Sheba Ŋuchlɔ Na Sɛ//Ŋunu Solomon Shaari
9
Waŋgra ŋga praa yeeri Sheba kre ŋuchlɔ na Ŋunu Solomon mɛɛ ŋga u ta kpɔɔ kre loo, mna u mɛɛ yeeri mu pan Jerusalem na, mbe paan u pe mbe le, mbe u wie kaalɛɛ nyjɛ yi sheli. Ŋga wraa paan kre, wra pan na u loplombo ni tataara, a wra tuwe ndiom tɛɛn, na swanyiɛ, na dnɛ chichiele tataara pɔ mu taa pe nyuuma na, mbe paan Ŋunu Solomon kɛ. Ŋga wra le kre, wre na Ŋunu Solomon na kee nyjɛ yiraa wa u jawala nu kro paara. 2 Kee nyjɛ wra u wie yire krɛrɛ, Solomon na yi nyu wɔ, ka nsra n wa mna sheli mu u ŋga. 3 Ŋga Sheba ŋuchlɔ wre na nya imi na Ŋunu Solomon kachindɛ kpɔɔ mu da, a wra kna mna ŋunu katoo ŋga u sin kre le, 4 mna sro nyjɛ u lihaa nya, mna u loplombo tnimu nya, mna u sumifɛɛnlɛ na pe dodonyi nyjɛ pe le le nya, mna u simi lefɛɛnlɛ nya na pe dodonyi ni, mna yurɛ sroo sra nyjɛ u wɔ mu o Tafun Nyiɛkpɔɔ wre ŋga Suminyuŋgo wa nya kre, wre na kru u na.5 A wra yo Ŋunu Solomon pan mbo, “Kee nyjɛ pe yo ni pan ni waŋgra nu mu wru kee nyjɛ mu pe haa, na mu kachindɛ ŋga kii wa mu pan yire kro pe kpra.” 6 La, ni n nsra kee nyjɛ pe yo ni pan yire shɔnli, na ŋga mi titi pan mu yi nya nyini ni ŋga bɔkɔ. Kpra na, pe nsra ja mu mu kachindɛ kre yɔɔ kee yo ni pan. Mu kee pe mu wɛ nyjɛ ni loo yire kuraa na. 7 Ni chin na mu loplombo, na leele mblɛ pe yiree mu yiɛ nyjila kro nu ŋga, na pe mu kachindɛ kee yire ndru pe yiɛ shio. 8 Mu Tafun Nyiɛkpɔɔ wre wo yi mɛɛ, na u yiɛ shɔ mu na, a u mu wɔ mu tɛɛ Israel leele ŋunu. Nyiɛkpɔɔ Israel waŋgra ŋga leele kori, a wa laa pe kro fio, ki tia u pe ŋga ŋunu ŋmba u fraka, mbe jɔɔn kre li kpra ni. 9 A Sheba ŋuchlɔ wre na Ŋunu Solomon ŋga swanyiɛ tons jijirɛ, na tuwe ndiom tɛɛn, na dnɛ chichiele tataara. Ndro nsra da mu Ŋunu Solomon ŋga tuwe ndiom tɛɛn, a yira nɛɛ mna da nyjɛ Sheba ŋuchlɔ wre na u ŋga yire ni.
10-12 Ŋga Sheba ŋuchlɔ wre na ndru mbe sɛ kre, a Ŋunu Solomon na u ŋga yirɛ nyjɛ wraa chaa u pan kro, hali yira nɛɛ mu wɛ nyjɛ wre na pan mu Solomon ŋga yire na. A wre na u loplombo pre na ndru mna sɛ pe chia.
Ŋunu Solomon Yɛtaara Yirɛ
Ŋunu Hiram na Solomon krɔɛ ŋmaafɛɛnlɛ pre na yiri na swanyiɛ, na juniper kɛɛn, na dnɛ chichiele ni tataara Ophir waŋgra nu, mna pan mu Solomon ŋga. A wra kɛɛn yire tɛɛ mna yirɛ nyjɛ na mu taan mbe le pe Suminyuŋgo, na u ŋunu katoo wa, mna yi yɛ tɛɛ mu juru gbun wee pe, yire na mɛɛ gbun yirɛ nyininyini ni, mna u mɛɛ kɔfɛɛnlɛ pre ŋga. Ndro n da mu yire yirɛ nyjɛ yɛ pe Judah tra nu ma tun.
13 Yɛlɛ nyini ŋga, swanyiɛ ŋga praa paan na Ŋunu Solomon kaan na da tons fulo na kunɔ. 14 La, nyjɛ ni swafɛɛnlɛ, na jafalifɛɛnlɛ pre naa paan yire n na chaa. Pre kɔkro, Arabia ŋulo, na Israel tra kre ŋulo naa paan na u kaan swanyiɛ, na swafiŋge. 15 Ŋunu Solomon na tia pra swanyiɛ gbun mna tɛɛ mu ŋunɔ wiyirɛ nyjɛ ni lewo uyɛ toni badɛnyi lafɛɛ shiin pe. Nunu snam na da kra dnɛ kɔɔnashin na yɔɔ. 16 Wra tia pra yi bɛɛlɛ pe lafɛɛ taarɛ. Swanyiɛ ŋga pra gbun mu tɛɛ mu yi pe kre snam na chaa da kra dnɛ jijirɛ. A wra yi tɛɛ u katoo wa lawee ŋga wra gbeele mna ki mɛɛ tɛɛ Lebanon klɔ kre nu.
17 Ŋunu Solomon na ŋujɔɔn badaaŋga ka pe na hlo ŋgaala ni, mna swanyiɛ nya mu ki tɔ. 18 Jɔɔn kre naa wa na yirɛ nyjɛ na mu taan mbe nduu ni kɔɔnanu, na ki jeele taa jɔɔn ŋga pra swanyiɛ tɛɛ mna pe mna mbra ki na ni. Kɛnyi taa hɛɛ naa wa jɔɔn kre kokoe shiin yire na, a pra jirae gbeele mu yire ki kamɛŋɛ na kalie. 19 Jɔɔn kre taan nduu yirɛ kɔɔnanu yire, pra jirae kɛmbɔshiin gbeele mna yire yire yi jeŋgle shiin shiin yire na. Pe n da mu ŋujɔɔn pe ma waŋgra ŋga nu tun.
20 Lagbuju nyjɛ ni Ŋunu Solomon naa gboo yire kro swanyiɛ ni pra yi pe, a yirɛ nyjɛ yiraa wa ŋunu katoo lawee ŋga praa yeeri Lebanon Klɔ yire kro, swanyiɛ ni pra tɛɛ mna yi pe. Pe nsra swafiŋge tɛɛ mna yaka pe wa, ŋgi na hin? Ŋunu Solomon nyjila kre swafiŋge nsra sna ndro pan. 21 Solomon naa wa na epo krɔɛ kpɔɛ jafa li wee ni tataara. Yɛlɛ taarɛ kpan, pie sɛ na yire na Ŋunu Hiram wee yire ni mbe sɛ swanyiɛ, na swafiŋge, na hlo ŋgaala, na lekambla, na gbajaala lɔ mbe pan.
22 Ŋunu Solomon yɛtaara, na u kachindɛ na wɛ waŋgra ŋga ŋulo kro na. 23 Waŋgra ŋga ŋulo kro naa paan, mbe u kachindɛ ŋga Nyiɛkpɔɔ u ŋga kre kee loo u pan. 24 Yɛlɛ nyini ŋga, mblɛ praa paan u pan kre naa paan na u kee swafinyi, na swanyiɛ, na yonyi, na tuwe ndiom tɛɛn, na wiyirɛ, na soolo, na bubunlɔ.
25 Ŋunu Solomon naa wa nyinyi kagbenyi jijirɛ ni na u sookɛɛ na yi soolo teeri, a wraa wa soolo mblɛ pe ndru na shie ŋunɔ ni kagbenyi kɛmbɔshiin. Wra pe plɛ tɛɛ Jerusalem na, mna plɛ tɛɛ kakpɔɛ yire yɛ na. 26 Ŋulo mblɛ praa wa mu yire Euphrates lɔɔ kre nyjeeri haa wa, mu pan mu su Philistine leele tra nu na shie tapan haa, mu sɛ su Egypt tra sam na kro naa wa Ŋunu Solomon jaara. 27 Kre nyjila kre, Ŋunu Solomon na tia swafiŋge na bɔ Jerusalem na na dnɛ yi, a cedar kɛɛn nyjɛ ndrɔ yira sheli yire na nɛɛ wa, imi na sycamore tinyi na nɛɛ Judah nyambie lawee yire nu kre. 28 Egypt tra nu pra sɛ Ŋunu Solomon soolo pre plɛ lɔ, mna sɛ pe plɛ lɔ waŋgrɛ yɛ nu mu ya.
Solomon Kumu
29 Kee nyjɛ Ŋunu Solomon na pe u ŋunumu nyjila, mu yire yi nɔɔ na mu sɛ su yi nyukɔɔrɔ na kro, pra yi nyunɔ mu tɛɛ, a yiraa wa Nyiɛkpɔɔ keenyanyofɛɛnlɛ Nathan, na Ahijah ŋmba wra yiri Shiloh na, na Iddo ŋmba wra Nebat biblɔ Jeroboam kee nya mu yo pre fakee hlɛ nu. 30 Ŋunu Solomon na tni Jerusalem na mna Israel ŋunumu li yɛlɛ fuloe shiin, 31 mna chin mu u tolɛɛlɛ kɔŋgɔ ni kuulo, a pra u le Jerusalem na u lɛ David kakpɔɔ kre na. A u biblɔ Rehoboam na u krɔ li, mna jɔɔn li.