Judah Ŋuchlɔ Athaliah
11
Ŋga Athaliah na nya na u biblɔ Ahaziah ku kre, wra u jawala pe na we lebiile mblɛ pie jaa jɔɔn li kre gbo kro. 2 Ŋga kra pan ma kre, Ŋunu Jehoram bichlɔ Jehosheba ŋmba na wi Ahaziah jaa wre, na Ahaziah biblɔ Joash wru, mna sɛ u ndra sni nyuŋgo ka nu mna lefun cha u na, imi kie pe mbe Athaliah wa u ta mbe gbo. 3 Wra pɔ wre na u lefun wre ndra Suminyuŋgo wa mna sɛ su yɛlɛ kɔɔnanu, ki nyjila kre krɛrɛ na Athaliah wi ŋuchlɔ ŋmba wraa waŋgra kre le.4 La, yɛlɛ kɔɔnashin wo na kre, srawɔfun Jehoiada na leele tun ŋunu shiefɛɛnlɛ loplombo pre pan, na pe pan u pan o Tafun Nyiɛkpɔɔ Suminyuŋgo wa. Bawa wra tia pra da mna u ŋga, na pie ya u na kee ŋga u chaa mbe pe kre na. A wra pe nyina Ŋunu Ahaziah biblɔ Joash wre, 5 mna yo pe pan mbo, “Kee ŋga ni chaa mbe e pe yi kre, na e waa pan tnumu nu Wuuble, e eyɛ yɔ taarɛ, mbe yɔm nunu sɛ ŋunu katoo kre shie, 6 mbe yɔmu nunu sɛ shie jlonwee nyu ŋga pe yeeri Sur kre na, mbe yɔmu nunu haŋa kre sɛ shiefɛɛnlɛ mblɛ pe yire ŋunu katoo jlonwee nyu na pre shɔ. 7 A feko shiin mblɛ pia na sɛ tnumu nu Wuuble kre, ni chaa mbe pe pan tnumu nu mbe paan Ŋunu Joash shie Suminyuŋgo wa. 8 E le na ee Ŋunu Joash shie. Mna we tro kpan e taa u kro. E e ŋunɔwiyirɛ wru e yii kɛɛ. Ndro ŋmba we da u na kpan e ufun gbo.”
9 Lawee shiefɛɛnlɛ pre loplombo pre na li srawɔfun Jehoiada nyu kee kre na. Loplombo pre na mblɛ praa wa pe tapan pre kro yeeri. Pe mblɛ praa shie tnumu nu Wuuble, na mblɛ pe nsraa shie tnumu nu Wuuble pre kro na pan srawɔfun Jehoiada pan. 10 A wra pe loplombo pre ŋga chomboolo, na ŋunɔwiyirɛ nyjɛ David naa teeri na wii, a yiraa wa mu tni o Tafun Nyiɛkpɔɔ Suminyuŋgo wa kre. 11 Shiefɛɛnlɛ pre kro naa wa na pe ŋunɔwiyirɛ ni kɛɛ, mu mbra Suminyuŋgo kre, na sragbunu kre na, mna Ŋunu Joash fɛ mu kun na u sri. 12 A Jehoiada na sɛ Joash wɔ fimi na, mna u le ŋujuulee, mna u ŋga Mbra a nyjɛ ni pe ŋunumu lii hlɛ yire ka. Mna olive simi kna mna wo u ndra na, mbe ki nyina na fuŋga rɛ ŋunu wi, a leele mblɛ pra fni wa pre naa gble leni, na kɛnyi koori na yuu mbo, “Nyiɛkpɔɔ we ŋunu ndra tun tɔɔnrɔ.”
13 Ŋga ŋuchlɔ Athaliah na lawee shiefɛɛnlɛ pre, na lenɛɛmu pre gble kre loo kre, a wra sɛ leele pre pan Suminyuŋgo lawee wa. 14 Bawa wra Ŋunu Joash nya na uu wa mu yire pilaasi yire ka jaara Suminyuŋgo kre jlonwee nyu na, imi na pe paala nyina na ki fna mbe ŋunu pe kre. A lawee shiefɛɛnlɛ pre, na bnɔ fɔfɛɛnlɛ pre fɛ mu u kun, na bnɔ fɔɔ, na yɛshɔɔrɔ lii. A ŋuchlɔ Athaliah na krɔkuɔn tɛɛ mna u dodonyi tini mu wla uyɛ na, mna fuu mbo, “Leele wɔŋgafɛɛnlɛ, e ni wɔ mu ŋga.”
15 A srawɔfun Jehoiada na yo ŋunɔwifɛɛnlɛ loplombo pre pan mbo, “E u yii e yili ŋunɔ wifɛɛnlɛ pre nu, e sɛ u gbo, la, yaa shia u gbo o Tafun Nyiɛkpɔɔ Suminyuŋgo kre lawee. A ndro ŋmba we na chaa mbe u shɔ e kɛɛ kpan, e u gbo e ya.” 16 A pra ŋuchlɔ Athaliah yii, mna sɛ na u ni lawee ŋga nu praa tro na soolo ni na lee ŋunu katoo wa kre nu, mna u gbo wa.
17 Bawa srawɔfun Jehoiada na tia Ŋunu Joash na leele pre kro na yira ka, mu yo o Tafun Nyiɛkpɔɔ wre pan na, pie pe u wolo. A wra ndru mna tia Ŋunu Joash na leele pre na yira ka, mu le peyɛ lalaa. 18 A tra kre leele pre kro na sɛ sɛɛn Baal nyuŋgo, mna sɛ ki gbun mu juari. Pra sɛɛnlɛ, na sragbuɛnlɛɛ nyjɛ yiraa wa wa yire kro juari, mna Baal pɛɛrifun Mattan wre gbo sɛɛn sragbuɛnlɛɛ yire yiɛ. Jehoiada na leele wɔ mu tɛɛ, a praa o Tafun Nyiɛkpɔɔ Suminyuŋgo kre sri. 19 A wre na ŋunɔwifɛɛnlɛ loplombo pre, na lawee shiefɛɛnlɛ pre loplombo pre, na ŋunu katoo shiefɛɛnlɛ pre, na leele pre kro na taa ŋunu kro mna sɛ na u ni ŋunu katoo wa. Jlonwee ŋga nyu na lawee shiefɛɛnlɛ pre na nyi mu yire kre nu Ŋunu Joash na tro mna le ŋunu katoo wa, mna sɛ tni u ŋujɔɔn na. 20 A tra kre leele kro yiɛ na shɔ. A kakpɔɔ kre na ku dimm, ŋga pra ŋuchlɔ Athaliah gbo brɔfiɛn yiɛshiin ni ŋunu katoo wa kre ndra na.
21 Ŋga Ŋunu Joash na ŋunumu li kre, na u li yɛlɛ kɔɔnashin.