3 Ŋunu Solomon na sɛ wi na chia ŋga pe yeeri Hamath-Zobah kre leele ni, mna ki shɔ. 4 Wra tia u leele pre na sɛ chia ŋga pe yeeri Tadmor kre sin tablɔ tra kre nu, mna tia pra chiɛ yɛ gbeele mu sin Hamath na, a wraa u yirɛ teeri wa. 5 Wra tia pra Beth-Horon ŋga kraa wa nyjeeri haa, na Beth-Horon Tapan haa wo kre gbeele mu sin, pra mboo sin mna yi fɛ mu kun, mna krɔɛ le yi na, mna tɔɔnrɔ paari yi kro. 6 Wra tia pra Baalath na ki kakpɔɛ yire kro gbeele mu sin na, a wraa yirɛ teeri wa. Yire na kakpɔɛ nyjɛ na wraa u sookɛɛ, na u soolo teeri yire ni kro. Lawee nyjɛ Ŋunu Solomon naa chaa mbe sin Jerusalem na, na Lebanon tra nu, na lawee nyjɛ nu u ŋunumu lie na da kro kre, wra yi sin. 7-9 Ŋunu Solomon n nsra tia Israel leele pre naa tnumu tuni jaŋga na, pre na lɛ u ŋunɔ wifɛɛnlɛ, na u loplombo, na ŋunɔ wifɛɛnlɛ loplombo, na mblɛ praa soolo teeri na wii u pan. La wra Hittite leele, na Amora leele, na Perizzite leele, na Hivite leele, na Jebusite leele pre nanae mblɛ pra kro Canaan tra kre nu, a Israel leele nsra pe gbo pre yii tinlɛ, a praa tnumu tuni u pan jaŋga na, hali mu pan mu su aŋga na. 10 Ŋunu Solomon na Israel leele lafɛɛ shiin na yɔɔ wɔ loplombo, a praa tnumu tunfɛɛnlɛ pre le.

11 A Ŋunu Solomon na tia pra sɛ u chɔ ŋmba na wi Egypt ŋunu Pharaoh bichlɔ wre wɔ Jerusalem kokoo ŋga praa yeeri David kapɔɔ kre na, mna pan na u ni u ŋunu katoo fɔŋgɔ ŋga wra sin kre nu. Kee ŋga Solomon na yo yi mbo, “Ni chɔ wre n fna mbe tni ni lɛ David ŋunu katoo kre nu, ŋgi na hin? Pra da mna Nyiɛkpɔɔ Nyu Nunu Daka kre tɛɛ wa, a mna kie tni kpan bawa kre pe cheche.”

12 A Solomon na yirɛ sroo sra wɔ mna o Tafun wre ŋga sragbunu ŋga wra tia pra sin Suminyuŋgo kre yɛsimi wa kre na. 13 Ble kpɔɛ sra nyjɛ Moses na le na pra yi lii yire na yi, Wuuble lie, na nyiɛpɔ fɔŋgɔ ble lie. A yɛlɛ nyu ble kpɔɛ taarɛ nyjɛ praa lii yire na yi, ble nyjɛ nu pe nsraa yiisi paanu kaa yire, na sro kun nyjila ble ^a lie, na asɛkɛ ble lie.

14 A Ŋunu Solomon na srawɔfɛɛnlɛ pre, na Levi leele pre nyina pe tnumu Suminyuŋgo wa, imi na u lɛ David na u nyina kre. Levi leele pre plɛ praa mɛɛ koni, na yaa srawɔfɛɛnlɛ pre na a praa pe tnumu tuni, a pe plɛ naa yire na Suminyuŋgo kre jlonwee yire sri. 15 A pre praa nyinyi nyjɛ nu praa yirɛ teeri yire le. Srawɔfɛɛnlɛ pre na Levi leele pre nsra da mu punu tnumu nyjɛ ŋunu na pe nyina yire ka na fio.

16 Ŋunu Solomon tnumu nyjɛ wraa chaa mbe tun yire kro wra yi tun mu yire o Tafun Nyiɛkpɔɔ wre Suminyuŋgo kre nɔɔ le haa, mna sɛ su ki kɔɔrɔ na.

17 A Ŋunu Solomon na sɛ Edom chiɛ nyjɛ pe yeeri Ezion-Geber, na Elath nyjɛ yiraa wa epo nyiɛ kre nyu na yire na. 18 A ŋunu ŋmba praa yeeri Hiram wre na tia u loplombo na pan mu u ŋga epo krɔɛ kpɔɛ yire yɛ, a wra tia u krɔɛ ŋmaafɛɛnlɛ, na Ŋunu Solomon wolo pre na krɔɛ yire wru mna sɛ Ophir tra nu, mna sɛ swanyiɛ tio mu pan mu Ŋunu Solomon ŋga, ki snam na da tons kɛmbɔkɔɔnashin.