Jehoiada Na Joash Pe Ŋunu Judah Tra Nu
23
Ŋga pra Joash ndra kre kie pe yɛlɛ kɔɔnashin nyu na, srawɔfun Jehoiada na jawala wru a wre na ŋunɔwifɛɛnlɛ loplombo plɛ na paara mu fni. Pre na lɛ Jeroham biblɔ Azariah, na Jehohanan biblɔ Ishmael, na Obed biblɔ Azariah, na Adaiah biblɔ Maaseiah, na Zicri biblɔ Elishaphat. 2 Pre leele mblɛ na kila mu tro Judah kakpɔɛ yire kro na, mna Levi leele pre, na Israel jlom loplombo pre kro yeeri a pra pan mu fni Jerusalem na. 3 Pe kro na sɛ fni Suminyuŋgo wa, mna nyu nunu pe na pie ya ŋunu biblɔ Joash wre na. A Jehoiada na yo pe pan mbo, “Ŋunu biblɔ Joash wre oo pe ŋunu, imi na o Tafun Nyiɛkpɔɔ na ki yo mu wru Ŋunu David nanae haa kre. 4 Kena kee ŋga ki fna mbe e pe yi kre, na srawɔfɛɛnlɛ pre, na Levi leele pre pan mbe pe tnumu tun Suminyuŋgo wa Wuuble kre, ki fna mbe e eyɛ yɔ taarɛ, mbe e yɔɔ nunu tni jlonwee nyu yire na mbra sri, 5 mbe e yɔmu nunu tni ŋunu katoo wa mbra ki sri, mbe e yɔmu taarɛ wo kre na sri jlonwee ŋga pe yeeri nyuŋgo nɔɔ kre na mbra sri, mbe bilɛ hamblɛ pre kro yire yire Suminyuŋgo lawee vankam kre nu. 6 Ndro waa shia le o Tafun Nyiɛkpɔɔ wre Suminyuŋgo wa, fɔna sɔfue, na Levi leele mblɛ pee wa tnumu nu pre chiin bɔkɔ. Pre we jaa le wa, ŋgi na hin? Pe nɛɛrɛ laa pe na paala kolo na. La, leele hamblɛ pre fna mbe li o Tafun Nyiɛkpɔɔ wre nyu kee na, mbe yire fimi na wa mbra sri. 7 Levi leele pre fna mbe pe wiyirɛ yii yii mbe yire mbe ŋunu wre fɛ mbe kun, a mna we tro kpan ki fna pe taa u kro. Ndro ŋmba we le Joash kro Suminyuŋgo wa kpan, ki fna mbe pe u gbo.”8 Levi leele pre, na leele hamblɛ pre kro na kee ŋga srawɔfun Jehoiada na yo pe pe kre pe. Ŋga leele pre na sɛ tnumu tun Wuuble kre nu Suminyuŋgo wa kre, srawɔfun Jehoiada nsra tia pra ndru mu sɛ pe kalonyi nu. Ki tia ŋunɔwifɛɛnlɛ pre loplombo pre na lawee shiefɛɛnlɛ mblɛ pie na sɛ katoo, na mblɛ pie na paan pe chinɛ pre kro naa wa na tnumu tuni. 9 A Jehoiada na ŋunɔwifɛɛnlɛ loplombo pre ŋga Ŋunu David chomboolo, na yirɛ nyjɛ ni ŋunɔ wifun uyɛ toni, a yiraa wa Suminyuŋgo wa kre. 10 A Jehoiada na tia pra pe wiyirɛ yire yii yii mu yire mu ŋunu wre fɛ mu kun mu mbra sragbunu kre na, Suminyuŋgo wa, na ŋunu wre sri.
11 A Jehoiada na u bibilɛ pre na yili na Joash ni, mna u le ŋujuulee, mna u ŋga mbra hlɛ ŋga ki wru jɔɔn lie haa kre. A pra olive simi wo u na, mu nyina na ŋunu wi, mnaa gble leni na yuu mbo, “Nyiɛkpɔɔ we ŋunu ndra tun tɔɔnrɔ.”
12 Ŋga ŋuchlɔ Athaliah na loo na leele pre gble leni na ŋunu wre kpɔɔri kre, a wra yiri nyaanyaa mna sɛ pe pan o Tafun Nyiɛkpɔɔ wre Suminyuŋgo wa. 13 Ŋga wra yiɛ wa mu le kre, na Joash ŋmba pe pe ŋunu, a uu wa mu yire mu mbra ŋunu pilaasi kre na Suminyuŋgo jlonwee wa, a ŋunɔwifɛɛnlɛ loplombo, na bnɔ fɔfɛɛnlɛ wa mu yire u jaara, a leele hamblɛ pre na yɛshɔɔrɔ lii, na bnɔɛ foo, a mɛkɔmblɔ pre pe mɛɛkɔyirɛ tɛɛ na mɛɛ koni, a pra shio pe pan. Ŋga ŋuchlɔ Athaliah na pe nya ma kre, a wra u dodonyi tini mu wla uyɛ na, mu nyina na krɔ u kun mu tro, mna gble le na yuu mbo, “E laa ni kro, mu ni wɔ mu ŋga.” 14 Titɛɛ kre nu to, a srawɔfun Jehoiada na yo ŋunɔwifɛɛnlɛ loplombo pre pan mbo, “E u yii e yili leele pre nu, la, yaa shia u gbo Suminyuŋgo kre lawee. Ndro ŋmba we na chaa mbe u shɔ e kɛɛ kpan, e ufun wre gbo e ya.” 15 Ŋga wraa paan mna da ŋunu katoo kre lawee ŋga praa yeeri Soolo Jlonwee kre nu to, a pra u yii, mna u gbo wa.
16 Ŋga kra pan ma kre, a srawɔfun Jehoiada wre na Ŋunu Joash na leele pre na yira ka, mu le peyɛ lalaa, na pe kro we pe o Tafun Nyiɛkpɔɔ wre leele. 17 Ŋga kra pan ma kre, leele pre kro na sɛɛn Baal nyinyi yire kro juari mu wo. Pra yi sɛɛnlɛ yire, na yi sragbuɛnlɛɛ yire kro juari, mna Baal pɛɛrifun ŋmba praa yeeri Mattan wre gbo sragbuɛnlɛɛ yire yɛsimi. 18 A srawɔfun Jehoiada na srawɔfɛɛnlɛ pre, na Levi leele pre nyina pe tnumu, a praa tuni Suminyuŋgo wa, imi na Ŋunu David na ki yo mu tɛɛ kre. Pre praa yurɛ sroo sra woni na o Tafun Nyiɛkpɔɔ wre kaan, imi na Moses mbra yire na nyina kre. A pre chɔɔ praa mɛɛ kɔɔ, na ble lie yire kee le. 19 Jehoiada na leele wɔ a praa Suminyuŋgo kre jlonwee yire sri, imi kie pe mbe ndro ŋmba u le nɛɛrɛ nu paala kolo na kre wa jaa le wa. 20 A wra u ŋunɔwifɛɛnlɛ loplombo pre, na lekpɔɛ plɛ, na waŋgra kre loplombo plɛ wru mu ya uyɛ na. A lenɛɛrɛ pre na taa pe na, a pra yiɛklu ŋunu wre pan, mna tro na u ni jlonwee nyjeeri wo kre nu mna yili na u ni Suminyuŋgo wa, mna sɛ na u ni ŋunu katoo wa, a wra sɛ tni u ŋujɔɔn kre na na u ŋunumu lii. 21 Ŋga kra pan ma kre, leele pre kro yiɛ na shɔ na pe ŋuchlɔ Athaliah gbo, a wejinyiŋge pan.