Sheba Ŋuchlɔ Wre Kee
10
Ŋga Sheba ŋuchlɔ wre na loo mɛɛ ŋga Ŋunu Solomon ta o Tafun Nyiɛkpɔɔ haa kre, wra yiri u waŋgra nu, mna sɛ Solomon wie kaalɛɛ shelee, mna u jawala le.a 2 Ŋga wraa shie Jerusalem na kre, wra leele wru tataara, a pra nyuuma nduu nduu, mna tuwe ndiom tɛɛn, na swanyiɛ tataara, na dnɛ chichiele pɔ mu ya, mna sɛ na yi ni. Ŋga wra le Jerusalem na kre, wra sɛ Solomon wie kaalɛɛ nyjɛ yiraa wa u jawala nu kro. 3 Kaalɛɛ nyjɛ wra wie yire, Ŋunu Solomon na yi nyu wɔ u pan kro, ka nsraa wa mna sheli mu ŋga. 4 Ŋga Sheba ŋuchlɔ wre na Solomon kachindɛ kre nya, mna ŋunu katoo ŋga wra sin kre nya, 5 mna sroe nyjɛ pe teeri u pan tebru na nya, mna u sumifɛɛnlɛ tnihɛɛ nya, mna u loplombo tnimu nya, na dodonyi nyjɛ pe leni ni, mna u simi lefɛɛnlɛ nya, mna sra ŋga nyini wra wɔ Suminyuŋgo wa nya kre, wejiŋge na yɔ u na.6 A ŋuchlɔ wre na yo Ŋunu Solomon pan mbo, “Tolɛɛ, mu kachindɛ, na mu kee nyjɛ ni tni ni waŋgra nu mu loo yire kro pe yɛŋgɛ. 7 Yire kee yire ndaa loo yire kro ni nsra yi shɔnli, na ŋga ni pan mu yi nya ŋga bɔkɔ. Mu kachindɛ, na mu yɛtaara kee nyjɛ ni loo yire kuraa n da mu kee yire yɔɔ. Mu kaalɛɛ pe, a yi wɛ nyjɛ ni loo yire na. 8 Ni chin na mu loplombo, na mu sumifɛɛnlɛ mblɛ pe yire mu yiɛ nyjila kro nu na mu kachindɛ kee yire ndru pre yiɛ we na shio. 9 Nyiɛkpɔɔ ŋmba wi mu Tafun Nyiɛkpɔɔ, a wra mu kee chaa, mu mu pe Israel leele ŋunu wre wo yi mɛɛ. Ŋga mu Tafun Nyiɛkpɔɔ wre Israel leele pre kori nyjila kro nu kre ndra na, u mu pe ŋunu mbe mu ti kpralie, na frakaa na tnumu tuni nyjila kro nu.” 10 A ŋuchlɔ wre na Ŋunu Solomon ŋga swanyiɛ ŋga snamu ŋga kra da kradnɛ kagbenyi lafɛɛ kɔɔnanyjirɛ, na tuwe ndiom tɛɛn tataara, na dnɛ chichiele ni. Ndro nsra da mna sɛ na tuwe ndiom tɛɛn ni Jerusalem na, a yi nɛɛmu na da nyjɛ ni Sheba ŋuchlɔ wre na pan mu Ŋunu Solomon ŋga yire ni.
11 Hiram krɔɛ kpɔɛ yire na swanyiɛ tio Ophir na, mna pan mu Ŋunu Solomon ŋga. Ŋga praa paan kre, pra pan na kɛɛn chichiele yɛ nyini ni, praa yi yeeri juniper, yire na dnɛ chichiele yɛ ni. 12 Solomon na kɛɛn chichiele yire tɛɛ mna yirɛ nyjɛ na pie na ndru mbra lee Suminyuŋgo wa, na u katoo wa pe, mna yɛ tɛɛ mna juru, na saŋgoe pe mna mɛkɔmblɔ pre ŋga. Pe nsra da mu le na yire kɛɛn chichiele yire yɛ nyini ni Jerusalem na ma na.
13 Ŋunu Solomon na Sheba ŋuchlɔ wre ŋga paala yirɛ yɛ, na yirɛ nyjɛ wraa chaa kro. A wre na u leele mblɛ ni wra pan pre na ndru mna sɛ Sheba tra nu.
Ŋunu Solomon Yɛnyiŋge Ŋga Wra Ta
14 Swanyiɛ ŋga Ŋunu Solomon naa taa yɛlɛ nyini snamu na da kradnɛ kagbenyi fuloe shiin na kɛ. 15 Tɔɔ nyjɛ wraa shio jafalifɛɛnlɛ, na Arabia ŋulo, na loplombo kɛmbɔshiin mblɛ praa Israel tra kre le pre pan krɛrɛ nsra chaa. 16 Ŋunu Solomon na swanyiɛ tɛɛ mna ŋunɔwiyirɛ nyjɛ ni leele peyɛ toni badɛnyi lafɛɛ shiin pe, swanyiɛ ŋga ni pra nunu pe snamu na da kradnɛ kɔɔnashin na yɔɔ. 17 Wra ndru mna ŋunɔwiyirɛ yire bɛɛlɛ lafɛɛ taarɛ pe. Swanyiɛ ŋga ni pra nunu pe snamu na chaa da kradnɛ jijirɛ. Ŋga wra kɔ kre, a wra sɛ yi tɛɛ ŋunu katoo wa nyuŋgo ŋga praa yeeri Lebanon klɔ kre nu.
18 Ŋunu na ŋujɔɔn badaaŋga ka pe na hlo ŋgaala ni, mna swanyiɛ titi nya mu wo ki na. 19 Ŋujɔɔn kre lawee nyjɛ na mu taan mbe nduu mbe tni ki na yire naa kɔɔnanu, a na mu yire ki kro ki pe na gbolo yi mu fɛ mu kun. A pra kɛnyi taahaa pe yi kokoe shiin yire na, mna jirae shiin tɛ mu yire yire yi mbɛɛlɛ na. 20 A pra swanyiɛ jirae kɛmbɔshiin pe mu kan kan shiin shiin, kamɛŋɛ na kalie, ŋujɔɔn kre taanduuhɛɛ kɔɔnanu yire na. Ndro n da mu ŋujɔɔn pe a ki da na ŋga Solomon na pe kre ni. 21 Solomon gbɔyirɛ kro, swanyiɛ ni pra yi pe, a li yirɛ nyjɛ yiraa wa ŋunu katoo lawee ŋga praa yeeri Lebanon klɔ kre nu yire kro, swanyiɛ titi ni pra yi pe. Pe nsra swafiŋge tɛɛ mu ka pe, ŋgi na hin? Ŋunu Solomon nyjila, pe n swafiŋge le mu nya. 22 Ŋunu Solomon naa wa epo krɔɛ badɛnyi nyjɛ ni praa jafa lii ni, mna ya Ŋunu Hiram wee yire na. Na krɔɛ yire sɛ, yɛlɛ taarɛ mbe yi chiin pan. Na yi paan yie pan na swanyiɛ, na swafiŋge, na hlo ŋgaala, na lekambla, na gbajaala le wolo ni.
23 Ŋunu Solomon na swa ta titi, mna kala chin mu wɛ ŋulo kro na waŋgra ŋga nu. 24 A waŋgra ŋga leele kro naa chaa mbe pan mbe u kachindɛ ŋga Nyiɛkpɔɔ na u ŋga kre nya. 25 Yɛlɛ nyini ŋga, pan leele mblɛ praa paan u pan pre naa paan na u kee swafiŋge, na swanyiɛ yirɛ, na dodonyi titnɔnyi, na wiyirɛ, na tuwe ndiom tɛɛn, na soolo, na bubunlɔ.
26 Ŋunu Solomon na soolo, na sookɛɛ ta tataara. U sookɛɛ bribri naa kagbeŋge na lafɛɛ jijirɛ, a u soolo naa kagbenyi kɛmbɔshiin. Plɛ naa wa u jaara Jerusalem na, a wra plɛ tɛɛ tɛɛ kakpɔɛ yire yɛ na. 27 Ŋunu Solomon na tia swafiŋge na bɔ Jerusalem na na gbonyi yi, a cedar tinyi na nɛɛ na tinyi nyjɛ praa yeeri sycamore a yiraa wa Judah nyambie na yire yi. 28 Egypt na Kue na, bawa Solomon jafalifɛɛnlɛ pre naa shie na u soolo pre loni na paan. 29 A u sookɛɛ yire, Egypt na praa yi loni, nunu ndrɔ naa swafiŋge kradnɛ kɛmbɔkunɔ, mnaa soolo pre loni swafiŋge kradnɛ jijirɛ. Praa shie na pe plɛ prɛ na Hittite, na Aramean ŋulo kaan.