loplombo pre na li pe nyu kee na.

14 Ŋga pra Ŋunu Artaxerxes tɛɛ jɔɔn na kre, ki yɛlɛ fulo na pra ni wɔ abani lopom Judah tra nu. Mu yire kre nyjila ŋga pra ni wɔ abani lopom mna sɛ su na ŋunu na li jɔɔn kre na yɛlɛ fulo na kɛmbɔshiin kre, na mi na ni wolo pre da yɛlɛ kɛmbɔshiin, na o na sro nyjɛ praa woni na abani lopom kaan yire ka le nyuu. 15 La, abani loplombo mblɛ pra yiɛklu ni na pre na tia leele pre naa kala nyaa kpɔɔ. Pra tia praa swafinyi kradnɛ nununu woni, mbe sro, na simi gbɔwo wɔ mbe ya mbe pe ŋga. Hali pe sumifɛɛnlɛ kuraa naa Judah leele pre fiŋge. La, Nyiɛkpɔɔ fiɛrɛ naa wa mi nu, ki tia mi nsraa leele pre pini ma. 16 Jerusalem mboo kre siɛn chiin na ni jawala kro na nyi. Ni leele pre kro na fni wa na tnumu kre tuni, a o nsra tra lɔ ndro pan.

17 Judah leele pre, na pe loplombo mblɛ praa lii ni lihaa nyjila kro nu pre naa lafaa na fuloe shiin na kɛ, pre kɔkro ni, leele plɛ na yiri waŋgrɛ nyjɛ yira o fɛ mu kun yire na mna pan ni pan, pe kro naa paan na lii ni yiɛ. 18 Blenyini ŋga ndaa nablɛm nunu, na mbaala chichiele kɔɔnanu, na ŋulo tataara kuu mbe pe tɛɛ mbe sro pe ni pan, a ble kɛ nyu na kpan, simi gbɔ wee nyininyini we bɔ o na. A nde ni nsra tia leele pre naa sro nyjɛ pe fna mbe wɔ mbe mi abani lopom ŋga yire woni, ŋgi ndra na hin? Ndaa nya imi na leele pre naa kala nyaa mu da.

19 Ndaa Nyiɛkpɔɔ tali na u ni sɔɔnri mbe nyu ni na kee nyjɛ ni pe mu leele pre ŋga kre ndra na.