Jehu Na Ahab Nɔɔ Leele Gbo
10
Ŋunu Ahab nɔɔ leele fuloe taarɛ na kɛ praa wa Samaria na. A Jehu na hlɛ nyunɔ mna sɛ Samaria na, mna sɛ Jezreel ŋulo, na loplombo mblɛ kɛɛ Ahab nanae na nyi pre ŋga mbo, 2 “Yire kɛɛ Ŋunu Ahab nanae pre nyi, a soolo, na sookɛɛ, na wiyirɛ wa e pan, a pe mboe sin mu e kakpɔɛ fɛ mu kun, kena na e kɛ waa kan ni hlɛ nyjɛ na, 3 mbe e Ŋunu Ahab nanae pre ŋmba u nyu mu fna wɔ mbe u tɛɛ u tolɛɛ ŋujɔɔn kre na, mbe e eyɛ kna mbe wi mbe u ŋga.” 4 Ŋga Samaria ŋulo pre kɛ na to hlɛ yire na kre, fiɛrɛ kpɔɔ na pe yii, a praa yuu peyɛ pan mbo, “Ŋunu Joram, na Ŋunu Ahaziah kuraa nsra ja mna yire Jehu yiɛ, kena ŋgi wre we ja mbe pe hin?” 5 Kra tia lopom ŋmba wraa ŋunu katoo kre le wre, na chia kre lefun lopom wre, na chia kre loplombo pre plɛ, na Ŋunu Ahab nanae pre pɔɔrifɛɛnlɛ pre na ndro tun Jehu pan mbo, “Mu sumifɛɛnlɛ lɛ wre, a kee ŋga mu yo o pe kpan, kre oo pe. Waa ja mbe ndro wa wɔ na mbe u pe ŋunu, kena kee ŋga ki tna mu pan kro pe.” 6 A Jehu na ndru mna pe nyunɔ hlɛ shiinwo mna yo pe pan mbo, “Na e chin na ee wa ni kro, a ee li ni nyu kee na wala, kena e Ahab nanae pre ndrɛ klɔ e pan na yi ni e ni ŋga Jezreel na mna baŋga imi nyu.” Kre nyjila kre na Ŋunu Ahab nanae fuloe taarɛ na kɛ pee wa mu tni tni chia kre loplombo titie plɛ pan praa pe poorii. 7 Ŋga Samaria leele pre na Ŋunu Jehu hlɛ shiinwo kre tɔɔnri mu kɔ kre, a pra sɛ Ahab nanae pre kro yii mna pe ndrɛ klɔ mu le kakɛɛ nu mna sɛ Ŋunu Jehu ŋga yi yi Jezreel na. 8 Bituŋu ŋmba wra pan na yi ni wre na sɛ mandiɛ bɔ Ŋunu Jehu pan mbo, “O pan na Ahab nanae pre ndrɛ yire ni.” A Jehu na yo mbo, “E sɛ yi ble titɛɛ shiin chia kre jlonwee nyu na wa mbe nyiŋge yi se.” 9 Ŋga nyiŋge na se bnimi kre, a Jehu na sɛ yire leele pre kro yiɛ na mna yo mbo, “Mi ndaa kolo cha mna ni tafun Ŋunu Joram gbo, e n pimi ka li kre kee kre na. La, mblɛ haa pe Ahab nanae mblɛ gbo hin? 10 E loo ni pan, kee nyjɛ o Tafun Nyiɛkpɔɔ na yo mu wru Ahab nɔɔ leele haa kro we pe ma. Kee ŋga o Tafun Nyiɛkpɔɔ na yire u sumifun Elijah na mu yo kre pe ma aŋga.” 11 A Jehu na Ŋunu Ahab nɔɔ leele hamblɛ mblɛ pra kro Jezreel na pre gbo pei, pre na u loplombo, u nɔɔlɔ mblɛ praa mbra u na, na u sɛɛn pɛɛrifɛɛnlɛ pre kro ni, ndro nunu kuraa nsra kro pe nu.12-13 Ŋga wra kɔ kre, a wra yili Jezreel na mna yiɛ le Samaria na. Ŋga wraa shie kre, wra Judah ŋunu Ahaziah sele leele plɛ fni lawee ŋga nu mbaala lefɛɛnlɛ naa shie na fni, a praa ki yeeri Beth-Eked kre nu. A wra pe wie mbo, “Yire lɛ mblɛ hin?” A pra kna mbo, “Ŋunu Ahaziah sele wolo lɛ wre, a o na shie Jezreel na mbe sɛ ŋuchlɔ Jezebel biile, na lebiile hamblɛ pre shaari.” 14 A Ŋunu Jehu na yo u leele pre pan mbo, “E pe yii.” A pra pe yii, na pee leele fuloe shiin na shiin, mna pe gbo Beth-Eked kɔlɔ kre mbɛɛ na wa. U nsra tia pra pe nunu chom kuraa ti.
15 Ŋga Ŋunu Jehu na yili wa na shie kre, wra sɛ Recab biblɔ Jehonadab wre fni kolo, na u paan u fni haa. A Jehu na u shaari mna u wie mbo, “Mi na ŋu jawala nunu ree mni hin?” A wra kna mbo, “Ɛnhɛɛn, nii wa mu kro.” A Jehu na kna mbo, “Kena kɛ shɔ ni pan.” A pra kɛnyi shɔ peyɛ pan, a Jehu na ya u na a wra nduu mna pan mu tni u sookaa kre nu ka. 16 A Jehu na kna mbo, “Ti mbe mi na ŋu sɛ mbe mu sɛ le imi na ni yiɛ nyina o Tafun Nyiɛkpɔɔ kee na mu da.” A pe kro na tni u sookaa kre nu mna sɛ. 17 Ŋga Jehu na le Samaria na kre, wra tia pra Ŋunu Ahab sele leele mblɛ pra kro wa kre gbo pei, wra pe kla pei imi na O Tafun Nyiɛkpɔɔ na ki yo Elijah pan kre.
Ŋunu Jehu Na Baal Sɛɛn//Sumifɛɛnlɛ Pre Gbo Pei
18 A Ŋunu Jehu na tia pra chia kre leele pre kro yeeri mna pan mu fni, a wra yo pe pan mbo, “Ŋunu Ahab na Baal sɛɛn kre sumi chiɛri, la, mi we ki sumi kpɔɔ. 19 Kena e Baal chlɛfɛɛnlɛ, na ki pɛɛrifɛɛnlɛ, na ki loplombo pre kro yeeri mbe pe pan mbe fni. E le na yaa ti wa kro haka. Ŋgi na hin? Ni paan mbe sra kpɔɔ wɔ mbe Baal ŋga. Pe ŋmba u n shia ka pan kpan, wa uyɛ ndra ta.” La, fana Ŋunu Jehu naa pe fana, Baal sumifɛɛnlɛ pre wraa chaa mbe gbo. 20 A Jehu na yo pe pan mbo, “E ble ka le, e ki kpali mbe o kro fni mbe Baal sumi.” A pra ble kre le, mna ki kpali mu tro. 21 A Ŋunu Jehu na kɛ wa mna leele kro yeeri Israel tra nu. A kra tia Baal sumifɛɛnlɛ pre kro na pan mu fni, pe nunu chom nsra kro. Pe kro na pan mna sɛɛn Baal nyuŋgo kre nyi. 22 A Ŋunu Jehu na yo lopom ŋmba wraa sɛɛn pɛɛrifɛɛnlɛ pre dodonyi le wre pan na u pe kro ŋga sɛɛn dodonyi yire mbe pe le. A wra pe kro ŋga yɛ a pra le le. 23 A Ŋunu Jehu, na Recab biblɔ Jehonadab na sɛ le sɛɛn nyuŋgo wa, a Jehu na yo sɛɛn pɛɛrifɛɛnlɛ pre pan mbo, “E kna e eyɛ le le, yaashia ti mbe Nyiɛkpɔɔ sumifɛɛnlɛ pre wa chaa e nu, yire Baal sumifɛɛnlɛ pre chiin ni chaa mna.”
24 A pra nɔɔhle na yurɛ sroi na sra woni na sɛɛn Baal kre kaan nyuŋgo wa. Kre nyjila kre, na Jehu leele fuloe jijirɛ wɔ mu tɛɛ sɛɛn nyuŋgo kre krɔ, mna pe jaari na, “Na e wa waa tia leele mblɛ sɛɛn nyuŋgo ŋga nu ŋga wa waa yili mu shɔ, u fun wa uyɛ ndra ta.” 25 Ŋga Ŋunu Jehu na yurɛ sroo sra kre wɔ mu kɔ kre, a wra yo leele mblɛ wra wɔ mu tɛɛ fimi na pre, na u loplombo pre pan mbo, “E le nyuŋgo wa, e leele pre gbo peii, yaashia ti mbe ndro nunu chom kolo ta mbe yili.” A pra brɔfiɛn yiɛshiin tɛɛ mna pe gbo peii, mna gboolo pre tini mna yili fimi na. Mna ndru mu sɛ le sɛɛn kre nyuŋgo-too wa, 26 mna sɛ Baal sɛɛn kre titi wru mna yili fimi na, mna ki sro. 27 Mna ki dnɛ ŋga praa peerii kre gbun mu juari. Mna ndru mu sɛɛn nyuŋgo kre juari mu wo. Mu yire kre nyjila kre mu pan mu su aŋga na, bawa leele shie kaan na.
28 Pan kra le a Ŋunu Jehu na tia pra Baal sɛɛn kre sumiɛ ti Israel tra nu. 29 Ande u nsra ja mu laa Nebat biblɔ Jeroboam sisam kee nyjɛ wra tia Israel leele naa pini mnaa swanyiɛ nuu pɔ sumi Bethel, na Dan na yire kro.
30 Yire kee nyjɛ krɛrɛ kɔkro, o Tafun Nyiɛkpɔɔ na yo Jehu pan mbo, “Mu ka pe na mu ja mu kee ŋga ni chaa mbe mu pe Ahab nanae na kro pe. Ki tia mbe ti mbe mu nɔɔ leele Israel jɔɔn li mbe yire mu biile na, mbe sɛ su mu nanae, na mu nana jelijae na, mbe sɛ su pre kro biile na.” 31 La, Jehu nsra lɛɛ wɔ mna li o Tafun, Israel Nyiɛkpɔɔ wre kee nyjɛ wra yo u pan yire kro na. U nsra laa Jeroboam sisam kee nyjɛ wra tia Israel leele naa pini yire kro.
32 Kre nyjila kre nu o Tafun Nyiɛkpɔɔ na tia Syria ŋunu Hazael na sɛ wi na Israel leele ni mna pe ja, mna pe tra kre ka shɔ, a ka na kun pe tra kre na. 33 Wra wi mna Jordan Lɔɔ kre yilafinhaa kre shɔ, mna sɛ su chia ŋga praa yeeri Aroer a kra mbra Arnon lɔɔ na kre na. Gilead na Bashan trɛ yire kro na chaa, a bawa Gad, na Reuben, na Manasseh sele yire na nyi fa. 34 Ŋga Jehu na ŋunumu li kre, kee nyjɛ wra pe yire kro, pra yi nyunɔ mu le hlɛ ŋga nu praa Israel ŋulo fakee nyunɔi na teeri kre nu. 35 Jehu na ku, a pra u le Samaria na, a u biblɔ Jehoahaz na u krɔ li, mna ŋunumu li. 36 Jehu na tni Samaria na mna ŋunumu li Israel na yɛlɛ fulo na kɔɔnatarɛ.