5
Ŋga Ŋunu Solomon na Suminyuŋgo kre tnumu kɔ kre, wra ki yirɛ nyjɛ u lɛ David na pe cheche mu o Tafun Nyiɛkpɔɔ ŋga yire kro koli mna pan mu yi tɛɛ Suminyuŋgo kre keshian yirɛ tɛɛ haa wa, yire na pe swafiŋge, na swanyiɛ, na ki yirɛ hɛnyi yire kro.Pra Pan Nyu Nunu Daka//Kre Ni Suminyuŋgo Wa
2 A Solomon na kɛ wa mna Israel loplombo pre kro yeeri, pre na jlom loplombo pre, na pe sele yire yɛkulo, mbe pe sɛ o Tafun Nyiɛkpɔɔ nyu nunu Daka kre wru Ŋunu David kakpɔɔ, Zion nyua kre na, mbe pan na ki ni Suminyuŋgo wa. 3 Pre leele pre kro na pan mu fni Ŋunu Solomon lawee nyjila ŋga ni praa Asɛkɛ ble kpɔɛ yire lii nyiɛpɔ kɔɔnashin wo nu kre. 4 Ŋga Israel loplombo pre kro na fni kre, a Levi leele pre na sɛ Nyu Nunu Daka kre wru, 5 kre na yoŋgo nyuŋgo ŋga nu leele pre na Nyiɛkpɔɔ naa fni kre, na ki yirɛ bɛɛlɛ yire krɛrɛ ni. Levi srawɔfɛɛnlɛ mblɛ praa wa pe nu pre pra ki tio. 6 A Ŋunu Solomon, na Israel leele mblɛ pra fni wa pre kro na yiɛ klu ki pan. Pra mbaala na nui tataara tɛɛ mna sra wɔ, hali pe nsra ja mbe pe tɔɔnri kple.
7 A srawɔfɛɛnlɛ pre na pan na o Tafun Nyu Nunu Daka kre ni ki lawee, Cheche Ndoo titi kre nu, mna ki tɛɛ Cherubim shiin pre kuɛn tapan. 8 A Cherubim pre na pe kuɛn nyaa mna Nyu-Nunu-Daka kre, na ki kɛɛn nyjɛ ni praa ki tru yire tɔ. 9 Ki tio kɛɛn yire na tnu tnu, a kra tia na mu yire Cheche Ndoo titi kre yɛsimi, yi nyu naa nyaa, la ma jaa yire lawee ka nu mbe yi nya. Hali yii wa wa, mu pan mu su aŋga na.
10 Yaka n wa Daka kre lam, fɔna dnɛ kpɛfrɛɛ kpɛfrɛɛ shiin nyjɛ Moses na le ki nu Sinai nyua na kre, nyjila ŋga Nyiɛkpɔɔ na Israel leele pre na nyu nunu pe, a wra pe wɔ mu yili Egypt tra nu kre.a
11 Srawɔfɛɛnlɛ mblɛ pra le Cheche Ndoo wa kre kro na yili. Srawɔfɛɛnlɛ fekofeko mblɛ praa wa wa kre kro na klu mna paala pe mu nɛɛrɛ laa peyɛ na. 12 Levi leele mblɛ na lɛ mɛkɔmblɔ pre kro na sɛ fni. Pre na lɛ Asaph, na Heman, na Jeduthun, na pe bibilɛ, na pe katoo leele pre kro na sɛ yire na shie sragbunu kre yilafinhaa wa, mna pe dodonyi finyi le le, mna na pe juru, na yambrawa, na saŋgo gbuun. Srawɔfɛɛnlɛ bnɔ fɔfɛɛnlɛ lafaa na fulo naa wa mu ya pe na. 13 A mɛkɔmblɔ pre, na bnɔ fɔfɛɛnlɛ pre kro na chaa na mɛɛ koni na o Tafun Nyiɛkpɔɔ wre kaan mɛɛ. Pra bnɔɛ na pe mɛɛ kɔyirɛ yire kro tɛɛ mna mɛɛ kɔ kpɔɔ na o Tafun Nyiɛkpɔɔ wre kaan mboo na yuu mbo,
“U nyu o na,
a u koroo wa nyjila kro nu.”