4 A yirifuŋu Nyiɛkpɔɔ Keenyanyofun wre na yili mna sɛ Ramoth-Gilead na. 5 Ŋga wra le wa kre, na ŋunɔwifɛɛnlɛ pre loplombo pre wa mu fni titɛɛ, a wra yo mbo, “Lopom pe ni tun mu pan.” A Jehu na kna mbo, “O ŋmbi haa na mu nyi ŋga hin?” A Nyiɛkpɔɔ Keenyanyofun wre na kna mbo, “Lopom, ŋu na ni nyi.” 6 A Jehu na yiri a wre na wre na le katoo. Bawa Nyiɛkpɔɔ keenyanyofun wre na olive simi kre kna mna wo Jehu ndra na, mna kna mu yo u pan mbo, “Kee ŋga o Tafun Nyiɛkpɔɔ, Israel leele Nyiɛkpɔɔ wre yo yi kre mbo, ‘Ni simi wo mu ndra na mbe mu pe ni leele pre ŋunu. 7 Ni chaa mbe mu mu tafun Ahab katoo leele nɔɔ pɔ pei, mbe ki ti mbe ni Jezebel fɔlɔ tɔ ni sumifɛɛnlɛ na ni Keenyanyofɛɛnlɛ mblɛ wra gbo kre ndra na. 8 Ŋunu Ahab katoo leele kro nɔɔ we fun. A mbe u katoo leblɔ kro kla, mbe yire loplombo na mbe sɛ su biile na, hali mbe sɛ su u letaala na. 9 Mbe Ahab katoo kla mbe ki pe na Nebat biblɔ Jeroboam katoo kre yi, pan pie pe to na Ahijah biblɔ Baasha katoo wolo pre lɛ. 10 A Jezebel rɛ, nyikaanla pie u ka chia ŋga pe yeeri Jezreel kre na, a u kaara ka wa kro kple mbe pe ta mbe le.’” A yirifuŋu Nyiɛkpɔɔ keenyanyofun wre na krɔ nyaa mna fɛ mu yili wa.

11 Ŋga Jehu na yili mna sɛ u wolo loplombo pre nu kre, a pe nunu na u wie mbo, “Yira ŋgi tɔɔlɔfun ŋmba chaa mu pan hin? U mandiɛ tna woo?” A Jehu na kna mbo, “E u chin kee nyjɛ nyini u yuu.” 12 A pra kna mbo, “Kpra ma mu yuu o pan kre, kee ŋga u yo mu pan kre yo mbe o loo.” A Jehu na kna mbo, “Kee ŋga u yo ni pan yi kre mbo, ‘O Tafun Nyiɛkpɔɔ yo ni simi wo mu ndra na mbe mu pe Israel leele ŋunu.’” 13 A pra yiri poŋgo, na pe dodonyi woni na chaan u yiɛ taanduu yira ka na. A pra sɛ pe bnɔɛ wru na yi foo, na gble leni na yuu mbo, “Jehu wi ŋunu.”

14-15 Ŋga kra pan ma kre, Jehoshaphat biblɔ Jehu, ŋmba tolɛɛ na wi Nimshi wre naa kolo chaa mbe Ŋunu Joram gbo. Kre nyjila kre na Joram wa Jezreel na wa tɛ na uyɛ trai. Ŋga wra pra ŋunɔ Ramoth-Gilead na, nyjila ŋga ni Israel leele naa wii na Syria ŋunu Hazael ni kre. Ki tia Ŋunu Jehu na yo loplombo hamblɛ pre pan mbo, “Na e chin na mi na yire lɛ wala, kena e wa waa shia yili Ramoth-Gilead na mna, mbe sɛ kee ka yo Ŋunu Joram pan Jezreel na.” 16 A Jehu na nduu u sookaa na, mna sɛ Jezreel na, ŋgi na hin? Na Joram wa wa tɛ, a Judah ŋunu Ahaziah sɛ wa u shaari haa.

17 Ŋga Jezreel chia kre shiefun na yire nyuŋgo gedeŋge ŋga na pe yire na chia siri kre na, mna Jehu na u wifɛɛnlɛ pre nya na pe paan kre, a wra gble fɔɔri mu le mbo, “Ni ŋunɔ wifɛɛnlɛ tataara plɛ nya na pe paan.” A Joram na kna mbo, “E soo nduufun wa cha, mbe u sɛ pe fni mbe pe wie mandiɛ, na wejinyiŋge kee ni pe paan rɛ?” 18 A soo nduufun wre na yili mna sɛ Jehu fni, mna u wie mbo, “Kee ŋga tolɛɛ yo ni paan mu wie yi kre mbo, ‘Wejinyiŋge kee na e paan woo?’” A Jehu na kna mbo, “Na wejinyiŋge kee na o paan, ŋu wo yi ŋgi hin? Pan mu chaa ni ŋunɔ wifɛɛnlɛ pre nu mu taa ni kro.” A chia shiefun wre na yo ŋunu wre pan mbo, “Tolɛɛ, ni bituŋu wre nya a u da leele pre na, la, u n ndru na paan.” 19 A ŋunu wre na ndru mna soo nduufun wa tun na. Ŋga wra da pe na kre, a wra yo pe pan mbo, “Tolɛɛ yo ni paan e wie mbo, ‘Wejinyiŋge kee ni e paan woo?’” A Jehu na kna mbo, “Na wejinyiŋge kee ni o paan, ŋu wo yi ŋgi hin? Pan mu chaa ni leele pre nu mu taa ni kro.” 20 A chia shiefun wre na sɛ mandiɛ bɔ ŋunu pan mbo, “Ni soo nduufun wre nya a u da pe na, la, u n ndru mu na paan ya. La, leele pre yɛklo wre pe na Jehu wi, a u tni u sookaa na mu na paan na tɔɔlɔfun wi.”

21 A Joram na kna mbo, “E ni sookaa kre san e ni ŋga.” A pra u san mu u ŋga, wra nduu u wo na, a Judah ŋunu Ahaziah na nduu u wo na, a pra yili mna sɛ Jehu fnihaa. Pra sɛ u fni Jezreel ndro Naboth tra kre nu. 22 Ŋga Joram na Jehu nya kre, a wra u wie mbo, “Jehu, wejinyiŋge kee ni mu paan woo?” A Jehu na kna mbo, “Ŋga mu lo Jezebel tia ndro kro na u sɛɛn sumiɛ, na u tiprɛm kee yire pini ŋga, mni wejinyiŋge we pee pan hin?” 23 A Joram na kna mu yo Ahaziah pan mbo, “Pan mbe o sɛ, denyjuufun wi.” A Joram na krɔ kna mbra fɛ mbe shɔ. 24 Titɛɛ kre nu, a Jehu na u snimi tini mu foli, mna Joram ŋu na ki ni na u faŋga kro ni, a kra sɛ to u patia haa mna u loloŋgo su, a wra to mu juule u sookaa kre nu mna ku. 25-26 A Jehu na yo u sookaa nduufun lopom Bidkar pan mbo, “Sɛ u yii mu viŋge mu wa Jezreel ndro Naboth wre tra kre nu. Mu sɔɔnri na mi na ŋu na da mna sookɛɛ nduu mnaa Joram lɛ Ahab kɔŋgɔ ninii? Kre nyjila kre o Tafun Nyiɛkpɔɔ na kre kee ŋga ki pe ŋga yo Ahab pan mbo, ‘Tra ŋga nu mu Naboth na u biile gbo mu wa ŋga nu chɔɔ pie kɔɔ mu gbo mbe wa na.’ Kena u viŋge mu wa kre tra kre nu imi na o Tafun Nyiɛkpɔɔ na ki yo kre.”

27 Ŋga Judah ŋunu Ahaziah na kee ŋga kra pe kre nya ma kre, a wraa feni na shie chia ŋga praa yeeri Beth-Haggan kre na. A Jehu naa u kɔŋgɔ nini na gble leni na yuu u leele pre pan mbo, “E u gbo na.” A pra u ŋu snimi ni mna u pra u sookaa kre na. Kolo ŋga kra sɛ Gur ŋga kra mbra chia ŋga pe yeeri Ibleam na kre wra yii na shie. La, wra ja mna shɔ pe pan mna sɛ le Megiddo na, mna chin mu ku wa. 28 A u sumifɛɛnlɛ pre na u wru mna taa u sookaa na mna sɛ na u ni Jerusalem na, mna sɛ u le u tolɛɛlɛ lehaa David chia kre na.

29 Ŋga Ahab biblɔ Joram na jɔɔn li Israel na kre, ki yɛlɛ kɛmbɔnunu wo na, kre Ahaziah na ŋunumu li Judah tra nu.

30 Kre nyjila kre Jehu na sɛ Jezreel na. Ŋga Jezebel na loo na Jehu paan chia kre na kre, a wra sɛ u nyisin kan kan tuwe ni, mna u ndra nyjure gbeele mu pɔ, mna sɛ yiɛ le tokro nu na jle. 31 Ŋga Jehu naa lee chia kre na to, a Jezebel na fuu u na mbo, “Zimri, linkufun ŋmba mu mu tafun gbo, yira ŋgi mu chaa mna hin?”^a 32 A Jehu na yiɛ yire mna fuu mbo, “Ŋmbi uu wa ni kro hin?” Na ŋunu katoo wa leele mblɛ pe san pre plɛ yiɛ wɔ tokro nu na u le, 33 a Jehu na kna mu yo pe pan mbo, “E chlɔ ŋmba wɔ e wa tra.” A pra u yii mna u wɔ mu wa tra. A Jehu soolo pre na u taanla mu mbra tra, a u nyimi yɛ na nyina mna wo mboo mbɛɛ kre na, a yɛ na soolo pre mana. 34 A Jehu na yiɛ wɔ mna sɛ tni mna li, mu gbɔ. Ŋga wra kɔ kre, a wra kna mu yo u leele pre pan mbo, “E sɛ chlɔ ŋmba pe sun wre wru e sɛ le, ŋgi na hin? Ŋunu bichlɔ wi.” 35 La, ŋga pra sɛ u wru mbe sɛ le kre, na u ndra kajle, na u jewrɛ kajle, na u kɛnyi kajle chiin yi kro wa. 36 A leele pre na ndru mna sɛ mandiɛ bɔ Jehu pan, a wra kna mu yo pe pan mbo, “Pan kee ŋga o Tafun Nyiɛkpɔɔ na yire u sumifun Elijah Tishbe ndro wre na mna yo kre na nyina na, ‘Jezreel tra nu nyikaanla we Jezebel kaara ka. 37 A Jezebel gboo we pe na kafuŋgo yira yi Jezreel tra nu, a ndro wa u sembremu chin.’”