4 A Elijah na ndru mna yo Elisha pan mbo, “O Tafun Nyiɛkpɔɔ ni tun Jericho na, kena tni mna.” A Elisha na kna mbo, “Ŋga o Tafun Nyiɛkpɔɔ wa, a muu wa ŋga wala, mba laa mu kro.” A wra taa u na a pe kro na sɛ Jericho na wa. 5 Keenyanyofɛɛnlɛ feko plɛ naa wa Jericho na wa na, a pra Elisha wie mbo, “Mu chin na O Tafun Nyiɛkpɔɔ paan mbe mu tafun wru mbe sɛ ŋgaa?” A wra kna mbo, “Ni ki chin, kena yaa ki kee ka yo.”

6 A Elijah na ndru mu yo Elisha pan mbo, “O Tafun Nyiɛkpɔɔ yo ni sɛ Jordan Lɔɔ kre nu, kena tni mna.” A Elisha na kna mbo, “Ŋga o Tafun Nyiɛkpɔɔ wa, a muu wa ŋga wala, mba laa mu kro fio.” A pe kro shiin pre naa nyaari na shie. 7 Keenyanyofɛɛnlɛ pre fuloe shiin na kɛ na yili mna taa Elijah na Elisha kro, mna lalaa wa pe pan na pe le, a pra nyaari mna sɛ yire Jordan Lɔɔ kre nyu na. 8 Ŋga pra da wa kre, a Elijah na u dodoŋgi fimi wo wɔ, mna ki mbiile mna ki tɛɛ mna lɔɔ kre yiɛ fɔɔri, titɛɛ kre nu to, a nyumu kre na peeri, a ki ka na yire kalie, a ka na yire kamɛŋɛ, a kolo na sni, a pe kro shiin pre na nyaari tra waara na lɔɔ kre lam mu kun.

9 Ŋga pra kun mu kɔ kre, a Elijah na kna mna yo Elisha pan mbo, “Kee ŋgi mu chaa mbe ni pe mbe mu ŋga mbe pe chiin ni wru mu jaara mbe sɛ hin? Ki yo ni pan?” A Elisha na kna mbo, “Ni ŋga mu jaŋga kre ma gbee shiin.” 10 A Elijah na kna mbo, “Mu ni wie kee shelee, la, na maa nya a pe ni wru mu jaara na shie, kre mu ki ta, a na ki nsra pe ma naa, ma ki ta.” 11 Ŋga praa nyaari na paara na shie kre, titɛɛ kre nu to, a sookaa ka kraa nyini kanhun, na soolo mblɛ pe nyini kanhun na pan mu le Elijah na Elisha lalaa, a legboo fuflɛ ka na gbun mna Elijah wru na shie nyjeeri. 12 Ŋga Elisha na ki nya ma kre, a wra gble le na Elijah yeeri mbo, “Ndoo, Ndoo, Israel sookɛɛ, na soolo nduufɛɛnlɛ lɛ kre.” Titɛɛ kre nu to, a wra Elijah cha mu la. Bawa wra wre titi dodonyi tini mu wla uyɛ na, a kra nyina na fooro u lii.

13 Ŋga pra Elijah wru na shie kre, u dodoŋgi fimi wo kre na laa mna to, a Elisha na ki bali mna ndru mna sɛ yire Jordan Lɔɔ kre nyu na, 14 mna Elijah dodoŋgi kre laa mna lɔɔ kre yiɛ fɔɔri mna yo mbo, “Sena o Tafun Nyiɛkpɔɔ ŋmba wi Elijah Nyiɛkpɔɔ wre nyi hin?” Ŋga wra dodoŋgi kre tɛɛ mna nyumu kre yiɛ fɔɔri kre to, a lɔɔ kre na peeri mna yire kalie na kamɛŋɛ, a wra nyaari mna ki kun.

15 Keenyanyofɛɛnlɛ feko mblɛ pra yiri Jericho na mna sɛ yire na pe le kre na kna na yuu peyɛ pan mbo, “Elisha Elijah jaŋga kre ta.” A pra sɛ u fni mna kosie kan u yiɛ, 16 mna yo u pan mbo, “Oo bilɛ faŋgafɛɛnlɛ fuloe shiin na kɛ mna, kena ti mbe o sɛ mu tafun wre haa cha. Aada o Tafun Nyiɛkpɔɔ wre Ŋumu u bali mu sɛ taa nyua ka na, ndee mu sɛ u le nyuɛ wee ka nu.” A Elisha na kna mbo, “Ɔɔhɔn, yaa sɛ, na e sɛ yaa u nya.” 17 La, leele pre na je, mna kro na ki yuu suwi, mna sɛ su na sra na wɔ Elisha na, a wra pe ŋga kolo na pe sɛ. A pre bilɛ fuloe shiin na kɛ pre na sɛ, mna sɛ Elijah haa cha ble nununu taarɛ, pe nsra u nya. 18 A pra ndru mu pan mu mandiɛ bɔ Elisha pan Jericho na. A wra yo pe pan mbo, “Ndaa yo na yaa sɛ, na e sɛ yaa u nya.”

19 Ki ble ka chia kre leele na sɛ yo Elisha pan mbo, “O tafun, lawee ŋga nu pra o chia ŋga kun kre nyu, la, nyumu ŋga kii wa mna kre n nyu, a tra kre n na yirɛ nyɔɔ.” 20 A Elisha na yo pe pan mbo, “E weŋge le kotolo fɔŋgɔ nu e pan e ni ŋga.” A pra sɛ pan na ki ni mu u ŋga. 21 A Elisha na yili mna sɛ pe bloe yire nu, mna weŋge kre kna mna le nyumu kre nu, mna yo mbo, “Kee ŋga o Tafun Nyiɛkpɔɔ yo yi kre, ‘Ni nyumu kre tra, kia ti mbe leele na kuu na, a tra kre we na yirɛ nyɔɔ fuŋga.’” 22 Mu yire kre nyjila kre mu pan mu su aŋga na, bawa nyumu kree wa mu nyu imi na Elisha na ki yo kre.

23 A Elisha na yiri wa mnaa shie Bethel na, ŋga wraa nyaari na shie kre, a biile plɛ na yiri chia kre na mna na u pini na tɛɛ na yuu mbo, “Yili mna mu sɛ, sɛ mbe o mu cha mbe la, ndra pɔ wo ni.” 24 A Elisha na kna mna biile pre le, mna o Tafun Nyiɛkpɔɔ mɛɛ tɛɛ mna pe sun. Titɛɛ kre nu to, a sisirei shiin na yili nyaa mna pan mu biile pre fuloe shiin na shiin yii mna pe wla mu wo. 25 A Elisha na sɛ nduu nyua Carmel na, mna yire wa mna tii mu sɛ Samaria na.