Ndaa chin na pra jawala sisaa le ni na. 3 A ndaa leele tun na pe sɛ yo pe pan na, “Ni tnumu ŋga ni tuni kre kpɔɔ mu tro, ki tia mba ja mbe tnumu kre ti, mbra paan wa.” 4 Gbee nununu jijirɛ na pee wa na leele tuni ni pan kee nunu kre ni chɔɔ, a kee nunu kre ndaa yuu pe pan.

5 Gbee kunɔ wo kre na, Sanballat wre titi na u sumifun tun ni pan na mandiɛ nunu kre ni, ŋga wraa paan kre na hlɛ ŋga nyu pe n yii yira ni wa u kɛɛ, 6 hlɛ kre kee na nyina mbo, “O ndru waŋgrɛ nyjɛ yi o fɛ mu kun yire leele pan na ŋu na Judah leele pre plɛ pan na Jerusalem mboo kre gbeele na siin, na chaa mbe muyɛ pe ŋunu, mbe yiri mbe o taan. A Geshem yo o pan na ki pe kpra. 7 Hali mu keenyanyofɛɛnlɛ wɔ Jerusalem na, pra kee kre kpali na tro na, ‘Ŋunuu wa Judah na.’ Ŋu titi chin na Persia ŋunu we kre kee ŋga loo, kena ti mbe o fni mbe paara ki kee na.”

8 A ndaa tia pra sɛ yo Sanballat pan na, “Yire kee nyjɛ mu yuu nyjɛ krɛrɛ ka n pe kpra, ŋu titi mu yire kee nyjɛ woni mu ndra na yuu.” 9 O loŋgoolo pre naa chaa mbe fiɛrɛ le o nu, mbe ki ti o kɛ gblɛ, kena waa jaa tnumu kre tun mbe kɔ. La, ndaa Nyiɛkpɔɔ tali na u ni ŋga faŋga.

10 Ki ble ka ndaa sɛ Delaiah biblɔ Shemaiah Mehetabel nana wre shaari haa, a na ki n fna mbe u yili fimi na, la, ŋga ndaa da wa kre, a wra yo ni pan mbo, “Ti mbe o sɛ fni Nyiɛkpɔɔ Suminyuŋgo wa mbe krɔɛ yire kan oyɛ na, ŋgi na hin? Mu loŋgoolo pre jawala le na pie paan mu gbo blee.” 11 A ndaa kna mu yo u pan na, “Yira ŋgi kie ti mbe mi sembremu fɛ mbe sɛ ndra Suminyuŋgo ni ŋmaa ndra na hin? Mba sɛ.” 12 Titɛɛ kre nu to, ndaa chin na Nyiɛkpɔɔ ma u kre kee ŋga yo Shemaiah pan. La, Tobiah na Sanballat pe u dɔli mbe u ni fana, 13 mbe fiɛrɛ le ni nu mbe ni sɛ sisaa pe, ŋgi na hin? Pe chaa mbe mɛɛ chichie ŋga ni ta kre kla. 14 Ki tia ndaa Nyiɛkpɔɔ tali na u Tobiah na Sanballat ndie tini kee ŋga pe pe kre ndra na. A ndaa yo Nyiɛkpɔɔ pan na u chlɔ keenyanyofun Noadiah wre, na keenyanyofɛɛnlɛ hamblɛ mblɛ pe ya u na, na chaa mbe ni le fiɛrɛ pre ndie tini.

15 Nyiɛpɔ ŋga praa yeeri Elul kre ble fulo na kunɔ na o na mboo kre kro sin mu kɔ. Ble fuloe shiin na kɛmbɔshiin ni o na tɛɛ mu tnumu kre kro kɔ. 16 Ŋga o loŋgoolo pre na ki loo kre, kra tia fiɛrɛ na waŋgrɛ nyjɛ yira o fɛ mu kun yire kro yii, a pe nsra chin kee ŋga pie pe, ŋgi na hin? Pra chin na o Nyiɛkpɔɔ wre u ya o na, a o ja mu mboo kre sin.

17 Kre nyjila kre nu krɛrɛ na Judah loplombo pre na Tobiah wa mu na hlɛ nyunɔi peyɛ pan na shie na paan. 18 Leele tataara naa wa Judah na, a pre na Tobiah nyu naa nunu kee shiin yɛ ndra na, nunu yi na, Shecaniah Arah biblɔ wre, Tobiah nafun blɔ na wi, a kee shiinwo na yi na, Tobiah biblɔ Jehohanan wre na Berekiah biblɔ Meshullam bichlɔ wru mu leŋge. 19 Leele pre naa paan na kee chichiele nyjɛ Tobiah pini kee boo ni pan nyjila kro nu, a pan praa shie na kee nyjɛ ni yuu boo u pan na. A Tobiah na kro na hlɛ troi ni pan mbe ni le fiɛrɛ.