Shunem Chlɔ Wre Na//Ndru Mu U Tra Ta
8
Elisha na klu mu yo Shunem chlɔ ŋmba pɔ wra ku, a wra u nyi wre pan mbo, “Ŋu na mu sele wolo e yiri e sɛ tra fɔŋgɔ nu, e sɛ tni wa chiɛri, ŋgi na hin? O Tafun Nyiɛkpɔɔ we ti mbe klo to tra ŋga nu yɛlɛ kɔɔnashin.” 2 A chlɔ wre na li Elisha nyu kee kre na, a wre na u sele wolo na yili tra kre nu mna sɛ tni Philistine leele tra nu yɛlɛ kɔɔnashin. 3 Ŋga yɛlɛ kɔɔnashin yire nyu na to kre, a wra yili Philistine leele pre tra kre nu. Ŋga wra ndru mna pan u waŋgra nu kre, a wra sɛ ŋunu wre tali mbe u ndru mbe u ŋga u katoo na u tra nyjɛ wra ti mu sɛ kre. 4 Kre nyjila ŋga ni chlɔ wre naa shie ŋunu wre pan kre, na ŋunu wre Elisha sumifun ŋmba praa yeeri Gehazi wre yeeri mna yo u pan mbo, “Kekpɔɛ nyjɛ Elisha pe pe yire yo ni pan.” 5 Ŋga Gehazi naa kee yire boo ŋunu wre pan, mna da imi wra gboo nyi na kre to, a chlɔ ŋmba pɔ wra ku, a Elisha na u nyi wre na da wa, mna pan mu ŋunu tali mbe u ŋga u katoo, na u tra kre. A Gehazi na kna mbo, “Tolɛɛ, chlɔ wre kee ni yuu na u pɔ na ku a Elisha na nyi wre wi kre.” 6 A ŋunu wre na chlɔ wre wie pɔ wre kumu kre mandiɛ kre, a wra ki bɔ ma mna soo ŋga Gehazi na yo kre na, na pan kra nyi yɛŋgɛ. Mna ndru mu u katoo kre, na u tra kre kee yo mna ya. A ŋunu wre na yo u loplombo pre wa pan mbo, “Le na mu ti mbe chlɔ ŋmba kɛ kan u yirɛ nyjɛ u ti mu sɛ yire kro na. Mu yire ŋga u yili Israel tra nu mu sɛ, swa ŋga pe ta u see yirɛ, na u tra kre ni kro, le na u kɛ we to yi na.”7 Kraa wa wa ki ble ka, a Elisha na sɛ Damascus na. Kre nyjila kre na Syria ŋunu Ben-Hadad yaa. Ŋga ŋunu wre na loo na Nyiɛkpɔɔ ndro Elisha le chia kre na kre, 8 a wra yo Hazael pan mbo, “Yirɛ yɛ cha mu sɛ Nyiɛkpɔɔ ndro Elisha ŋga, mu yo u pan na u o Tafun Nyiɛkpɔɔ wie na mbe saanla yira ŋga ni yaa ŋga nu ndee mni hin?”
9 A Hazael na sɛ Elisha pan. Ŋga wraa shie kre wra sɛ Damascus yirɛ chichiele yɛ cha mna pɔ mu taala nyuuma fuloe shiin na, mbe sɛ Elisha ŋga. Ŋga wra sɛ u nya kre, a wra yo u pan mbo, “Mu sumifun Syria ŋunu Ben-Hadad u ni tun na ni pan mbe mu wie na we saanla yira ŋga ki u gbun ŋga nu woo?” 10 A Elisha na kna mbo, “Sɛ yo u pan na, o Tafun Nyiɛkpɔɔ ki wɔ mu ni nyina na we ku, la, na mu sɛ, yo u pan na we saanla.” 11 A Elisha na nyiɛlɛ gbli na u le, wra u le chiin mna sɛ su na nyifɛɛrɛ Hazael gbo, to a yotunyi naa woni Elisha pan. 12 A Hazael na kna mbo, “Yira ŋgi ki ni tafun nyɛni ŋga hin?” A Elisha na kna mbo, “Ni chin kee sisaa ŋga mu kɔɔ taa Israel leele na. Mu kanhun le le pe chiɛ nyjɛ pe mboe sin mu fɛ mu kun yire na, mbe brɔfiɛn yiɛshiin tini mbe pe yirifumblɔ gbo, mbe pe bifimble ndrɛ frɔ tra mbe pe gbo, mbe pe siirefɛɛnlɛ lɛɛ yɔɔlɛ mbe pe biile wɔ mbe wa.” 13 A Hazael na kna mbo, “Mni mbe pe mbe jaa kre kee ŋga nyini pe hin?” Na ni n jaŋga ka ni, sumifun wi mi. A Elisha na kna mbo, “O Tafun Nyiɛkpɔɔ ki wɔ mu ni nyina na ŋu mu ŋunumu li Syria tra nu.” 14 A Hazael na yili Elisha pan wa mna ndru mu sɛ u tafun pan. A Ben-Hadad na u wie mbo, “Kee nyji Elisha yo mu pan hin?” A Hazael na kna mbo, “U yo ni pan na yaka wa mu ta, mu saanla.” 15 La, ŋga nyiŋge na se kre, a Hazael na sniyira gbigbri ka wru mna ki nyiŋge, mna ki tɛɛ mna Ŋunu Ben-Hadad yiɛ tɔ na ki ni mna sɛ su na wra ku a wra u krɔ li mna ŋunumu li.
16 Ŋga Israel ŋunu Ahab biblɔ Joram na ŋunumu li Israel na kre, ki yɛlɛ kunɔ wo na Ŋunu Jehoshaphat biblɔ Jehoram na pan mu Judah ŋunumu li. 17 Wra li yɛlɛ fulo na kɛmbɔshiin a pra chin mu u tɛɛ ŋunumu kre na, a wra tni Jerusalem na mu ŋunumu li yɛlɛ kɔɔnatarɛ. 18 Jehoram na ndikana pe mna sisam pe o Tafun Nyiɛkpɔɔ wre na. Wra sɛ Ŋunu Ahab bichlɔ wru mu leŋge, ki tia wra sisam nyjɛ Ahab sele leele, na Israel ŋulo pre na pe yire chɔɔ yɛ pe na. 19 La, o Tafun Nyiɛkpɔɔ sumifun Ŋunu David ndra na, Nyiɛkpɔɔ nsraa chaa mbe Judah leele kla. Ŋgi ndra na hin? Wra nyu yo u sumifun Ŋunu David pan na, u nɔɔ leele pie na ŋunumu lii Judah tra nu nyjila kro nu.
20 Ŋunu Jehoram nyjila Edom tra leele na yiri mna Judah leele taan, mna pre titi ŋunu tɛɛ. 21 Ki tia Ŋunu Jehoram na u sookɛɛ kro wru mna sɛ lawee ŋga praa yeeri Zair kre nu. Bawa Edom leele pre na sɛ pe fɛ mu kun. La, ŋga ndroo na lɛ kre, Jehoram na u sookɛɛ lefɛɛnlɛ pre loplombo pre na kolo cha mna fɛ mu shɔ, a u ŋunɔwifɛɛnlɛ pre na fɛ mna sɛ pe kalonyi nu. 22 Hali mu pan mu su aŋga, Edom leele pree wa mu na yiri na Judah leele taanla tɛ. Kre nyjila kre chɔɔ Libnah leele na yiri mna Judah tra kre leele taan na. 23 Ŋunu Jehoram ŋunumu kee, na kaalɛɛ nyjɛ wra pe yire kro, pra yi nyunɔ mu le Judah ŋulo fakee hlɛ nu. 24 Ŋunu Jehoram na ku, a pra u le u tolɛɛlɛ lehaa David kakpɔɔ kre na. A u biblɔ Ahaziah na u krɔ li, mna jɔɔn li.
25 Israel ŋunu Ahab biblɔ Joram na ŋunumu li Israel tra nu, ki yɛlɛ kɛmbɔshiin wo na, kre Jehoram biblɔ Ahaziah na pan mu ŋunumu li Judah tra na. 26 Ahaziah na li yɛlɛ fulo na shiin mna jɔɔn li, mna u ŋunumu li Jerusalem na yɛlɛ nunu. U lo mɛɛ naa Athaliah, a Athaliah tolɛɛ na wi Israel ŋunu Omri. 27 Ŋga Ŋunu Ahaziah na leŋge Ahab katoo kre na, ki tia sisam kee nyjɛ pra pe yire kro, wra yi yɛ pe mna o Tafun Nyiɛkpɔɔ taan.