4 Ki ble ka, a Joash na yo srawɔfɛɛnlɛ pre pan mbo, “E swa nyjɛ ni pe paan na sra woni Suminyuŋgo wa, na leele tɔɔnrɔɔ swa nyjɛ pe woni, na tɔɔ nyjɛ pe toni yire, na swa nyjɛ leele pre titi woni pe chaara nu kre, e yi shɔ e pan. 5 Srawɔfɛɛnlɛ pre kro pe yire swɛ yire shɔ yi tɛɛfɛɛnlɛ pre pan mbe pan na yi ni, mbe ni yi tɛɛn mbe Suminyuŋgo kre lawee nyjɛ yi kla kla kre gbeele.” 6 La, Ŋunu Joash na li jɔɔn kre na yɛlɛ fulo na taarɛ, na srawɔfɛɛnlɛ pre n ja mu Suminyuŋgo kre gbeele tun. 7 Ki tia Ŋunu Joash na kɛ wa mna srawɔfun Jehoiada, na srawɔfɛɛnlɛ hamblɛ pre yeeri mna pe wie mbo, “Yira ŋgi ki tia e n na Suminyuŋgo kre lawee nyjɛ yi kla kre gbeele hin? Mu yire aŋga na shie yaashia swa nyjɛ yii wa e pan yire tɛɛ na, e pan na yi ni mbe pe yi tɛɛ mbe Suminyuŋgo kre gbeele.” 8 Srawɔfɛɛnlɛ pre na ki nɔɔloo na pia yire swɛ yire shɔ na, mna ki nɔɔ loo na pre titi wa yiɛklu Suminyuŋgo kre gbeele na na.

9 A Jehoiada na daka cha, mna wee vru ki nyutɔŋgɔ kre ndra na, mna ki tɛɛ mu mbra sragbunu kre na, na ndro le o Tafun Nyiɛkpɔɔ Suminyuŋgo wa to, kraa wa na shie kalie haa. A srawɔfɛɛnlɛ mblɛ praa Suminyuŋgo kre nyu sri pre na shie na swɛ nyjɛ praa shio Suminyuŋgo wa kre leni daka kre nu. 10 Na pe nya na swa kre nɛɛ daka kre nu kre, kena ŋunu katoo nyunɔfun, na srawɔfun lopom titi wre sɛ ki kna mbe ki tɔɔnri, mbe ki le bɔtɔe nu, 11 mbe sɛ na ki ni mbe sɛ leele mblɛ pe wɔ a pe yiɛklu pra Suminyuŋgo kre gbeele pre ŋga. Kre swa kre ni pra tɛɛ na leele mblɛ praa o Tafun Nyiɛkpɔɔ Suminyuŋgo kre gbeele pre fɔlɔ toni, kapintae, na nyinyi sinfɛɛnlɛ pre, 12 na dnɛ tɛfɛɛnlɛ pre kro. Pra swa kre ka tɛɛ mna kɛɛn, na dnɛ tɛwee yire lɔ, mbe pe yi tɛɛ mbe Suminyuŋgo kre gbeele, mna ka tɛɛ mna yirɛ bɛɛlɛ nyjɛ pra lɔ lɔ yire kro fɔlɔ tɔ.

13 Swa nyjɛ ni pra pan Suminyuŋgo wa kre, pe nsra yi tɛɛ mna swafinyi yirɛ nyjɛ ni praa nyumu leni yire, na kanhun fiiyirɛ, na kotie nyjɛ nu praa nyumu leni, na bnɔɛ, ndee mna ka tɛɛ mna swanyiɛ yirɛ, ndee swafinyi yirɛ yɛ pe mu tɛɛ o Tafun Nyiɛkpɔɔ Suminyuŋgo wa. 14 Leele mblɛ praa Suminyuŋgo kre gbeele pre fɔlɔ praa toni na ki ni, na ka teeri na yirɛ nyjɛ ni pe Sumindoo kre gbeele kre loni. 15 Leele mblɛ kɛɛ pra swa kre le a praa tnumu tunfɛɛnlɛ pre fɔlɔ toni kre, pe nsra tia praa swa kre kuntaa pini. Ŋgi na hin? Kpra ni praa tnumu kre tuni. 16 Swɛ nyjɛ ni praa pimi, na sisam sra woni yire, pe nsraa paan na yire ni Suminyuŋgo wa. Srawɔfɛɛnlɛ pre wee na yi yire.

17 Kre nyjila kre nu chɔɔ, Syria ŋunu Hazael na pan mna wi na Gath leele ni mna pe ja, mna yiri wa mbe sɛ wi na Jerusalem leele ni. 18 La, Judah ŋunu Joash na yirɛ nyjɛ ni pra tɛɛ mna sra wɔ mna o Tafun Nyiɛkpɔɔ ŋga u nyjila, na u tolɛɛlɛ Jehoshaphat, na Jehoram na Ahaziah nyjila, na swanyiɛ nyjɛ yiraa wa Suminyuŋgo wa kre, na ŋunu katoo wa kre kro, wra yi koli, mna sɛ Hazael ŋga yi yi. Ŋga wra yi shɔ kre, a wra tia u ŋunɔwifɛɛnlɛ pre na yili Jerusalem na.

19 Ŋunu Joash kaalɛɛ nyjɛ wra pe yire krɛrɛ, pra yi nyunɔ mu le Judah ŋulo fakee hlɛ yire nu. 20 Ŋunu Joash loplombo na nyu le u na, mna u gbo Beth-Millo na, kolo ŋga kraa wa na shie Silla na kre na. 21 U loplombo mblɛ pra u gbo pre na lɛ, Shimeath biblɔ Jozabad, na Shomer biblɔ Jehozabad. Ŋga wra ku kre, a pra sɛ u le, David chia kre na. A u biblɔ Amaziah na u krɔ li mna ŋunumu kre li.