Judah Ŋunu Azariah
15
Ŋga Israel Ŋunu Jeroboam na jɔɔn li kre, ki yɛlɛ fulo na kɔɔnashin na, kre Amaziah biblɔ Azariah na pan mu jɔɔn li Judah tra nu. 2 Ŋga pra u tɛɛ jɔɔn na kre na u li yɛlɛ kɛmbɔkɔɔnanu, a wra tni Jerusalem na mna jɔɔn kre li yɛlɛ fuloe shiin na kɛmbɔshiin. U lo mɛɛ naa Jecoliah, a wra yiri Jerusalem na. 3 Wra kee ŋga ki fraka o Tafun Nyiɛkpɔɔ yiɛ na pe, imi na u lɛ Amaziah na pe kre. 4 La, Azariah nsra tia pra nyambie sumi hɛɛ yire kla, a kra tia leele pre naa shie na sra woni yi na, na tuwe ndiom tɛɛn sroi wa. 5 O Tafun Nyiɛkpɔɔ na tia yiranyiɛrɛ na to u na, mna sɛ su u kumu nyjila. Ki tia pe nsra tia wra tni ŋunu katoo wa. U biblɔ Jotham wraa ŋunu katoo kre le, mnaa leele pre le tra kre nu. 6 Kee nyjɛ Ŋunu Azariah na pe u ŋunumu nyjila yire kro, pra yi nyunɔ mna le hlɛ ŋga nu praa Judah ŋulo fakee nyunɔi kre nu. 7 Ŋunu Azariah na ku, a pra u le lebiile le haa David kakpɔɔ kre na. A u biblɔ Jotham na u krɔ li mna pe ŋunu.Israel Ŋunu Zechariah
8 Ŋga Judah ŋunu Azariah na jɔɔn li kre, ki yɛlɛ fulo na kɛmbɔkɔɔnatarɛ wo na, Jeroboam biblɔ Zechariah na pan mna jɔɔn li Israel na mna tni Samaria na nyiɛpɔ kɔɔnanu. 9 Wra sisam kee pe o Tafun Nyiɛkpɔɔ yiɛ. U nsra laa sisam kee nyjɛ Nebat biblɔ Jeroboam na tia Israel leele naa pini yire kro. 10 Jabesh biblɔ Shallum na yiri mna Zechariah taan, mna sɛ u gbo leele yiɛ na, mna u krɔ li mna pe ŋunu. 11 Zechariah kee nyjɛ wra pe yire kro, pra yi nyunɔ mna le hlɛ ŋga nu praa Israel ŋulo fakee nyunɔi kre nu. 12 Kre kee ŋga na tia o Tafun Nyiɛkpɔɔ kee ŋga wra yo Ŋunu Jehu pan kre na pe kpra mbo, “Mu nanae we Israel ŋunumu li mbe sɛ su mu nana jelijae biile na.”
13 Ŋga Ŋunu Uzziah na jɔɔn li Judah tra nu kre, ki yɛlɛ fulo na kɛmbɔkɔɔnanyjirɛ wo na, kre Jabesh biblɔ Shallum na pan mu jɔɔn li Israel na mna tni Samaria na. Nyiɛpɔ nunu ni wra tni jɔɔn kre na. 14 Gadi biblɔ ŋmba praa yeeri Menahem wre na yiri Tirzah na mna sɛ Samaria na, mna sɛ Jabesh biblɔ Shallum wre tɔ mna u gbo, mna u krɔ li mna pe ŋunu. 15 Kee nyjɛ Shallum na pe, na linku kolo ŋga na wra tro yire kro, pra yi nyunɔ mu le hlɛ ŋga nu praa Israel ŋulo fakee nyunɔi kre nu. 16 Kre nyjila kre nu Menahem na yiri Tirzah na mna sɛ wi na chia ŋga pe yeeri Tiphsah kre, na ki chiɛ nyjɛ yi ki fɛ mu kun yire kro ni. Ŋgi na hin? Pe nsraa chaa mbe peyɛ le u jaara, ki tia wra chia kre kla, hali wra chiɛlɛ siirefɛɛnlɛ kro lɛɛ yɔɔlɛ mna pe biile wɔ mu wa.
17 Ŋga Judah ŋunu Azariah na ŋunumu li ki yɛlɛ fulo na kɛmbɔkɔɔnanyjirɛ wo na, kre Gadi biblɔ Menahem na pan mu Israel jɔɔn li mna tni Samaria na yɛlɛ kɛ. 18 Wra sisam kee pe o Tafun Nyiɛkpɔɔ yiɛ. U ŋunumu lie kre nu kre, u nsra laa sisam nyjɛ Nebat biblɔ Jeroboam na tia Israel leele naa pini yire kro.
19 Kre nyjila kre nu Assyria ŋunu Pul na pan mna Israel tra tɔ, a Menahem na u ŋga swafiŋge kagbeŋge a mbe u ya u na, mbe ki ti u jaŋga ta u waŋgra kre nu. 20 Menahem na swa kre shɔ mna yili swafɛɛnlɛ mblɛ praa wa Israel na pre pan. Wra tia swafɛɛnlɛ pre na swafiŋge ŋga snamu kie pe kradnɛ nunu wɔ a wra Assyria ŋunu wre ŋga, a kra tia Assyria ŋunu wre na ndru mna sɛ u waŋgra nu. 21 Menahem kee nyjɛ wra pe, nyjila ŋga ni wra jɔɔn li kre kro, pra yi nyunɔ mu le hlɛ ŋga nu praa Israel ŋulo fakee nyunɔi kre nu. 22 Menahem na ku, a pra u le, a u biblɔ Pekahiah na u krɔ li mna ŋunumu li.
23 Ŋga Judah Ŋunu Azariah na jɔɔn li, ki yɛlɛ fuloe shiin na kɛ wo na, kre Menahem biblɔ Pekahiah na pan mna jɔɔn li Israel na mna tni Samaria na. Wra jɔɔn li yɛlɛ shiin. 24 Pekahiah na sisam pe o Tafun Nyiɛkpɔɔ yiɛ. Sisam kee nyjɛ Nebat biblɔ Jeroboam na tia Israel leele naa pini yire na wra taa. 25 Pekahiah loplombo pre wa, praa u yeeri Pekah, u lɛ mɛɛ naa Remaliah. Wre wra yiri mna Ŋunu Pekahiah taan. Wra sɛ bilɛ fuloe shiin na kɛ wru Gilead na mna ya uyɛ na, a pra pan mna Ŋunu Pekahiah gbo, mna Argob, na Arieh gbo ŋunu katoo kagbala kpɔɔ kre nu Samaria na. Kena Pekah na Ŋunu Pekahiah gbo mna u krɔ li mna pe ŋunu. 26 Ŋunu Pekahiah kee nyjɛ wra pe yire kro, pra yi nyunɔ mna le hlɛ ŋga nu praa Israel ŋulo fakee nyunɔi kre nu.
27 Ŋga Judah ŋunu Azariah na jɔɔn li kre, ki yɛlɛ fuloe shiin na kɛmbɔshiin na, kre Remaliah biblɔ Pekah na pan mna jɔɔn li Israel na mna tni Samaria na. Wra jɔɔn li yɛlɛ fulo. 28 A wra sisam pe o Tafun Nyiɛkpɔɔ yiɛ. Nebat biblɔ Jeroboam sisam nyjɛ wra tia Israel leele na pe yire kro wra taa.
29 Nyjila ŋga nu Pekah na jɔɔn li Israel na kre, Assyria ŋunu ŋmba praa yeeri Tiglath-Pileser wre na pan mna wi mna chiɛ nyjɛ praa yeeri, Ijon na Abel-Beth-Maacah, na Janoah, na Kedesh, na Hazor yire shɔ. Mna ndru mu Gilead, na Galilee, na Naphtali trɛ yire shɔ mu ya, mna leele pre kro kɔɔnri mna sɛ na pe ni Assyria tra nu. 30 A Elah biblɔ Hoshea na yiri mna Ŋunu Remaliah biblɔ Pekah wre taan. Wra sɛ u tɔ mna u gbo, mna u krɔ li mu Israel jɔɔn kre wru mu li. Kre nyjila kre, na Uzziah biblɔ Jotham jɔɔn li Judah tra nu kie pe yɛlɛ fulo. 31 Ŋunu Pekah kee nyjɛ wra pe yire kro, pra yi nyunɔ mu le hlɛ ŋga nu praa Israel ŋulo fakee nyunɔi kre nu.
32 Ŋga Remaliah biblɔ Pekah na jɔɔn li Israel na kie pe yɛlɛ shiin kre, kre nyjila kre Uzziah biblɔ Jotham na jɔɔn li Judah na. 33 Ŋga pra u tɛɛ jɔɔn na kre, na u li yɛlɛ fulo na kunɔ mna tni Jerusalem na yɛlɛ kɛmbɔkɔɔnanu jɔɔn kre na. U lo mɛɛ naa Jerusha, Zadok bichlɔ na wi. 34 Ŋunu Jotham na fraka o Tafun Nyiɛkpɔɔ yiɛ na, imi na u lɛ Uzziah na pe kre chɔɔ. 35 A nde u nsra tia pra nyambie sumihɛɛ yire juari mu wo, kra tia leele pre na kro na shie na sra woni, na tuwe ndiom tɛɛn sroi wa. Jotham wra ndru mna o Tafun Nyiɛkpɔɔ Suminyuŋgo kre tapanhaa krɔ kre pe. 36 Ŋunu Jotham kee nyjɛ wra pe yire kro, pra yi nyunɔ mu le hlɛ ŋga nu praa Judah ŋulo fakee nyunɔi kre nu. 37 Kre nyjila kre nu o Tafun Nyiɛkpɔɔ na tia Syria ŋunu Rezin, na Remaliah biblɔ Pekah naa shie na wii na Judah leele ni. 38 Jotham na ku, a pra u le lebiile lehaa David kakpɔɔ kre na. A u biblɔ Ahaz na u krɔ li mna pe ŋunu.