4 Kra wa wa nyjila ka nu a Joash na jawala pe na ki fna mbe u o Tafun Nyiɛkpɔɔ wre Suminyuŋgo kre lawee nyjɛ yi kla yire gbeele. 5 A wra kɛ wa mna srawɔfɛɛnlɛ pre, na Levi leele pre yeeri mna yo pe pan mbo, “E sɛ Judah chiɛ yire na kro, e sɛ yɛlɛ nyu swɛ nyjɛ Israel leele pre woni yire shɔ e pan, mbe o tɛɛ mbe Nyiɛkpɔɔ Suminyuŋgo kre gbeele. O swa kre chaa nyaanyaa, kena e sɛ fuŋgaami.” La, Levi leele pre na mu sɛ haa. 6 Ŋga kra pan ma kre, Ŋunu Joash na srawɔfun lopom titi Jehoiada yeeri mna u wie mbo, “Mni a mu n Levi leele pre tun a pe sɛ yɛlɛ nyu swɛ nyjɛ pe fna mbe tɔ yire shɔ hin? Fa kre, o Tafun Nyiɛkpɔɔ sumifun Moses wre, na Israel leele pre kro na nyu ta nunu na ki fna mbe leele pre na yire tɔɔ nyjɛ woni, mbe pe ki tɛɛ mbra Yoŋgo Nyuŋgo ŋga nu leele pre na Nyiɛkpɔɔ naa fni kre tnumu tuni.” 7 Fuŋgaami ki fna mbe o Suminyuŋgo kre gbeele, ŋgi na hin? Athaliah, chlɔ sisampefun wre bibilɛ pre sɛ Nyiɛkpɔɔ Suminyuŋgo kre ja mu le wa, mu yirɛ cheche nyjɛ yii wa wa yire yɛ wru mu sɛ na sɛɛn Baal sumi na yi ni.

8 A Ŋunu Joash na tia pra daka ka pe, mna ki tɛɛ o Tafun Nyiɛkpɔɔ Suminyuŋgo kre jlonwee nyu na fimi na. 9 A wra tia pra sɛ yo Jerusalem leele, na Judah leele pre kro pan na, pe pan na yɛlɛ nyu tɔɔ nyjɛ Nyiɛkpɔɔ sumifun Moses na tia Israel leele pre naa toni fa fimi tra kre nu kre ni. 10 Leele pre kro na pe loplombo pre na li ki na, mna pe tɔɔ yire wɔ yɛshɔɔrɔ ni, mnaa paan na yi leni daka kre nu, mna sɛ su na kra nyi. 11 Blenyini ŋga Levi leele pre we daka kre wru mbe sɛ na ki ni ŋunu wre swa lefun, na srawɔfun lopom titi wre yafun pan mbe pe swa kre kna, mbe ki tɔɔnri. Praa swa taa nɛɛrɛ. Na pe kɔ mbe pe daka kre wru mbe sɛ ki tɛɛ ki lawee wa.

12 Na pe pan na swa kre ni, mbe Ŋunu Joash, na srawɔfun lopom wre swa kre wru mbe le ŋmba u Suminyuŋgo kre tnumu le kre kɛɛ. Kre swa kre ni praa dnɛ tɛfɛɛnlɛ, na brichae, na kapintae, na tɔɔnrɔ, na swafre fiireefɛɛnlɛ pre fɔlɔ toni.

13 Leele mblɛ praa tnumu kre tuni pre na ki tun nyibinyiɛ ni, kra tia tnumu kre na sɛ nyaanyaa. Pra o Tafun Nyiɛkpɔɔ Suminyuŋgo kre gbeele mu sin, a kra pe na ki fa yi, mna faŋga ta mu ya. 14 Ŋga pra tnumu kre kɔ kre, swafiŋge, na swanyiɛ kre kɔɔn na kro, a pra ki wru mna pan mu ŋunu, na Jehoiada ŋga, a pra yi tɛɛ mna kotie, na yirɛ bɛɛlɛ nyjɛ ni pie na tnumu tuni Suminyuŋgo wa yire pe. Srawɔfun Jehoiada nyjila kre, nyjila kro nu praa shie na yurɛ sroo sra woni Suminyuŋgo wa na o Tafun Nyiɛkpɔɔ wre kaan.

15 Jehoiada na lɛ blɛlɔɔ mna chin mu ku. Wra li yɛlɛ lafaa na fulo na kɛ. 16 Pra sɛ u le ŋulo lehaa wa Ŋunu David kakpɔɔ kre na Jerusalem na, ŋgi na hin? Wra kee chiriri pe mu Israel leele Nyiɛkpɔɔ wre, na u Suminyuŋgo kre ŋga.

17 Jehoiada kumu kɔkro kre, Judah loplombo pre na sɛ paara Ŋunu Joash pan mna u jawala kna mbe u ŋga pe chaa pe. 18 Ki nsra mu a pra pe tolɛɛlɛ Nyiɛkpɔɔ wre Suminyuŋgo kre sɛɛ ti, mna sɛ na sɛɛnlɛ, na sɛɛn chlɔ Asherah kɛɛn yire sumi. Pe sisam kee yire praa pini kre ndra na, Nyiɛkpɔɔ krɔ na kun na Jerusalem, na Judah leele ni. 19 O Tafun Nyiɛkpɔɔ wre na tia u keenyanyofɛɛnlɛ na sɛ pe jaari, na pe ndru mbe pan Nyiɛkpɔɔ wre pan, a pra je.

20 Bawa Nyiɛkpɔɔ ŋumu na pan mu le srawɔfun Jehoiada biblɔ ŋmba pe yeeri Zechariah wre nu, a wra yire leele pre yiɛ na mna yo mbo, “E loo kee ŋga Nyiɛkpɔɔ yuu, ‘Mni a e e Tafun wre nyu kee je hin? Ŋga e e Tafun Nyiɛkpɔɔ wre je kre ndra na, u e je na.’” 21 La, leele pre na kolo cha mbe Zechariah gbo, a Ŋunu Joash na ya pe na a pra u waari dnɛ ni mu gbo o Tafun Nyiɛkpɔɔ wre Suminyuŋgo kre lawee vankam kre nu wa. 22 Ŋunu Joash nsra chichie ŋga Zechariah lɛ Jehoiada na pe u na kre sɔɔnri. Ŋga Zechariah naa wii kumu ni kre, a wra yo mbo, “Nyiɛkpɔɔ u kee ŋga e pe ŋga le mbe e fɔlɔ tɔ imi na ki fna.”

23 Kie pe tla nyjila yɛlɛ kre nu to, a Syrian ŋunɔwifɛɛnlɛ na pan mna Jerusalem, na Judah tɔ, mna pe loplombo kro gbo. Pra pe yirɛ kro foolo mna sɛ pe ŋunu ŋga Damascus na. 24 Syrian ŋunɔwifɛɛnlɛ pre n nsra nɛɛ, la, o Tafun Nyiɛkpɔɔ wre na Judah, na Jerusalem ŋunɔwifɛɛnlɛ tataara pre le pe kɛɛ, ŋgi na hin? Judah leele na pe tolɛɛlɛ Nyiɛkpɔɔ wre je, a Nyiɛkpɔɔ na yire ki na mna Joash ndie tini.

25 Ŋga praa ŋunɔ kre wii kre, pra Joash pra kpɔɔ. Kena ŋga Syrian leele pre na wi mu kɔ mna sɛ kre, a Joash loplombo pre shiin na kolo cha mna sɛ Joash gbo u dɛŋglɛ na. Ŋga wra srawɔfun Jehoiada biblɔ Zechariah gbo kre ndra na pra sɛ u gbo mu fɔlɔ tɔ. A pra sɛ u le Ŋunu David kakpɔɔ kre na Jerusalem na, la, pe nsra u le ŋulo lehaa wa. 26 Leele mblɛ pra kolo cha u na mna u gbo pre na lɛ, Ammon lechlɔ Shimeath wre biblɔ Zabad, na Moab lechlɔ Shimrith wre biblɔ Jehozabad wre. 27 Ŋunu Joash bibilɛ pre kee, na u kefuɛn nyjɛ keenyanyofɛɛnlɛ na nya mu yo, na o Tafun Nyiɛkpɔɔ wre Suminyuŋgo kre gbeelee kee yire kro, pe yi nyunɔ mu le ŋulo fakee hlɛ nyjɛ pe nyunɔ mu tɛɛ yire nu. Ŋunu Joash biblɔ Amaziah wra u krɔ li, mna tni jɔɔn kre na.