3 Uzziah na li yɛlɛ kɛmbɔkɔɔnanu a pra chin mu u tɛɛ jɔɔn kre na, a wra tni Jerusalem na yɛlɛ fuloe shiin na kɛmbɔshiin. U lo mɛɛ naa Jecoliah, a wra yiri Jerusalem na. 4 Wra fraka o Tafun Nyiɛkpɔɔ wre yiɛ na, na u lɛ Amaziah wi. 5 Uzziah yiɛ naa wa Nyiɛkpɔɔ na nyjila ŋga nu Zechariah naa wa kre, a wre wraa u nyina Nyiɛkpɔɔ kee. A Nyiɛkpɔɔ na tia u kee kro naa nyɔɔ na u kaan.

6 Wre wra sɛ wi na Philistine leele ni mna mboe nyjɛ pe sin mu Gath, na Jabneh, na Ashdod chiɛ yire fɛ mu kun yire juari, mna chiɛ nyjɛ yira mbra Ashdod na kre gbeele mu sin, mna chiɛ yɛ sin sin Philistine tra kre na mu ya. 7 Nyiɛkpɔɔ na ya u na a wra Philistine leele, na Arab leele mblɛ praa wa Gur-Baal, na Meunite leele pre kro ja. 8 Ammon leele pre naa tɔɔ toni na Ŋunu Uzziah kaan, a wra mɛɛ ta hali mna sɛ su Egypt tra sam nyu na.

9 Ŋunu Uzziah na nyinyi gedenyi nyjɛ na pe yire na chia sri yire yɛ sin Kɔm Jlonwee kre, na Landɛɛ Jlonwee kre, mna yi pe a yira faŋga ta mu ya. 10 Wraa wa na pɔɔri yurɛ ni nyambie lawee yire, na lawee mbrɛrɛ yire nu. A wraa wa na tnumu tunfɛɛnlɛ ni pra tnumu tuni u pan u tre seele nu nyambie yire na, na trɛ tɛɛn yire nu. Flaŋga na tna u pan, ki tia wra nyinyi gedenyi yire yɛ sin tablɔ tra kre nu, mna nyumu shɔ mu tɛɛ ndoe tataara tuulo tra kre nu.

11 Ŋunu Uzziah naa wa ŋunɔwifɛɛnlɛ mblɛ pra wi mu chin ni. A Jeiel na Maaseiah na lɛ nyunɔfɛɛnlɛ mblɛ praa wifɛɛnlɛ pre nɛɛmu le, a pre loplombo shiin pre naa wa ŋunu lopom ŋmba praa yeeri Hananiah wre jaara. 12 Jlom loplombo mblɛ praa wa wifɛɛnlɛ pre nyu na naa kagbenyi shiin na lafɛɛ kɔɔnanu. 13 A wifɛɛnlɛ mblɛ praa wa pe jaara pre naa kagbenyi lafɛɛ taarɛ na kɔɔnashin na lafɛɛ kunɔ, a pra wi mu chin mu sheli, mbe jaa wi mbe ŋunu shɔ u loŋgoolo kɛɛ. 14 Ŋunu Uzziah na wifɛɛnlɛ pre kro ŋga yirɛ nyjɛ ni pe snimi na chombo shio, na ŋunɔ dodonyi, na yi juulee, na bɛnyi, na yi snimi, na vuŋmbɔ na yi dnɛ. 15 Wra tia pra pɛɛlɛɛ nyjɛ yi ja na snimi waari, na nyjɛ yi ja na dnɛ badɛnyi waari gbeele mna yi taa taa nyinyi gedenyi yire na Jerusalem kɔm yire nu kro. Wra mɛɛ shɔ mu sɛ lee, ŋgi na hin? Nyiɛkpɔɔ na ya u na a wra jaŋga ta.

16 Ŋga Ŋunu Uzziah na jaŋga ta mu kɔ kre, wraa uyɛ kpɔɔri, a kra tia wra to. Wra ndikana pe u Tafun Nyiɛkpɔɔ wre na, a wre titi na sɛ mbe tuwe ndiom tɛɛn sro sragbunu ŋga na praa tuwe ndiom tɛɛn sroi o Tafun Nyiɛkpɔɔ Suminyuŋgo wa kre na. 17 Ŋga wra le wa kre, srawɔfun Azariah, na o Tafun Nyiɛkpɔɔ srawɔfɛɛnlɛ pre fuloe jijirɛ na gbun ta mna le u kro wa, 18 mna u nyu kaanri mna yo u pan mbo, “Ki n kolo ni na ŋunu titi we tuwe ndiom tɛɛn sro mbe o Tafun Nyiɛkpɔɔ wre ŋga. Aaron nanae mblɛ lɛ sɔfue, a pe paala pe mu nɛɛrɛ laa peyɛ na kre tnumu yi. Kena yili mna, mu punu Nyiɛkpɔɔ na, a ki tia wa mu sra kre shɔ.” 19 Ŋunu Uzziah krɔ na kun. Na kre nyjila kre na taha ŋga ni pe tuwe ndiom tɛɛn sroi kre wa u kɛɛ, a wra paan mbe yɛ sro. Ŋga wra yire na srawɔfɛɛnlɛ pre le na krɔ ni kre to, a yiranyiɛrɛ na pan mu wo u nduwe na. 20 Ŋga srawɔfun lopom titi Azariah na u ŋmbilɛ pre na yire na u le kre, pra nya na yiranyiɛrɛ wo u nduwe na, a pra u ni nyaanyaa mna yili fimi na. Ŋga wra ki nya ma kre, wre titi naa chaa mbe yili fimi na, ŋgi na hin? Wra nya na Nyiɛkpɔɔ u yira kre wa u na. 21 Yiranyiɛrɛ yire na kro u na, mna sɛ su na wra ku. Ki tia pe nsra tia wra le Suminyuŋgo wa, ndee mna sɛ tni ŋunu katoo wa na, la, wra sɛ tni wre titi katoo, a pra u tnumu kro shɔ u kɛɛ, a u biblɔ Jotham na sɛ tni ŋunu katoo wa na tra kre le.

22 Ŋunu Uzziah kee nyjɛ wra pe mna sɛ su u kumu nyjila kre krɛrɛ, Amos biblɔ Isaiah, Nyiɛkpɔɔ keenyanyofun wre na yi nyunɔ mu tɛɛ u fakee hlɛ nu. 23 Ŋga Ŋunu Uzziah na ku kre, pe nsra u le lebiile lehaa kre nu, la, pra u le mu mbra ŋulo tra ŋga kra mbra u tolɛɛlɛ lehaa kre nu, ŋgi na hin? Pra nya na yiranyiɛrɛ na u gbun. A u biblɔ Jotham, wre wra u krɔ li mna tni jɔɔn kre na.