Judah Ŋunu Amaziah
14
Ŋga Israel ŋunu Jehoahaz biblɔ Jehoash na pan mu jɔɔn li, ki yɛlɛ shiinwo na, Judah ŋunu Joash biblɔ Amaziah na pan mu jɔɔn li Judah tra nu. 2 Wra li yɛlɛ fulo na kunɔ a pra chin mu u tɛɛ ŋunumu kre na. A wra tni Jerusalem na mna ŋunumu kre li yɛlɛ fulo na kɔɔnanyjirɛ. U lo mɛɛ naa Jehoaddin, a wra yiri Jerusalem na. 3 Wra kee nyjɛ yira fraka o Tafun Nyiɛkpɔɔ yiɛ na pe, la, u nsra da na u tolɛɛ David ni. Kaalɛɛ nyjɛ u lɛ Joash na pe yire to, yire na wra taa. 4 Amaziah nsra sumi lawee nyjɛ pra sin nyambie ndrɛ na yire juari mna wo, kra tia leele pre naa shie na sra woni, na tuwe ndiom tɛɛn sroi wa tɛ.5 Ŋga jaŋga kre na to Amaziah kɛɛ kre, wra tia pra u loplombo mblɛ pra u lɛ gbo pre yii mna pe gbo. 6 O Tafun Nyiɛkpɔɔ mbra nyjɛ wra yire Moses na mna le pe pan yire ndra na, u nsra tia pra loplombo pre biile pre gbo ka. Mbra yire na nyina na, “Na lɛɛlɛ plɛ sisaa ka pe, a ki fna mbe pe pe gbo kre, ki n fna mbe pe pe biile gbo ka. A na biile pe sisam kee ka pe, a ki fna mbe pe pe gbo kre, ki n fna mbe pe pe lɛɛlɛ gbo ka. Ndro kro fna mbe wre titi sisam mapini tio.” 7 Amaziah wra Edom ŋunɔ wifɛɛnlɛ kagbenyi kɛ pre gbo weŋge landɛɛ kre nu kre. Wra wi mna chia ŋga praa yeeri Sela kre shɔ, mna ki mɛɛ tɛɛ Joktheel, kre mɛɛ kre kii wa ki na mu pan mu su aŋga.
8 Ki ble ka, Amaziah na leele tun Israel ŋunu Jehoash pan mbo, “Pan mbe mi na ŋu fni mbe wi.” 9 La, Israel ŋunu Jehoash na tia pra sɛ yo Judah ŋunu Amaziah pan mbo, “Ki ble ka, Lebanon na, wuuro tiŋge fiɛn ka na sɛ yo cedar tiŋge kpɔɔ ka pan mbo, ‘Mu pɔ chlɔ ni chaa mbe ni biblɔ ŋga mbe u leŋge.’ Bawa nyaalam yurɔ wa na pan mna wuuro tiŋge fiɛn kre taanla mu mbra tra. 10 Amaziah, mu jawa na mu sheli, ŋga mna wi na Edom leele ni mna pe ja kre ndra na. Jande tni mu katoo, mu ti mbe mblɛ mu wi mu ja pre mu yiɛ nyi. Na mu gblɛ na kala fɔŋgɔ ni, ŋu titi na Judah waŋgra kre kro we ja putuu.”
11 La, Amaziah nsra ndie tɛɛ kee kre na. Ki tia Israel ŋunu Jehoash na yili na u wifɛɛnlɛ ni mna sɛ chia ŋga praa yeeri Beth-Shemesh, ŋga kraa wa Judah tra nu kre na, a wre na Amaziah ŋunɔwifɛɛnlɛ na sɛ ndra koori peyɛ na. 12 Ŋunɔ kre na nduu Judah leele pre na, a ki tia pra fɛ mu sɛ le pe kalonyi nu. 13 A Israel ŋunu Jehoash na Judah ŋunu Amaziah Jehoash biblɔ ŋmba tolɛɛ na wi Ahaziah wre yii Beth-Shemesh na wa. Mna ndru mu sɛ Jerusalem na, mna sɛ mboo ŋga pe sin mu chia kre fɛ mu kun kre juari. Wra yire jlonwee nyu ŋga praa yeeri Ephraim kre na, mna sɛ su jenu jlonwee kre na. Ki titnɔmu na da fiiti lafɛɛ kɔɔnanu. 14 Jehoash na swanyiɛ, na swafiŋge, na yirɛ nyjɛ wra nya o Tafun Nyiɛkpɔɔ Suminyuŋgo wa yire, na yirɛ nyjɛ kee yira sheli ŋunu katoo wa kro koli, mna leele pre plɛ yii mu ya mu sɛ Samaria na.
15 Ŋga Ŋunu Jehoash na ŋunumu li, kee nyjɛ wra pe mu ya, na gbuntitirem kee nyjɛ wra pe, na imi na wra sɛ wi na Judah ŋunu Amaziah ni yire kro, pra yi nyunɔ hlɛ ŋga nu praa Israel ŋulo fakee nyunɔi na teeri kre nu. 16 Jehoash na ku, a pra u le lebiile lehaa Samaria na. A u biblɔ wa, praa u yeeri Jeroboam na u krɔ li mna ŋunumu li.
Judah Ŋunu Amaziah Kumu
17 Israel ŋunu Jehoash kumu kɔkro kre, Judah ŋunu Amaziah na li yɛlɛ kɛmbɔkunɔ. 18 Amaziah kee nyjɛ wra pe yire kro, pra yi nyunɔ mna le hlɛ ŋga nu praa Judah ŋulo fakee nyunɔi na teeri kre nu. 19 Kena imi kra le a Amaziah na kumu ta na yi na, leele na nyu le na pie u gbo Jerusalem na, a wra fɛ mna sɛ Lachish na, a pra u kɔŋgɔ ni mna sɛ u gbo wa, 20 mna u gboo kre taa soo na mna pan mu u le Jerusalem na, u tolɛɛlɛ lehaa David kakpɔɔ kre na. 21 A Judah leele pre kro na sɛ Azariah, ŋmba wra li yɛlɛ kɛmbɔkɔɔnanu wre wru mna pan mna tɛɛ jɔɔn na, u lɛ titɛɛ. 22 U lɛ Amaziah kumu kɔkro kre, Azariah na sɛ wi mu Elath chia kre shɔ na mu ya Judah tra na, mna ndru mu ki gbeele mu sin.
Ŋunu Jeroboam Ŋmba Wra Taa Shiin
23 Ŋga Joash biblɔ Amaziah na li yɛlɛ kɛmbɔkunɔ Judah jɔɔn na kre, kre Jehoash biblɔ Jeroboam wre na pan mu Israel jɔɔn li Samaria na, mna tni ki na yɛlɛ fuloe shiin na nunu. 24 Wra sisam pe mna o Tafun Nyiɛkpɔɔ wre taan. Wra taa sisam kee nyjɛ Nebat biblɔ Jeroboam na tia Israel leele naa pini yire kro. 25 Wre chɔɔ wra wi mna ndru mu Israel trɛ nyjɛ pra wi mu shɔ pe pan yire shɔ. Wra trɛ yire shɔ mna yire Lebo-Hamath na mna sɛ su weŋge epo kre na, na shie ki tapanhaa. Kra pe imi na o Tafun Nyiɛkpɔɔ na u nyu yo Amittai biblɔ Jonah, ŋmba wra pe keenyanyofun Gath-Hepher na wre pan kre. 26 O Tafun Nyiɛkpɔɔ na kanyana kpɔɔ ŋga nu Israel leele pre na nyi yire nya, pe mblɛ pra pe tinlɛ, na pe mblɛ pe nsra pe tinlɛ kro naa kala nyaa, a ndro nsraa wa mbe pe shɔ. 27 La, o Tafun Nyiɛkpɔɔ nsra u jawala pe na we Israel leele pre nɔɔ pɔ tra yiɛ na, ki tia wra yire Jehoash biblɔ Jeroboam na mna pe shɔ.
28 Kee nyjɛ Jeroboam na pe u ŋunumu nyjila yire kro, na ŋunɛ nyjɛ wra wi, na imi na wra wi mna Damascus na Hamath chiɛ yire shɔ mna Israel ŋga, kre nyjila kre na Judah kɛɛ yi nyi, yire kee yire kro, pra yi nyunɔ mu le hlɛ ŋga nu praa Israel ŋulo fakee nyunɔi na teeri kre nu. 29 Jeroboam na ku, a pra u le u tolɛɛlɛ Israel ŋulo lehaa, a u biblɔ Zechariah na u krɔ li mna jɔɔn li.