2 A ŋunɔwifɛɛnlɛ pre lopom ŋmba na ŋunu wre naa kaan wre na kna mu yo Nyiɛkpɔɔ ndro wre pan mbo, “Hali na o Tafun Nyiɛkpɔɔ we nyjeeri nyaa a yira woni na nyiɛ yi kuraa kre, kia jaa pe ma.”

A Elisha na kna mbo, “Mu ki nya na nyini ni, la, ka wa le mu nyuu.”

3 Kre nyjila kre na kokuefɛɛnlɛ jijirɛ plɛɛ wa mu tni chia kre jlonwee nyu na wa. A pra kna na yuu peyɛ pan mbo, “Yira ŋgi oo tni mna mbe ku finfin ŋga hin? 4 Na o sɛ chia kre lam o, waa yaka ta mbe ka, klo kie o gbo. A na o tni mna o, oo ku, kena ti mbe o sɛ Syria ŋunɔwifɛɛnlɛ pre tnihaa wa mbe sɛ oyɛ wru mbe pe ŋga. Na pe waa o ti naa, kena oo ŋmaa ta, a na pe waa o gbo naa, kena o ku mbe sɛ prɛku.” 5 Ki ble kre yilakɔŋgɔ, pre kokuefɛɛnlɛ jijirɛ pre na yiri mna sɛ Syria wifɛɛnlɛ pre tnihaa wa. Ŋga pra da wa kre, na ndro nunu chom kuraa n wa wa. 6 Ŋgi na hin? Na Nyiɛkpɔɔ tia Syria wifɛɛnlɛ pre sookɛɛ, na soolo, na ŋunɔwifɛɛnlɛ tataara tiŋge loo, a pra kna mna yo peyɛ pan mbo, “E le, Israel ŋunu wre u sɛ Hittite leele, na Egypt ŋunu wru a praa paan mbe wi na o ni kre.” 7 A pra yiri mna fɛ mu pe yoŋgo nyinyi yire, na pe soolo, na pe bubunlɔ kro ti, mna fɛ mu shɔ, na peyɛ ndra praa chaa. 8 Kokuefɛɛnlɛ pre na sɛ mbra Syria leele pre tnihaa wa, mna le pe yonyi nyinyi yire ka nu, mna sro ta mu li, mna gbɔ, mna swafiŋge, na swanyiɛ, na wejiyirɛ ta mu koli, mna sɛ yi ndra. A pra ndru mna sɛ le yonyi nyinyi yire ka nu na, mna yirɛ ta mu koli wa na mna sɛ ndra.

9 Bawa pra kna mna yo peyɛ pan mbo, “Kee chichie ma o pini kre. Ketaan ble yi aŋga. Kena ki n fna mbe wre chiin ki tɔ mbe ta. Na o tia nyiŋge se a o chin mu kre mandiɛ ŋga bɔ, oo ndie tiniɛ ta, kena e ti mbe o sɛ nyaanyaa mbe sɛ mandiɛ kre bɔ ŋunu katoo.” 10 A kokuefɛɛnlɛ pre na sɛ yire chia kre jlonwee nyu na, mna nyu choŋgi mna jlonwee nyu shiefɛɛnlɛ pre yeeri mna yo pe pan mbo, “O sɛ Syria leele pre tnihaa wa, ndro nunu chom kuraa n wa wa, hali ma yaka tiŋge loo haka kple. Pe soolo, na pe bubunlɔ pee wa mu pɔ pɔ wa, a pe yonyi nyinyi yire wa mu yire yire wa.” 11 A jlonwee nyu shiefɛɛnlɛ pre na gble le, mna sɛ mandiɛ kre bɔ ŋunu katoo. 12 Ŋga ŋunu wre na mandiɛ kre loo kre, a wra taan mu yiri blee kre, mna yo u loplombo pan mbo, “Ni chin kee ŋga Syria leele pre chaa mbe o pe. Pe chin na klo chaa mbe o gbo, kre ki tia pe fɛ mu pe tnihaa kre ti, mu sɛ ja nyaa na o dɔɔtaa. Pe chin na oo yili mbe sɛ pe lawee wa, kena pe o ta mbe yii kɛnyi na, mbe le na o ni o chia kre lam.” 13 A loplombo pre nunu na kna mbo, “Tolɛɛ, ti mbe bilɛ pre plɛ soolo mblɛ pe kro chiɛri pre kunɔ wru mbe sɛ Syria leele pre tnihaa wa, mbe sɛ le kee ŋga kii wa wa. Na ki waa sheli a pe waa ku wa kre, kena mu chin na Israel leele mblɛ o kro pre we ku na pre lɛ.” 14 A pra sookɛɛ shiin na yi soolo wɔ, a ŋunu wre na leele wɔ mna pe tun na pe sɛ le kee ŋga ki Syria wifɛɛnlɛ pre ta. 15 Bitumblɔ pre na taa leele pre tlo na mna sɛ su Jordan Lɔɔ kre na. Ŋga praa shie kre, pan praa Syria leele pre yokunumɛɛ, na pe yirɛ knumɛɛ nyjɛ praa waari na shie nyaa kolo kre na. A pra ndru mna sɛ yirɛ nyjɛ pra nya yire mandiɛ bɔ ŋunu wre pan.

16 Titɛɛ kre nu, a leele pre na tin gri, mna sɛ Syria leele pre tnihaa wa mna sɛ pe yirɛ yire foolo. Pra yirɛ ta mna koli hali a pra kɔ na mimi Zaabɔtɔ nyini, na shɔlɔ zaabɔtɔ nyini shiin prɛ swafiŋge nunu, imi na o Tafun Nyiɛkpɔɔ na ki yo kre. 17 Kre nyjila kre, ŋunɔwifɛɛnlɛ pre lopom ŋmba na ŋunu naa kaan wre wra tɛɛ jlonwee nyu kre na. Ŋga kra pan na leele pre fiɛlɛ ma kre, pra u taanla jlonwee kre nyu na mna gbo. Pan kra pe to imi na Nyiɛkpɔɔ ndro Elisha na ki yo u pan, nyjila ŋga ni wre na ŋunu wre na sɛ Nyiɛkpɔɔ ndro Elisha pan kre. 18 Kee kre na pe to imi na Nyiɛkpɔɔ ndro wre na ki yo kre mbo, “Baŋga imi nyu mimi we bɔ e na, mbe pe mimi zaabɔtɔ nyini, na shɔlɔ zaabɔtɔ nyini shiin prɛ swafiŋge nunu Samaria jlonwee nyu na.” 19 A ŋunɔwifɛɛnlɛ lopom wre na yo Nyiɛkpɔɔ ndro wre pan mbo, “Le, hali na ki pan na Nyiɛkpɔɔ nyjeeri nyaa na krɔ nyu pe nyaa kuraa kre, kre kee ŋga wa ja mbe pe fio.” A Nyiɛkpɔɔ ndro wre na kna mna yo u pan mbo, “Mu ki nya na nyini ni, la, ka wa le mu nyuu.” 20 A imi na wra ki yo kre to, pan kra pe, a leele pre na blɔ wre taanla jlonwee nyu kre na wa, a wra ku.