2 Kings 1

Ŋulo Hlɛ Shiinwo

Elijah Na Ŋunu Ahaziah

Israel ŋunu Ahab kumu kɔkro kre, Moab tra leele na pnaŋa mna yiri mna u pɔ Ahaziah ŋmba wra pan mu jɔɔn li Israel tra nu wre taan. 2 Ki ble ka Ŋunu Ahaziah na yili u abansru nyuŋgo ŋga kraa wa Samaria na kre kɛɛn vromboo nu mu to, mna pra kpɔɔ. Ki tia wra leele wɔ mna tun mbe pe sɛ Philistine sɛɛn ŋga kraa wa Ekron na, a praa ki yeeri Baal-Zebub kre na mbe sɛ chlɛ mbe chin na we saanla, ndee wa saanla. 3 La, o Tafun Nyiɛkpɔɔ nyjeeri bituŋu na sɛ yo Tishbe ndro keenyanyofun Elijah pan mbo, “Yiri mu sɛ Samaria ŋunu bitumblɔ pre fni mu pe wie na, ‘Kena e jawa na Nyiɛkpɔɔ u n wa Israel tra nu, kre ki tia e yili na shie Ekron sɛɛn Baal-Zebub na mbe sɛ chlɛ ŋgaa? 4 E sɛ yo Ŋunu Ahaziah pan na kre kee ŋga u pe ŋga ndra na, wa saanla u yira kre nu, we ku.’” A Elijah na sɛ kee kre yo u pan.

5 Ŋga bitumblɔ pre na ndru mna sɛ Ŋunu Ahaziah pan kre, a wra pe wie mbo, “Mni a e ndru mu pan yaari ma hin?” 6 A pra kna mbo, “Ŋga o shie kre, kre blɔ wa pan mu o fni mu yo o pan mbo, ‘E ndru e sɛ yo ŋunu ŋmba u e tun wre pan na, kee ŋga o Tafun Nyiɛkpɔɔ yo yi kre mbo, kena Nyiɛkpɔɔ u n wa Israel tra nu, kre ki tia mu leele tun chlɛ haa Ekron sɛɛn Baal-Zebub kre na ra?’ Blɔ wre na ndru mu yo o pan na kre kee ŋga ndra na, ma saanla mu yira kre nu, mu ku.” 7 A ŋunu wre na pe wie mbo, “Ndro ŋmbi nyini u pan mu e fni mu kre kee ŋga yo e pan hin? Mni sembremu u nyi hin?” 8 A pra kna mbo, “Na u yurɔ yooro dodoŋgi le, mna yurɔ hlɛ greree pɔ sɛlɛ.” A ŋunu wre na yo mbo, “Tishbe ndro Elijah wi kre.”

9 Titɛɛ kre nu, a wra u ŋunɔwifɛɛnlɛ lopom, na sojae fuloe shiin na kɛ wɔ mna tun Elijah pan. Na Elijah wa mu tni nyambie ka na. A lopom wre na nduu mna sɛ u pan wa mna mandiɛ kre bɔ u pan mbo, “Nyiɛkpɔɔ ndro, tolɛɛ ŋunu yo mu tii mbe pan fuŋgaami.” 10 A Elijah na kna mu yo ŋunɔwifɛɛnlɛ lopom wre pan mbo, “Na Nyiɛkpɔɔ ndro wi mi, kena kanhun ki yiri nyjeeri mbe pan mbe ŋu na mu leele fuloe shiin na kɛ mblɛ sro mbe gbo.” Titɛɛ kre nu to, a kanhun na yiri nyjeeri mna pan mu ŋunɔwifɛɛnlɛ lopom wre, na u leele fuloe shiin na kɛ pre sro mu gbo pei.

11 Ŋga kra pan ma kre, Ŋunu Ahaziah na ndru mna u ŋunɔwifɛɛnlɛ lopom wa wɔ, mna sojae fuloe shiin na kɛ wɔ mna ya mna pe tun Elijah pan na. A ŋunɔwifɛɛnlɛ lopom wre na sɛ yo Elijah pan mbo, “Nyiɛkpɔɔ ndro, tolɛɛ ŋunu yo o pan mbe yo mu pan na mu tii mbe pan fuŋgaami.” 12 A Elijah na kna mbo, “Na Nyiɛkpɔɔ ndro wi mi yɛŋgɛ, kena kanhun ki yiri nyjeeri mbe pan mbe ŋu na mu leele mblɛ kro sro mbe gbo.” Titɛɛ kre nu to, a kanhun na yiri nyjeeri mna pan mu pe sro mu gbo pei.

13 Ŋga kra pan ma kre, ŋunu wre na ndru mna u ŋunɔwifɛɛnlɛ lopom taarɛ wo, na sojae fuloe shiin na kɛ wɔ mna tun Elijah pan. Wre ŋunɔwifɛɛnlɛ lopom wre na sɛ kosie kan Elijah yiɛ mna yo mbo, “Nyiɛkpɔɔ Ndro, Jande, mi na ni leele mblɛ ndraa wa mu kɛɛ, kena nyu mu sumifɛɛnlɛ na. 14 O loo na kanhun yiri nyjeeri mu pan mu ŋunɔwifɛɛnlɛ loplombo shiin mblɛ pe yiɛklu mu pan mna pre na pe leele kro sro pei. Kena jande ni ŋmaa wa mu kɛɛ, nyu ni na.”

15 A o Tafun Nyiɛkpɔɔ nyjeeri bituŋu wre na yo Elijah pan mbo, “Yiri mbe ŋu na wre sɛ, maa shia u fiɛ.” A Elijah na yiri, a pra sɛ Ŋunu Ahaziah pan. 16 Ŋga Elijah na le wa kre, a wra yo ŋunu wre pan mbo, “O Tafun Nyiɛkpɔɔ yo ni mu wie na, kena Nyiɛkpɔɔ u n wa Israel tra nu mbe mu u wie kee, a ki tia mna leele tuni na pe sɛ Ekron sɛɛn Baal-Zebub na mbe sɛ chlɛ mu yira kre ndra na ŋgaa? Ŋga mu kre kee ŋga pe kre ndra na, ma ŋmaa ta, mu ku.”

17 Ki tia Ŋunu Ahaziah na ku yɛŋgɛ, imi na o Tafun Nyiɛkpɔɔ na tia Elijah na ki yo kre. Ŋga Ŋunu Ahaziah nsra biblɔ se kre ndra na, Joram wra u krɔ li mna jɔɔn li. Kre nyjila kre, na Jehoshaphat biblɔ Jehoram wre jɔɔn li Judah tra nu kie pe yɛlɛ shiin. 18 Kee nyjɛ Ŋunu Ahaziah na pe u ŋunumu nyjila yire krɛrɛ pra yi nyunɔ mu le Israel ŋulo fakee hlɛ kre nu.