5 Ŋunu Amaziah na kɛ wa mna Judah, na Benjamin jlom leele pre yeeri, a pra pan mu fni, a wra ŋunɔwifɛɛnlɛ pre yɔɔlɛ fekofeko, mna loplombo wɔ mu tɛɛ tɛɛ pe kagbenyi, na pe lafɛɛ nyu na. Leele mblɛ pra li yɛlɛ fulo na shie pra wɔ, a pe kro na pe kagbenyi lafɛɛ taarɛ. Pra pe leele mblɛ pie jaa chombo, na ŋunɔwiyira ŋga ni wifun uyɛ toni tɛɛ mbe wi ŋunɔ. 6 Ŋunu Amaziah na sɛ ŋunɔwifɛɛnlɛ kagbenyi lafaa hari Israel na, na swafiŋge ŋga snam kra da tons jijirɛ ni. 7 A Nyiɛkpɔɔ keenyanyofun wa na pan mna yo u pan mbo, “Tolɛɛ, maa ti mbe Israel wifɛɛnlɛ mblɛ sɛ ya mu na ŋunɔ ŋga nu, ŋgi na hin? O Tafun wre laa Israel leele mblɛ pee wa mu tni na shie nyjeeri haa wa kre kro. 8 Na maa je mu gbun ta mu sɛ na pe ni ŋunɔ ŋga nu, Nyiɛkpɔɔ we ti mbe mu loŋgoolo pre mu ja, ŋgi na hin? Wre Nyiɛkpɔɔ wa jaŋga ni mbe jaa ti mu wi mbe yili, ndee mbe jaa ti mu wi mbe to mu loŋgoolo yiɛ.” 9 A Ŋunu Amaziah na kna mna Nyiɛkpɔɔ keenyanyofun wre wie mbo, “A swa ŋga ni tɔ mu pe ŋga ŋga hin?” A Nyiɛkpɔɔ keenyanyofun wre na kan mbo, “O Tafun Nyiɛkpɔɔ wre we jaa mu ŋga swa kre ka mbe ki wɛ ma na.” 10 Ŋga kra pan ma kre, a Ŋunu Amaziah na tia Israel wifɛɛnlɛ mblɛ pra yiri Ephraim nyambie yire lawee yire nu kre na ndru mu sɛ katoo. Ŋga praa shie kre, pe krɔ na kun na Judah leele pre ni kpɔɔ.

11 A Amaziah na uyɛ le gbeŋmbaa, mna yiɛ klu na u wifɛɛnlɛ pre ni mna sɛ loŋgoolo pre fni weŋge landɛɛ kre nu, bawa wra Edom tra kre wifɛɛnlɛ pre kagbenyi kɛ gbo. 12 Judah wifɛɛnlɛ pre na pe wifɛɛnlɛ pre kagbenyi kɛ yii, mna nduu na pe ni nyua lawee chuuli ka na, mna pe ŋunɔ a pra sɛ wo dnɛ yire nu mna ku.

13 Kena Israel wifɛɛnlɛ mblɛ pan Ŋunu Amaziah na yo na pe ndru mbe sɛ katoo kre, ŋga praa shie kre pra sɛ Judah chiɛ yɛ tɔ mu yire Samaria na mu sɛ su Beth-Horon na. Pra leelee kagbenyi taarɛ gbo, pe yirɛ nyjɛ pra foolo mu sɛ kre na nɛɛ titi.

14 Ŋga Ŋunu Amaziah na Edom leele pre gbo mu kɔ mnaa paan kre, wra leele pre sɛɛnlɛ yire koli mu pan, mna pan mu yi tɛɛ na peerii. 15 Ŋga kra pan ma kre, o Tafun Nyiɛkpɔɔ wre krɔ na kun na Ŋunu Amaziah ni, a Nyiɛkpɔɔ na u keenyanyofun tun a wra sɛ yo u pan mbo, “Mni a mna pre leele mblɛ sɛɛnlɛ nyjɛ yi nsra ja mu pre titi shɔ e kɛɛ yire koli mu pan na sumi ŋga hin?” 16 Keenyanyofun wre naa wa na paara, a Amaziah na kna mu yo u pan mbo, “Ŋmbi u mu wɔ ŋunu paaranyinafun hin? Mu nyu tɔ, na kre ma mbe ti mbe pe mu gbo.” A keenyanyofun wre na je mna u kee haŋa yo mbo, “Ni chin na kee ŋga mu pe ŋga ndra na, Nyiɛkpɔɔ u jawala pe mu kɔ na we mu kla, ŋgi na hin? Mu n na chaa mbe li kee ŋga ni yuu mu pan kre na.”

17 Judah ŋunu Amaziah na u paaranyinafɛɛnlɛ pre na paara mu fni, a wra leele tun a pra sɛ yo Israel ŋunu Jehoash ŋmba lɛ na wi Jehoahaz, a u tolɛɛ na wi Jehu wre pan mbo, “Ni paan mbe mi na ŋu ŋunɔ wi.” 18 La, Israel ŋunu Jehoash wre na yo bitumblɔ pre pan mbo, “Ki ble ka, Lebanon wuuro tiŋge fiɛɛn ka na ndro tun Cedar tiŋge badaaŋga ka pan Lebanon tra nu mbo, ‘Mu bichlɔ wru mu ni biblɔ ŋga mbe u leŋge.’ La, nyaalam yurɔ wa na yiri Lebanon na wa mna pan mu wuuro tiŋge fiɛɛn kre taanla mu mbra tra. 19 Ŋunu Amaziah, mu muyɛ kpɔɔri na mu Edom leele ja, la, ni yuu mu pan na mu nyu tɔ mu tni mu lawee. Maa kala cha mbe ŋu na mu leele kro ŋga.”

20 Nyiɛkpɔɔ na tia Ŋunu Amaziah ndie na kan, ki tia u nsra kee kre loo, ŋgi na hin? Nyiɛkpɔɔ naa chaa mbe u kla, ŋga wra Edom leele sɛɛnlɛ koli mu pan na sumi kre ndra na. 21 A Israel ŋunu Jehoash na u wifɛɛnlɛ na yiri, a wre na Judah ŋunu Amaziah na gɔli peyɛ na chia ŋga pe yeeri Beth-Shemesh, a kraa wa Judah tra nu kre na. 22 Israel wifɛɛnlɛ pre na Judah leele pre ja, a pra fɛ mu sɛ katoo. 23 Israel ŋunu Jehoash na Judah ŋunu Amaziah yii mna sɛ na u ni Jerusalem na, mna sɛ Jerusalem mboo ŋga pe sin mu ki fɛ mu kun kre juari, mu yire Ephraim Jlonwee kre na, mu sɛ su Kɔm Jlonwee kre na. Ki titnɔmu we pe yaadi lafɛɛ shiin. 24 Wra swanyiɛ, na swafiŋge, na yirɛ nyjɛ wra nya Nyiɛkpɔɔ Suminyuŋgo kre nu, a Obed-Edom naa yi le yire kro koli mu ya ŋunu katoo wa yirɛ nyjɛ kee yira shian yire na, mna ya leele plɛ na, mna ndru mu sɛ Samaria na.

25 Israel ŋunu Jehoahaz biblɔ Jehoash kumu kɔkro kre, Judah ŋunu Joash biblɔ Amaziah wre na li yɛlɛ kɛmbɔkunɔ, mna chin mu ku. 26 Amaziah kee nyjɛ wra pe krɛrɛ, pe yi nyunɔ mu le hlɛ ŋga nu pe Judah na Israel ŋulo fakee nyunɔ mu le kre nu. 27 Mu yire nyjila ŋga Amaziah na laa o Tafun Nyiɛkpɔɔ kro kre, u leele pre plɛ na yiri mu u taan Jerusalem na, a kra tia wra fɛ mna sɛ ndra Lachish na, a pra leele tun, a pra u kɔŋgɔ ni mna sɛ u gbo wa. 28 A pra u wru mu taa soo na, mna pan mu u le u tolɛɛ, Ŋunu David lehaa Judah kakpɔɔ kre na.