Moab Tra Leele Na Yiri//Mu Israel Leele Taan
3
Ŋga Ŋunu Jehoshaphat na li jɔɔn na yɛlɛ kɛmbɔkɔɔnatarɛ Judah na kre, kre nyjila kre Israel ŋunu Ahab biblɔ Joram na pan mu ŋunumu li Israel na mna tni Samaria na, wra ŋunumu kre li yɛlɛ kɛmbɔshiin. 2 Wra sisam pe o Tafun Nyiɛkpɔɔ yiɛ na, la, u sisam nsra da na u lɛ na u lo Jezebel sisam nyjɛ pra pe ni. Dnɛ ŋga u lɛ na wru mu tɛɛ mnaa Baal sɛɛn kre peerii ki na kre, wra ki wru mna wa. 3 Ande kre kɔkro ni wra je mna taa Nebat biblɔ Jeroboam wre sisam nyjɛ wra tia Israel leele naa pini yire na, u nsra laa yi kro.4 Moab tra naa wa Israel ŋunu jaara, ki tia yɛlɛ nyini kpan Moab ŋunu Mesha naa tɔɔ toni na Israel ŋunu kaan. Moab ŋunu wre naa mbaala poorii, ki tia yɛlɛ nyini ŋga wraa shie na Israel ŋunu kaan mbapɔɛlɛɛ kagbeŋge lafaa, na mbapilɛ kagbeŋge lafaa yooro nyjɛ pe knumu. 5 La, Ŋunu Ahab kumu kɔkro kre, Moab ŋunu wre na yiri mna Israel ŋunu fɔŋgɔ wre taan. 6 Ŋga kra pan ma kre, Ŋunu Joram na yiri Samaria na mna sɛ Israel ŋunɔwifɛɛnlɛ kro nyu ble titɛɛ. 7 Mna ndro wɔ mna tun Judah ŋunu Jehoshaphat pan mbo, “Moab ŋunu yiri mu ni taan, kena mu sɛ ya ni na mbe o wi na u ni ree?” A Jehoshaphat na yo mbo, “Mi na ŋu we sɛ, leele nunu le wre, ni leele pe mu wolo, a ni soolo pe mu wolo.” 8 A Jehoshaphat na sɛ Ŋunu Joram wie mbo, “A kolo ŋgi oo yii mbe sɛ wi na pe ni hin?” A Joram na yo mbo, “Oo tro Edom tablɔ tra kre nu.”
9 A Ŋunu Joram, na Ŋunu Jehoshaphat na yiri mbe sɛ ŋunɔ, a Edom ŋunu na ya pe na. Ŋga praa shie kre, kie pe ble kɔɔnashin kre, na nyumu n wa mbe pe wifɛɛnlɛ pre ta mbe gbɔ, mbaa yo ka pie ta mbe pe soolo ŋga. 10 A Israel ŋunu Joram na yo mbo, “A yira ŋgi kala sisaa yi ŋga hin? Kena paan o Tafun Nyiɛkpɔɔ wre pan na o ni mna mbe paan o wru mbe le Moab leele kɛɛ ree?” 11 A Jehoshaphat na kna mu wie mbo, “Kena Nyiɛkpɔɔ keenyanyofun wa n wa mna, mbe o yire u na mbe o Tafun Nyiɛkpɔɔ wre wie ra?” A Israel ŋunu wre ŋunɔwifɛɛnlɛ pre lopom wa na kna mbo, “Shaphat biblɔ Elisha ŋmba wraa yaa Elijah na wree wa mna.” 12 A Jehoshaphat na yo mbo, “Wre rɛ, we ja mbe Nyiɛkpɔɔ kee nya mbe yo o pan.”
A ŋulo pre kro taarɛ pre na sɛ Elisha pan, 13 a wra yo Israel ŋunu Joram pan mbo, “Mni a mu pan ni pan hin? Kee ŋgi kii wa mi na ŋu lalaa hin? Sɛ sɛɛnlɛ nyjɛ mu lɛ, na mu lo naa sumi yire chlɛfɛɛnlɛ pre pan.” A Israel ŋunu wre na kna mbo, “Ɔɔhɔn, ŋgi na hin? O Tafun Nyiɛkpɔɔ wre u pan na wre ŋulo taarɛ mblɛ ni mna, mbe o wru mbe le Moab ŋunu wre kɛɛ.” 14 A Elisha na kna mbo, “Ŋga o Tafun Nyiɛkpɔɔ Jaŋgafun ŋmba ni sumi wree wa, a ndaa Judah ŋunu Jehoshaphat nyifɛɛrɛ pini kre ndra na, mba na kna mbra mu yiɛ le kple. Mbe na pe na ni n mu chin.” 15 Ba Elisha na yo mbo, “E sɛ juru gbunfun wa cha e pan e ni ŋga.” Ŋga juru gbunfun wre na pan na u juru kre gbuun kre, a o Tafun Nyiɛkpɔɔ na kala le Elisha nyu na mbe u yo Ŋunu Joram pan mbo, 16 “Kee ŋga o Tafun Nyiɛkpɔɔ yo yi kre mbo, ‘Nyumu we pan mbe kre lafolo ŋga nyi. 17 Nyiɛ fuflɛ wa gbun, a nyiɛ wa wɔ mbe e nya, a nde nyumu we bɔ lafolo kre nu mbe yire na e yurɛ kro ta mbe gbɔ.’ 18 Kre kee ŋga pee wa sheli o Tafun Nyiɛkpɔɔ pan, a we Moab leele le e kɛɛ. 19 A pe chiɛ chichiele, na nyjɛ pe mboe sin mu fɛ mu kun kre kro, e yi juari. E pe tinyi chichiele kro knumu e wo, pe bloe nyjɛ nu pe nyumu taa yire kro yurɔ yurɔ, mbe e dnɛ koli mbe wo pe trɛ tɛɛn yire na kro mbe yi kla.” 20 Ŋga nyiŋge na se bnimi, nyjila ŋga praa bnimi nyu sra woni kre, ŋga pie nya na nyumu fuu, mu tra kre shɔ mu ta poŋgo, mna yire Edom haa na paan.
21 Na Moab leele pre loo na ŋulo taarɛ pre peyɛ kna na paan mbe wi na pe ni, kra tia pra pe bilɛ loplombo na yirifumblɔ, na pe mblɛ pie jaa wi kro yeeri a pra sɛ ble pe sam na. 22 Ŋga pra yiri ki ble kre bnimi pupu, na yila fuu mu to nyumu kre na, a kra chiɛnri. Moab leele pre na nyumu kre nya a kra nyina na nyimi yi. 23 A pra kna na yuu peyɛ pan mbo, “Nyimi ki wo ma kre, aada ŋulo pre pe peyɛ frɔ mu gbo ma kre, e pan mbe o sɛ le pe tni haa wa mbe pe yirɛ foolo.” 24 Ŋga Moab leele pre na sɛ le Israel leele pre tni haa wa kre, a Israel leele pre na yiri mna wi na pe ni. Pra kna na feni a pra taa pe kro. Israel leele pre na wi mna Moab tra kre shɔ, mna ki leele pre gbo titi. 25 Israel leele pre na Moab leele pre chiɛ yire kla. Mna tinyi chichiele nyjɛ yiraa wa tra kre nu kro chile mu wo, mna pe bloe yurɔ yurɔ, mna dnɛ koli mu wo pe trɛ nyjɛ pe fali nu. Kakpɔɔ ŋga kra kro na yi Kir-Hareseth, a ŋunɔwifɛɛnlɛ pre na sɛ ki fɛ mu kun na vuŋmbɔɛ ni, mna wi na pe ni na. 26 Ŋga Moab ŋunu Mesha wre na nya na ŋunɔ kre u taan kre, a wra ŋunɔwifɛɛnlɛ lafɛɛ kɔɔnashin wru na pe brɔfiɛnlɛ yiɛshiin shiin ni, mnaa chaa mbe yɔ mbe tro Edom wifɛɛnlɛ pre lalaa, la, u nsra ki ja. 27 Ŋga kra pan ma kre, ŋunu wre na u biblɔ jlo ŋmba we na u krɔ li mbra jɔɔn li kre yii, mna u tɛɛ mna sra wɔ kapɔɔ kre mboo ŋga pra sin mu ki fɛ mu kun kre na. Ŋga Israel leele pre na ki nya ma kre, kra pe jawala tɔɔra na pe lewo gbo mu sra wɔ, a kra tia pra laa leele pre na, mna ndru mu sɛ pe tra nu.