Solomon na Paala Pe Mna Suminyuŋgo//Kre Le Nyiɛkpɔɔ Kɛɛ
7
Ŋga Ŋunu Solomon nyiɛtalaa kre nyu na to kre, a kanhun na yiri nyjeeri mna pan mu sra yirɛ yire kro shɔ, a o Tafun Nyiɛkpɔɔ wre yiɛnyiŋge na pan mu Suminyuŋgo kre nyi poŋgo. 2 Srawɔfɛɛnlɛ pre n nsra ja mbe le Suminyuŋgo kre nu, ŋgi na hin? O Tafun Nyiɛkpɔɔ wre yɛnyiŋge na pan mu Suminyuŋgo kre nyi poŋgo.3 Ŋga Israel leele pre kro na kanhun kre nya kra tri tra, a pra o Tafun Nyiɛkpɔɔ wre yɛnyiŋge nya Suminyuŋgo kre ndra na kre, a pra kosie kan lawee ŋga pra wlɔ kre nu, mna yiɛ juule tra, mnaa o Tafun Nyiɛkpɔɔ sumi, na u kaan mboo na yuu mbo,
“Nyiɛkpɔɔ nyu,
a u koroo wa nyjila kro nu.”a
4 A Ŋunu Solomon na leele pre kro na sra wɔ mna o Tafun Nyiɛkpɔɔ wre ŋga. 5 Ŋunu Solomon na nui kagbenyi fulo na shiin, na mbaala na sikaala kagbenyi lafaa na fulo tɛɛ, mna sra wɔ mna Suminyuŋgo kre wru mu le Nyiɛkpɔɔ kɛɛ. 6 Srawɔfɛɛnlɛ pre kro na yire yire pe yirehaa, a Levi leele pre na yire pe yire haa mnaa mɛɛ kɔyirɛ nyjɛ Ŋunu David na pe yire foo, na mɛɛ koni na o Tafun wre kaan mboo na yuu mbo,
“U koroo wa nyjila kro nu.”
Srawɔfɛɛnlɛ pre na Levi leele pre na yiɛ kan peyɛ na, na pe bnɔɛ yire foo, a Israel leele pre na yiri mu yire sholo na pe le.
7 Ki ble kre Solomon na paala pe, mna lawee vankam ŋga kraa wa Suminyuŋgo kre yɛsimi wa kre wru mu le Nyiɛkpɔɔ kɛɛ, mna yurɛ sro sra wɔ wa, mna wejinyiŋge sra yurɛ pre nyina sro wa. Ŋgi na hin? Swafre sragbunu ŋga wra sin wa kre naa fiɛn, a sra wɔ yurɔ pre kro wa le ki na.
8 Ŋunu Solomon na Israel leele pre na kre Asɛkɛ ble kpɔɛ yire li ble kɔɔnashin. Leele tataara na yiri haa lee Egypt sam ŋga kraa wa na shie tapan haa wa, na Lebo-Hamath ŋga kraa wa na shie nyjeeri haa wa kre na mu pan wa. 9 Ki ble kɔɔnatarɛ wo na kre, a pe kro kro na fni titɛɛ mna ki nyu le. Pra sragbunu kre ble li kranu mna Asɛkɛ ble yire li kranu a yi kro na pe ble kɛmbɔjijirɛ. 10 Ŋga nyiŋge na se kre, na kre yi nyiɛpɔ kɔɔnashin wo kre ble fulo na taarɛ wo, a Ŋunu Solomon na leele pre wa kolo a pra sɛ pe kalonyi nu. Pe yiɛ na shɔ pe lolonyi nu kpɔɔ, kee nyjɛ o Tafun Nyiɛkpɔɔ na pe mna Ŋunu David, na Solomon, na Israel leele kro ŋga kre ndra na.
O Tafun Nyiɛkpɔɔ Na Uyɛ Wɔ//Mna Solomon Nyina
11 Ŋga Solomon na o Tafun Nyiɛkpɔɔ wre Suminyuŋgo kre, na ŋunu katoo kre sin mu kɔ, mna nyjɛ u chaa mbe pe kro pe yi nu mu kɔ kre, 12 o Tafun Nyiɛkpɔɔ na uyɛ wɔ mna u nyina blee mna yo u pan mbo, “Ni mu nyiɛtalaa kro loo, a ni kre lawee ŋga wru mu pe ni wo, mbe e na sra woni wa mbra ni kaan. 13 Na ki pan na ni nyjeeri tɔ mbe nyiɛ wa pan, ndee na ni yo na kpatɔ u pan mbe tra kre sro ka, ndee mu tia kumu yira le leele pre nu, 14 a ni leele mblɛ na ni mɛɛ taa kre waa peyɛ nyjii mu laa pe sisam kro, mu ndru mu pan mu ni tali kre, mbe yire ni nyjeeri wa mbe loo pe pan, mbe pe sisam ti mbe pe kɛ, mbe pe tra kre tra.
15 Fuŋga rɛ mbe nyiɛlɛ nyaa mbe ndie tɛɛ nyiɛtalaa ŋga ee tali mna kro na. 16 Ŋgi ndra na hin? Ni ki wru mu pe ni wo, mbe ni Mɛɛ tni wa nyjila kro nu, a mba yiɛ wɔ ki na fio. 17 Na ŋu Solomon we li ni kee na kpra ni na mu lɛ David wi, mbe taa ni mbra yire kro na kre, 18 mbe li ni nyu ŋga ndaa yo mu lɛ David pan kre na, na nyjila kro nu mbe ti mbe ndro yili mu sele nu mbe Israel ŋunumu li.
19 La na ŋu na mu leele pre waa ndikana pe, mu laa ni mbra yire kro, ndee maa sɛ na waŋgrɛ sɛɛnlɛ sumi kre, 20 kena mbe Israel leele kɔ ni tra ŋga ni pe ŋga kre nu, a mbe Suminyuŋgo ŋga na ni Mɛɛ taa kre je. Na ki pan ma, waŋgrɛ leele kro we ki le fiɛn, mbra ki kee yuu mbra tɛɛ. 21 Kii wa na kre Suminyuŋgo ŋga nyu yiɛ na, la, na yire kee nyjɛ ni yo ŋga waa pe, ndro ŋmba we tro ki lawee kpan, kie u fo, mbe wra wie na, ‘Mni a pe Tafun Nyiɛkpɔɔ wre kre kee ŋga nyini pe u tra, na u Suminyuŋgo ŋga na ma hin?’ 22 Mbe plɛ na pe nyu woni mbra yuu mbo, ‘Ŋga pe pe Tafun, pe tolɛɛlɛ Nyiɛkpɔɔ ŋmba wra pe wɔ Egypt tra nu wre je, mu sɛ sɛɛnlɛ yii kɛshiin, na yi sumi kre, kre ki tia Nyiɛkpɔɔ wre tia yire kee nyjɛ nyini pe da kre.’”