5 A Syria ŋunu wre na yo Naaman pan mbo, “Ki fna mbe mu sɛ, a mbe mu ŋga ni kɛ hlɛ mbe mu sɛ Israel ŋunu wre ŋga.” A Naaman na sɛ uyɛ kna, mna swafiŋge ŋga snamu kie pe kra dnɛ lafɛɛ kɔɔnashin na fuloe shiin na kɛ, na swanyiɛ ŋga snamu kra da kra dnɛ lafaa na yɔɔ wru, mna ya dodonyi fɔnyi nyini kɛ na, mna to kolo. 6 Kee ŋga kraa wa hlɛ ŋga ni wra sɛ Israel ŋunu wre ŋga na yi kre mbo, “Mi ni ni sumifun Naaman tuni mu pan, yiranyiɛrɛ wa u na, kena jande u tra ni pan.” 7 Ŋga Israel ŋunu wre na hlɛ kre tɔɔnri mu kɔ to, titɛɛ kre nu a wra u dodonyi tini mna wla uyɛ na, mna kna mbo, “Ŋgi ki tia a Syria ŋunu yo ni pan na ni yiranyiɛrɛfun tra hin? Nyiɛkpɔɔ wi mi mbe ni ja mbe ndro gbo, ndee mbe ndro ŋga ŋmaa ra? Ni chin na kakrɔ u ni chaa.”

8 Ŋga Nyiɛkpɔɔ ndro Elisha na loo na Israel ŋunu wre u dodonyi wla uyɛ na kre, a wra ndro tun na pe sɛ u wie mbo, “Mni a mu mu dodonyi wla muyɛ na hin? Ti mbe blɔ wre pan ni pan, we chin na Nyiɛkpɔɔ keenyanyofun waa wa Israel tra nu.” 9 A ŋunu wre na tia Naaman na u soolo, na u sookɛɛ yire mɔŋɔ mna sɛ yire Elisha katoo jlonwee nyu na. 10 A Elisha na ndro tun u pan jlonwee wa na pe yo Naaman pan mbo, “Sɛ weli Jordan Lɔɔ kre nu gbee kɔɔnashin, mu yiranyiɛrɛ yire we laa mu na.” 11 La, Naaman krɔ na kun kpɔɔ, a wra kna mu na taanri na shie mbo, “Ni jawa na we na yili mbra paan yire ni yiɛ, mbra u Tafun Nyiɛkpɔɔ wre mɛɛ yeeri, mbra kɛ tɛɛ mbra ni pɔ pɔ mbra ni tra. 12 Abana na Pharpar lɔɛ wa Damascus na mu nyu mu wɛ lɔɛ nyjɛ yii wa Israel tra nu na. Mbo mba na ja mbra sɛ weli yi ka nu mbra saanla ra?” Kena imi na u krɔ na kun mu da kre ndra na, a wra krɔ kna na shie. 13 A Naaman sumifɛɛnlɛ pre na flo mu da u na mna yo u pan mbo, “O tafun, kena na kekpɔɔ ka nyini Nyiɛkpɔɔ keenyanyofun wre na yo mu sɛ pe, ma na ki pe ra? Kena ŋga u yo mu sɛ weli mbe saanla ŋga, kekpɔɔ ŋgi yi hin?” 14 Ŋga pra yo ma kre, a Naaman na sɛ Jordan Lɔɔ kre nu, mna sɛ to ki nu gbee kɔɔnashin, imi na Elisha na yo u pan kre. A wra saanla, a u wejiŋge kre na ndru mna pe plɔplɔ na pɔ wi.

15 A Naaman na u leele pre kro na ndru mna sɛ Elisha pan. Bawa Naaman na sɛ yire u yiɛ mna paara mbo, “Fuŋga ni chin na Nyiɛkpɔɔ wa n wa waŋgra ŋga nu, fɔna Israel leele Nyiɛkpɔɔ wre chiin bɔkɔ. Kena jande yirɛ nyjɛ mu sumifun mu kaan ŋga shɔ, ni mu kɛ yi yi.” 16 A Elisha na yo u pan mbo, “Ŋga o Tafun Nyiɛkpɔɔ ŋmba ni sumi wree wa ŋga, ni da na mba yira kɛ wo ka shɔ mu pan.” A Naaman na tali chiin mbe u yirɛ yire shɔ, a wra je. 17 A Naaman na kna mbo, “Na ma yaka shɔ ni pan waa, kena jande ti mbe ni tra ŋga bubunlɔ shiin we ja mbe tio koli mbe sɛ, ŋgi na hin? Mu yire fuŋgaami na shie mu sumifun wa sra wɔ mbe yaka ŋga na, fɔna o Tafun Nyiɛkpɔɔ wre chiin bɔkɔ. 18 La, kee nunu chom ni o Tafun Nyiɛkpɔɔ wre tali mbe u ki ti mbe ni kɛ, kre yi na, na ni tafun ŋunu waa le na ni ni sɛɛn ŋga pe yeeri Rimmon kre nyuŋgo, maa ni kɛ yii, mbe o suulo mbe ki sumi kre, mbe o Tafun Nyiɛkpɔɔ wre ni sisam ti mbe ni kɛ.”

19 A Elisha na kna mbo, “Sɛ na wejinyiŋge ni.” Ŋga Naaman na sɛ maa to, 20 a Elisha sumifun Gehazi wre na yo u jawala nu mbo, “Ni tafun Elisha Naaman wa finfin a u sɛ, hali u n yaka shɔ u pan. Ki fna mbe wra yirɛ nyjɛ Syria ndro ŋmba u ŋga yire shɔ. Ŋga o Tafun Nyiɛkpɔɔ wa ŋga wala, ni da na mbe fɛ mbe u da kolo mbe yaka shɔ u pan.”

21 A Gehazi na pe nyaanyaa mna Naaman kɔŋgɔ ni. Ŋga Naaman nya na ndro feni na paan u pan kre, a wra tii u sookaa na mna sɛ u fni, mna u wie mbo, “A ki tna woo?” 22 A Gehazi na kna mbo, “Ki tna, ni tafun u ni tun na ni pan mbe yo mu pan na, ‘Fuŋgaami yirifumblɔ shiin yiri Nyiɛkpɔɔ keenyanyofɛɛnlɛ feko mblɛ pee wa Ephraim na pre nu mu pan mu yo u pan na u ya pe na. Kena ni lopom yo ni pan mbe yo mu pan na mu pe ŋga swafiŋge kra dnɛ fuloe taarɛ na kɛmbɔkunɔ, na dodonyi le wee shiin.’”

23 A Naaman na yo u pan mbo, “Shɔ ma gbee shiin mu sɛ u ŋga.” A wra Gehazi tali mna u ŋga swa kre, mna dodonyi nyini shiin yire ya u pan. A Naaman na u sumifɛɛnlɛ pre shiin wɔ a pra tuuro yire tio mna yiɛklu Gehazi pan. 24 Ŋga pra da nyua ŋga na pra nyi kre na kre, a Gehazi na tuuro yire shɔ mna sɛ le wre titi nyuŋgo, mna leele pre wa kolo a pra sɛ.

25 A Gehazi na yili mna sɛ yire u tafun Elisha yiɛ. A u tafun Elisha na Gehazi wie mbo,

“A sena mu sɛ hin?” A Gehazi na kna mna yo Elisha pan mbo, “Mu sumifun n sɛ haka.”

26 A Elisha na kna mna yo u pan mbo, “Nyjila ŋga ni Naaman tii u sookaa na mu pan mu mu fni kre, na ni ŋumu wa wa ka. Kre nyjila ŋga nu ma pe swa, ndee dodonyi, ndee olive simi, ndee afue see, ndee yurɛ, ndee tinlɛ shio leele pan. 27 Naaman yiranyiɛrɛ kre we kun mbe mbra ŋu na mu nanae kro na nyjila kro nu.” A Gehazi na flo Elisha yiɛ na mna sɛ. Titɛɛ kre nu to, a yiranyiɛrɛ na wo u na, a wra fniŋge na nyiɛsubie yi.