8 Kraa wa nyjila ka nu a Syria ŋunu na Israel leele na ŋunɔ ta. Syria ŋunu wre na u ŋunɔwifɛɛnlɛ loplombo na paara mu fni, a wra lawee wɔ mna we sɛ tni mbe ŋunɔ kre wi. 9 A Elisha na Israel ŋunu wre jaari na waa shia tro kre lawee kre nu. Ŋgi na hin? Syria ŋunu wre na u leele sɛ ja nyaa wa na mu siri. 10 A Israel ŋunu wre na u leele mblɛ praa wa mu tni kre lawee kre nu pre jaari, a pra peyɛ kna na lawee kre siri. Nyjila tataara nu pan Elisha naa ŋunu wre jaari, a kra tia pra kro na lawee kre siri.

11 Kee kre na tia krɔ na Syria ŋunu wre kun kpɔɔ, a wra kɛ wa mna u ŋunɔwifɛɛnlɛ loplombo pre kro yeeri mna pe wie mbo, “E ŋmbi haa uu wa Israel ŋunu wre kro hin?” 12 A pe nunu na kna mbo, “Tolɛɛ, o wa n wa Israel ŋunu wre kro. La, Nyiɛkpɔɔ keenyanyofun Elisha u kee nyjɛ mu juu na yuu nyuŋgo kre boo Israel ŋunu wre pan.” 13 A ŋunu wre na yo mbo, “E sɛ Elisha wre haa cha e pan e yo ni pan mbe ni leele tun mbe pe sɛ u yii mbe pan.” Leele pre na sɛ pan mna yo ŋunu wre pan na Elisha wa Dothan na. 14 A ŋunu wre na soolo, na sookɛɛ, na ŋunɔ winchinfɛɛnlɛ titie wɔ mna tun wa. Ndroo pra sɛ chia kre fɛ mu kun.

15 Ŋga nyiŋge na se bnimi, a Elisha sumifun na yiri mna yili fimi na mna Syria ŋunɔ wifɛɛnlɛ pre nya na pre na pe soolo, na pe sookɛɛ chia kre fɛ mu kun kre, a wra ndru mna sɛ yo Elisha pan mbo, “Ni tafun, o ku, mni oo pe hin?” 16 A Elisha na kna mbo, “Maa fiɛ, mblɛ pee wa mu ya o na pre nɛɛ mu wɛ mblɛ pee wa mu ya pe na kre na.” 17 A Elisha na nyiɛtali mbo, “O Tafun Nyiɛkpɔɔ, jande u nyiɛlɛ nyaa mbe u nya.” A o Tafun Nyiɛkpɔɔ na u sumifun wre nyiɛlɛ nyaa, a wra yiɛ wa mna le nyuɛ yire na mna nya na soolo, na sookɛɛ nyjɛ yi nyini kanhun, nyuɛ yire tɔ poŋgo, mna fɛ mu wre na Elisha kun. 18 Ŋga loŋgoolo pre na tii nyua kre na na paan Elisha pan kre, a wra nyiɛtali mna yo o Tafun Nyiɛkpɔɔ pan mbo, “Ti mbe leele mblɛ fun nyiɛlɛ na.” A pra fun nyiɛlɛ na imi na Elisha na yo kre. 19 A Elisha na yo pe pan mbo, “Kolo kre ma ŋga, a kakpɔɔ kre ma ŋga, e taa ni na, mbe ni sɛ e nyina blɔ ŋmba e chaa wre.” A wra yiɛklu pe pan, mna ndru mu sɛ na pe ni Samaria na.

20 Ŋga pra le chia kre na kre, a Elisha na yo mbo, “O Tafun Nyiɛkpɔɔ, bilɛ mblɛ nyiɛlɛ nyaa, mbe pe ndru mbe nya.” A o Tafun Nyiɛkpɔɔ na ndru mna pe nyiɛlɛ nyaa. Ŋga pie nya kre, na pee wa Samaria lam. 21 Ŋga Israel Ŋunu wre na pe nya kre, a wra kna mna Elisha wie mbo, “Ni pe gbo ree? Ndoo ni pe gbo ra?” 22 A wra kna mbo, “Maa pe gbo. Na mu sɛ wi mu leele yii ŋunɔ mu pan, mu pe gbo ra? Kena maa pe gbo, pe ŋga yaka mbe pe ka, mbe gbɔ, mu pe wa kolo mbe pe ndru mbe sɛ pe tafun pan.” 23 A ŋunu na tia pra sukpɔɔ pe mna Syria ŋunɔwifɛɛnlɛ pre ŋga. Ŋga pra li, mna gbɔ mu kɔ kre, a pra to kolo mna ndru mu sɛ pe tafun pan. Mu yire kre na, kra mu na Syria ŋunɔwifɛɛnlɛ pre na pan mu Israel leele tɔ na.

24 Kraa wa wa nyjila ka nu, a Syria ŋunu Ben-Hadad na u ŋunɔwifɛɛnlɛ wru mna sɛ Samaria fɛ mu kun. 25 Pra pe tɔ mna mu, kra tia klo kpɔɔ na to Samaria na, a kra tia leele na kɔ na bubnɔ ndra prɛ swafiŋge kradnɛ fuloe jijirɛ, mna na katoo kotro fre lakaja nyini prɛ swafiŋge kra dnɛ fiɛnfiɛn kunɔ. 26 Ŋga kra pan ma kre, ki ble ka na a Israel ŋunu naa wre nyaari buŋgo ŋga pra sin mu chia kre fɛ mu kun kre ndra na, a chlɔ wa na nyɛni mu u yeeri mbo, “Tolɛɛ, jande ya ni na.” 27 A ŋunu wre na kna mbo, “Na o Tafun Nyiɛkpɔɔ wre n ya mu na, mni mi we pe mbe jaa ya mu na hin? Shɔlɔ n wa ni pan shunshun na, a simi gbɔwo n wa ni pan simi fɛɛri ndoo mbe ni ta mbe mu ŋga.” 28 A wra kna mna chlɔ wre wie mbo, “Yira ŋgi ki mu ta hin?” A chlɔ wre na kna mbo, “Chlɔ ŋmba na yo ni pan mbo, ‘Pan na mu biblɔ ni mbe o u ka aŋga, baŋga kena o mi wo ka.’ 29 Kra tia o na mi pɔ wre ka. Ŋga nyiŋge na se, a ndaa yo u pan, na u pan na u wo wre ni mbe o ka kre, a u je mu sɛ pɔ wre ndra.” 30 Ŋga ŋunu wre na chlɔ wre mandiɛ kre loo ma kre, fooro na tia wra u dodoŋgi tini mu wla uyɛ na. Ŋga wra ki wla ma kre, pra nya na u kumu yoŋgo tɔ lam. 31 A wra kna mbo, “Baŋga imi nyu na ni n shia Shaphat biblɔ Elisha wre ndra kɔ u yulɔ na, kena o Tafun Nyiɛkpɔɔ u ni ndie tini kpɔɔ.”

32 Kre nyjila kre na Elisha wa mu tni u katoo, a Israel loplombo titie pre na sɛ u fɛ mu kun. A ŋunu wre na bituŋu wɔ mu tun Elisha pan. La, bituŋu wre nsra ta mu da wa, a Elisha na yo loplombo pre pan mbo, “Linkufun wre ndro tun na u pan mbe ni ndra kɔ. E le, na bituŋu wre waa da mna e krɔ kre tɔ, yaashia ti mbe u le nyuŋgo. Ŋunu wre titii wa mu taa u kro na paan.” 33 Ŋga Elisha naa wa mu na paara na loplombo pre ni kre to, a bituŋu wre na da wa. Maa to, a ŋunu wre na da wa na, a ŋunu wre na kna mbo, “Kanyana nyjɛ o nyaa nyjɛ kro, o Tafun Nyiɛkpɔɔ wre u pan na yi ni, kena ŋgi kie ti mbe ndaa kaan o Tafun Nyiɛkpɔɔ wre na na we o shɔ ŋga hin?”