5 A chlɔ wre na yili wa, a wre na u biile pre na sɛ gboelee wɛɛ yire yɛ cha, mna pra sɛ le nyuŋgo, mu krɔ tɔ peyɛ na. A biile pre naa gboelee yire wru na pe lo wre kaan, a wraa simi kre kna na leni yi nu, 6 a gboelee yire kro na kɔ, a chlɔ wre na kna mbo, “E pan na gboelee yire ka ni e ni ŋga.” A biile pre nunu na kna mbo, “Yi kɔ, ka n wa na.” Titɛɛ kre nu to, a simi kre na kun, ki nsraa paan na. 7 A chlɔ wre na sɛ mandiɛ bɔ Nyiɛkpɔɔ ndro Elisha pan, a wra kna mna yo u pan mbo, “Sɛ simi kre prɛ mu swa kre ka tɛɛ mu fɔlɔ kre tɔ, mbe ŋu na mu biile pre ki kɔɔn wru mbra lii.”

8 Ki ble ka Elisha na sɛ chia ŋga praa yeeri Shunem kre na, bawa chlɔ swafun wa na nyi, a wra Elisha yeeri na u pan mbe li u katoo. Mu yire kre nyjila kre, na Elisha sɛ chia kre na kpan, we sɛ li chlɔ wre na u plɔ pan. 9 Kraa wa wa a chlɔ wre na yo u plɔ pan mbo, “Ni chin na wre blɔ ŋmba u paan na lee o pan ŋga Nyiɛkpɔɔ ndro cheche wi. 10 Kena ti mbe o nyuŋgo ble ka gbeele u pan zio ŋga ndra na, mbe sniyira, na tebru, na jɔɔn, na kania cha mbe tɛɛ u pan wa, kena nyjila ŋga nu we le mna kpan mbe u bawa ta mbe sni.”

11 Ki ble ka Elisha na sɛ chia kre na, mna sɛ le u nyuŋgo nyjeeri wo kre nu mna sni mbe wuu. 12 Bawa wra yo u sumifun Gehazi pan mbo, “Shunem chlɔ wre yeeri mu ni ŋga.” A wra tii mna sɛ u yeeri a wra pan mna yire Elisha yiɛ. 13 A Elisha na yo Gehazi pan mbo, “Yo u pan na ni nya na o ndra na u yila na fnaa ŋga kro fnai, kena kee ŋgi u chaa mbe o pe mbe u ŋga hin? O sɛ talaa ka ni ŋunu pan, ndee ŋunɔwifɛɛnlɛ lopom wre pan u pan ra?” A chlɔ wre na kna mbo, “Kre n shian, nii wa mu tni mi titi leele nu, ki tia yaka n ni shian kpɔɔ.” 14 A Elisha na kna mna Gehazi wie mbo, “Yira ŋgi ki fna o pe mbe chlɔ ŋmba ŋga hin?” A wra kna mbo, “Biblɔ n wa u pan, a u plɔ wre lɛ.” 15 A Elisha na yo mbo, “Chlɔ wre yeeri mbe u pan.” A Gehazi na chlɔ wre yeeri a wra pan mna yire jlonwee nyu na. 16 A Elisha na yo chlɔ wre pan mbo, “Yelibaŋga imi nyu, na mu biblɔ yii kɛɛ.” A chlɔ wre na kna mbo, “Ei Ni tafun, Nyiɛkpɔɔ ndro wi ŋu, kena maa ni fana.” 17 La, kie pe nyiɛpɔ chiɛri yɛ kɔkro kre chlɔ wre na siire ta, mna biblɔ se imi na Elisha na ki yo u pan kre.

18 Pɔ wre na lɛ, a ki ble ka wre na u lɛ na yirɛ kunfɛɛnlɛ na sɛ see. 19 Praa wa see wa to, a pɔ wre na gble le mna u lɛ yeeri mbo, “Ni ndra, Ni ndra” A u lɛ wre na yo u sumifɛɛnlɛ pre wa pan mbo, “U wru mu sɛ u lo ŋga.” 20 A sumifun wre na u wru mna taa patia na mna sɛ u lo wre ŋga. Pɔ wre naa wa mu tni u lo wre jeelee na mna sɛ su lafo na to, mna ku. 21 A chlɔ wre na pɔ wre wru mna sɛ u taa Nyiɛkpɔɔ ndro Elisha wre dɛŋglɛ na, mna krɔ kre yii mu tɔ, mna yili fimi na, 22 mna wra u plɔ yeeri mna yo u pan mbo, “Ti sumifɛɛnlɛ pre wa pan mbe ni ŋga bubunlɔ pre wa mbe ni sɛ Nyiɛkpɔɔ ndro wre pan mbe ndruu pan fuŋgaami.” 23 A blɔ wre na kna mu chlɔ wre wie mbo, “Mni a mna chaa mbe sɛ u pan aŋga hin? Wuuble ma aŋga, a nyiɛpɔ fɔŋgɔ ble ma.” A chlɔ wre na kna mbo, “Kie yila.”

24 A chlɔ wre na bubnɔ wre san mna nduu mu tni u na, mna yo sumifun wre pan mbo, “Yiɛklu mbe o sɛ, maa shia yire haka, fɔna mbe yo mu pan na mu yire.” 25 A wra yili wa mna sɛ nyua ŋga praa yeeri Carmel kre na, bawa Nyiɛkpɔɔ ndro Elisha na nyi.

Ŋga Elisha na u nya haalee na u paan kre, a wra yo u sumifun Gehazi pan mbo, “Le, chlɔ ŋmba uu wa Shunem na kre u paan wa kre, 26 fɛ mu sɛ u fni mu u wie na, ‘U mandiɛ hin? A mni u plɔ, na u pɔ wre nyi hin?’” A Gehazi na sɛ u fni mna u wie, a wra kna mbo, “Peere n wa, pe kro gbaŋmba.” 27 Ŋga chlɔ wre na da Nyiɛkpɔɔ ndro wre na nyua kre na wa kre, a wra sɛ Elisha jeelee yii, a Gehazi na pan mbe chlɔ wre ŋunɔ mbe wa, a Nyiɛkpɔɔ ndro wre na yo u pan mbo, “Laa u na, fooro kpɔɔ ki u yii, la, Nyiɛkpɔɔ kee ŋga ki pan na ki ni ndra ni na.”

28 A chlɔ wre na kna mna Elisha wie mbo, “Ndaa mu tali pɔ mbe see? Ni nsra yo mu pan na maa shia ti mbe ni kaan waa?” 29 A Elisha na yo Gehazi pan mbo, “Mu yɛ kna nyaanyaa mu ni kanyie kre wru mu fɛ mu sɛ chlɔ wre katoo wa, na maa da wa mbe mu kanyie kre taa pɔ wre yiɛ na, na mu shie maa shia paara na ndro ni, a na ndro paara na mu ni maa shia yire.” 30 A pɔ wre lo wre na yo Elisha pan mbo, “Ŋga O Tafun Nyiɛkpɔɔ wree wa, a muu wa ŋga wala, mba mu ti mbe sɛ.” Ŋga wra yo ma kre, a Elisha na yiri mna taa u na a pra sɛ.

31 Gehazi na klu mu da wa, mna sɛ kanyie kre taa pɔ wre yiɛ na. Pɔ wre nsra jɔŋgɔ, a u nsra yaka pe a wra loo. A Gehazi na fɛ mna sɛ Elisha fni kolo mna u bɔ mandiɛ mbo, “Ni sɛ kaan kre taa pɔ wre na, a u je u n nyi.”

32 Ŋga Elisha na le katoo wa, na pɔ wre gboo wa mu sni u dɛŋglɛ na. 33 Ŋga wra le nyuŋgo wa kre, a wra krɔ yii mu tɔ uyɛ na, mna O Tafun Nyiɛkpɔɔ wre tali. 34 A wra sɛ juule pɔ wre na, mna nyu kan u nyu na, a u nyiɛlɛ na kan pɔ wre nyiɛlɛ na, mna u kɛnyi le pɔ wre kɛnyi nu, mna juule u na maa, to na pɔ wre weerii na paan. 35 A Elisha na taan mna yiri na nyaari na shie na paan nyuŋgo lam wa. Maa, a wra ndru mu sɛ juule pɔ wre na shiin wo na to, a pɔ wre na jiri gbee kɔɔnashin, mna nyiɛlɛ nyaa. 36 A Elisha na Gehazi yeeri mna yo u pan mbo, “Pɔ wre lo yeeri mu ni ŋga.” A chlɔ wre na le nyuŋgo wa, a Elisha na yo u pan mbo, “Mu pɔ wre wru.” 37 A chlɔ wre na kosie kan, mna to Elisha jeelee na, mna taan mna yiri mna sɛ u pɔ wre wru mna yili fimi na.

38 Elisha na ndru mna sɛ Gilgal na, kre nyjila kre na klo to tra kre nu. Wraa wa wa ki ble ka, a keenyanyofɛɛnlɛ mblɛ praa wa wa pre kro na pan mu fni u lawee. A Elisha na yo u sumifun wre pan mbo, “Chɔ badaaŋga taa kanhun na, mu chiin sɔɔ mu leele mblɛ ŋga mbe pe ta mbe gbɔ.”

39 Leele pre wa na yiri mna sɛ see yɛ nu wrɛ knumu haa. Bawa wra sɛ tre ka nya na ki sɛ, a wra ki sɛnyi yire yɛ knumu mna le u dodoŋgi nu a kra nyi. La, u nsra chin na tre kre sɛnyi yire taan, ŋga wra pan na yi ni katoo kre, a wra yi knumu mna le chiin yire nu. 40 Ŋga Chiin yire na be, a pra yi kna mu le le leele pre pan yirɛ nu, ŋga praa yi gboo kre, a praa gble leni chaachaa mbo, “Elisha, tuwe sisaa wa chiin yire nu, ki tia waa jaa yi gbɔ.” 41 A Elisha na yo mbo, “E ni ŋga mimi chiɛri ka.” A pra pan na ki ni, a wra ka nyaara chiin yire yiɛ na mna yo pe pan mbo, “Fuŋga rɛ, e yi ko e leele pre ŋga.” A pra yi ko mna leele pre ŋga. A chiin yire na tna a pra ja mu yi gbɔ.

42 Ki ble ka blɔ wa na yiri chia ka na praa ki yeeri Baal-Shalishah na mna pan mu Elisha ŋga paanu fulo nyjɛ pra shɔlɔ jle wee tɛɛ mu pe, yire na shɔlɔ yire zezee chiɛri yɛ ni. A Elisha na yo na pe leele pre ŋga yi yi mbe pe ka. 43 A u sumifun wre na kna mbo, “Yire sro chiɛri nyjɛ we leele lafaa mblɛ daa?” A Elisha na kna mbo, “Ŋu mu pe ŋga yi yi ma rɛ, o Tafun Nyiɛkpɔɔ wre yo mbo, ‘Pie ka mbe pra kuɛn na.’” 44 A u sumifun wre na sɛ yi tɛɛ tɛɛ leele pre yiɛ, a pra ka mna pra kuɛn na, imi na o Tafun Nyiɛkpɔɔ na ki yo kre.