2 Wra li yɛlɛ fulo na shiin mna chin mu jɔɔn kre li, mna jɔɔn kre li yɛlɛ nunu Jerusalem na. U lo na wi Athaliah, a u tolɛɛ na wi Israel ŋunu Omri. 3 Wre chɔɔ, Ahab katoo leele pre kefuɛn nyjɛ pra pe yire na wra taa, ŋgi na hin? U lo wraa u leni gbeŋmbaa a wraa yire kefuɛn yire piin. 4 U lɛ kumu kɔkro kre, wra sisaa pe o Tafun Nyiɛkpɔɔ wre yiɛ, ŋgi na hin? Wra sɛ Ahab katoo leele pre plɛ wru a praa u kaan jawala, a kra tia u ŋunumu kre na yili u kɛɛ. 5 Wra taa pe nyu kee na mna sɛ ya Israel ŋunu Ahab biblɔ Joram wre na, a pra sɛ wi na Syria ŋunu Hazael wre ni Ramoth-Gilead na. Kre ŋunɔ kre nu Syria leele pre na Joram pra. 6 Ŋga kra pan ma kre, Ŋunu Joram na ndru mna sɛ tni Jezreel na na uyɛ trai. Bawa wra nyi a Judah ŋunu Ahaziah na sɛ u shaari haa.

7 Ŋga Ahaziah na sɛ Joram shaari haa kre, bawa Nyiɛkpɔɔ na tia wra fni na u kumu ni. Ŋga wra le chia kre na kre, wre na Joram na yili mna sɛ fni na Nimshi biblɔ Jehu wre ni. Na wre Jehu wre chɔɔ pan o Tafun Nyiɛkpɔɔ wre klu mu yo na u Ahab katoo bibilɛ kro gbo. 8 Nyjila ŋga Jehu naa Ahab katoo leele pre kuu kre, bawa wra Judah loplombo plɛ, na Ŋunu Ahaziah naala mblɛ praa u sumi kre nya, mna pe gbo mu ya. 9 A Jehu na tia leele na kila mu Ahaziah haa cha, mna sɛ u yii Samaria na, na uu wa mu ndra wa. A pra pan na u ni Jehu pan, a wra tia pra u gbo. Pra yila u tolɛɛ Jehoshaphat na mna sɛ u le, ŋgi na hin? Ŋunu Jehoshaphat na pe ŋunu ŋmba wraa lii o Tafun Nyiɛkpɔɔ mbra na, a kra tia praa u kaan buuro. Ŋga kra pan ma kre, ndro nsra kro Ahaziah sele nu mbe Judah jɔɔn kre li na.

10 Ŋga Ahaziah lo Athaliah na loo na pe u pɔ gbo kre, wra u jawala pe na ki fna mbe u Judah lebiile pre kro kla na. 11 Ahaziah jaa wa naa wa, u mɛɛ naa Jehosheba. A srawɔfun Jehoiada na u leŋge. Wre wra Ahaziah biblɔ Joash wre ju, mna sɛ wre na chlɔ wa ndra nyuŋgo ka nu Suminyuŋgo wa mbe wraa u le, mbe Athaliah wa u ta mbe gbo. 12 Wra Joash ndra Nyiɛkpɔɔ Suminyuŋgo wa yɛlɛ kɔɔnanu. Kre nyjila kre krɛrɛ na Athaliah wi ŋuchlɔ ŋmba wraa Judah tra kre le.