Israel Ŋunu Jehoahaz
13
Ŋga Ahaziah biblɔ Joash na ŋunumu li Judah na kre, ki yɛlɛ fulo na taarɛ, kre Jehu biblɔ Johoahaz na Israel ŋunumu li, mna tni Samaria na yɛlɛ kɛmbɔkɔɔnashin. 2 Johoahaz na sisam pe o Tafun Nyiɛkpɔɔ yiɛ na. Sisam kee nyjɛ Nebat biblɔ Ŋunu Jeroboam na tia Israel leele na pe yire chɔɔ wraa piin. 3 Kra tia o Tafun Nyiɛkpɔɔ krɔ na kun na Israel leele ni, a wra tia Syria ŋunu Hazael, na u biblɔ Ben-Hadad na jaŋga li Israel leele pre na nyjila tataara nu. 4 Ŋga kra pan ma kre, Jehoahaz na nyɛni mna o Tafun Nyiɛkpɔɔ yeeri, a o Tafun Nyiɛkpɔɔ na loo u pan. Ŋgi na hin? Wra nya imi Syria ŋunu wre naa Israel leele pre fiŋge kpɔɔ. 5 O Tafun Nyiɛkpɔɔ wre na shɔfun wa wɔ mna Israel leele pre ŋga, a wra pe shɔ mna yili Syria ŋunu wre kɛɛ. Kra tia Israel leele pre na pe kalonyi ta mna tni, imi na pra nyi mu tni fa kre. 6 La, pe nsra laa pe sisam kee nyjɛ Ŋunu Jeroboam na tia praa pini yire kro, yire sisam yire chɔɔ pra kro na pini. A sɛɛn chlɔ Asherah kaan ŋga pra kan Samaria na kre na kro mu kan wa. 7 Ŋunu Hazael na wi mna Israel ŋunɔ wifɛɛnlɛ pre ja, ki tia Jehoahaz sookɛɛ kɛ, na ŋunɔ wifɛɛnlɛ mblɛ pe nyaari tra kagbenyi kɛ, na soolo nduufɛɛnlɛ fuloe shiin na kɛ, pre chiin pra kro, hamblɛ pre krɛrɛ wra pe pe na tablɔ yi. 8 Ŋunu Jehoahaz kaalɛɛ hɛnyi yire krɛrɛ, na gbuntitirem kee nyjɛ wra pe yire kro, pra yi nyunɔ mu le hlɛ ŋga nu pra Israel ŋulo fakee nyunɔ mu tɛɛ kre nu. 9 Ŋunu Jehoahaz na ku, a pra u le Samaria na. A u biblɔ Jehoash na u krɔ li, mna ŋunumu li.10 Ŋga Judah ŋunu Joash na ŋunumu li, ki yɛlɛ fulo na kɛmbɔkɔɔnashin wo na, kre Jehoahaz biblɔ Jehoash na Israel ŋunumu li Samaria na. Wra tni jɔɔn kre na yɛlɛ kɛmbɔkɔɔnanu. 11 Wra sisam kee pe o Tafun Nyiɛkpɔɔ yiɛ. U nsra laa sisam kee nyjɛ Nebat biblɔ Jeroboam na tia Israel leele na pe yire kro. Yire chɔɔ wra kro na pini.
12 Ŋunu Jehoash kee nyjɛ wra pe yire hɛnyi kro, na gbuntitirem kaalɛɛ nyjɛ wra pe yire kro, na ŋunɔ ŋga wra wi na Judah ŋunu Amaziah ni yire kro, pra yi nyunɔ mu le Israel ŋulo fakee hlɛ yire nu mu tɛɛ. 13 Jehoash na ku, a pra u le lebiile lehaa Samaria na, a u biblɔ Jeroboam a na u krɔ li, mna ŋunumu li.
Elisha Kumu
14 Ŋga Ŋunu Jehoash nsra ta mu ku kre, Nyiɛkpɔɔ keenyanyofun Elisha na yaa mbe ku. A Israel ŋunu Jehoash na sɛ yire u jaara na nyɛni na yuu mbo, “Ni tafun, na mu n wa mni Israel wifɛɛnlɛ, na pe sookɛɛ we pe hin?” 15 A Elisha na kna mbo, “Bɛŋɛ na snimi cha mu pan.” A wra sɛ yi cha mu pan. 16 A Elisha na yo Israel ŋunu wre pan mbo, “Bɛŋɛ kre wru mu yii kɛɛ.” Ŋga wra ki wru mu yii kre, a Elisha na kɛ kna mu taa ŋunu wre kɛ na, 17 mna kna mu yo u pan mbo, “Tokro ŋga ki shie yila finhaa kre nyaa.” A ŋunu wre na ki nyaa. A Elisha na yo mbo, “Snimi kre ŋu.” A wra ki ŋu. A Elisha na kna mbo, “Kre snimi ŋga, ki pe sɛmbɛɛrɛ yira na o Tafun Nyiɛkpɔɔ wre we ya mu na mbe mu wi na Syria ŋunɔ wifɛɛnlɛ ni mbe pe ja Aphek na.”
18 A Elisha na yo ŋunu wre pan mbo, “Snimi yire wru mu tra yiɛ fɔɔri na yi ni.” A ŋunu wre na yi wru mna tra yiɛ fɔɔri na yi ni gbee taarɛ mna ti ma. 19 Elisha krɔ na kun na ŋunu wre ni, a wra kna mu yo u pan mbo, “Na mna tra yiɛ fɔɔri na yi ni gbee kunɔ, ndee kɔɔnanu, mu na wi na Syria leele ni mbra pe nɔɔ pɔ kro. La, imi na ki pe ŋga, gbee taara mu wi na pe ni mbe pe ja.”
20 Kee nyjɛ kɔkro kre, Elisha na ku a pra u le. Kre nyjila kre nu, yɛlɛ nyini kpan Moab leele naa paan na Israel leele toni yirɛ luu nyjila. 21 Ki ble ka Israel leele pre ndro wa na ku a pra sɛ na gboo wre leni, ŋga pie nya na Moab leele mblɛ pe paan na pe toni pre plɛɛ mblɛ pe paan, a pra gboo wre viŋge mna wa faŋga ŋga nu pra Elisha le kre nu. Ŋga gboo wre na sɛ gbun Elisha kajle na to, mna nyi, mu yiri mu yire.
22 Syria ŋunu Hazael na Israel leele pre fiŋge Ŋunu Jehoahaz nyjila. 23 La, o Tafun Nyiɛkpɔɔ na pe dumi, mna pe fooro le, mna yiɛ kna pe na, ŋgi na hin? Nyu nunu ŋga wre na Abraham, na Isaac, na Jacob na pe kre ndra na, hali mu pan mu su aŋga na, ki n tna u pan na we pe kla, ndee mbe pe ni mbe flo u yiɛ.