Judah Ŋunu Jehoram
21
Ŋunu Jehoshaphat na ku mna u tolɛɛlɛ kɔŋgɔ ni, a pra u le lebiile faŋga David kakpɔɔ kre na Jerusalem na. A u biblɔ Jehoram na u krɔ li mna jɔɔn li. 2 Ŋunu Jehoshaphat bibilɛ naa kɔɔnashin, pre na lɛ Jehoram, na Azariah, na Jehiel, na Zechariah, na Azariah, na Michael, na Shephatiah. 3 Ŋga Ŋunu Jehoshaphat na yo we ku kre, wra u biile pre ŋga swanyiɛ, na swafiŋge, na yirɛ chichiele nyjɛ kee yi shian, mna pe tɛɛtɛɛ chia nyjɛ pra mboe sin mu fɛ mu kun kun yire nyu na Judah tra kre nu, mna ŋunumu kre wru mna Jehoram ŋga, ŋgi na hin? Wre na wi u biblɔ lopom.Jehoram Judah Ŋunumu Li
4 Ŋga Jehoram na lawee ta mu tni na ŋunumu kre lii kre, a wra tia pra u chinlɛ pre kro, na Israel loplombo pre plɛ gbo. 5 Jehoram na li yɛlɛ fulo na kɛmbɔshiin a pra chin mu u tɛɛ jɔɔn kre na, a wra jɔɔn kre li mna tni Jerusalem na yɛlɛ kɔɔnatarɛ. 6 Israel ŋulo kefuɛn nyjɛ pra pe yire na wra taa. Wra Ŋunu Ahab bichlɔ leŋge, a kra tia kee nyjɛ Ahab katoo leele na pe yire na wra taa, mna sisaa pe o Tafun Nyiɛkpɔɔ wre yiɛ. 7 Yire kee nyjɛ krɛrɛ nu kre, nyu nunu ŋga o Tafun Nyiɛkpɔɔ na pe na Ŋunu David ni kre ndra na, Nyiɛkpɔɔ nsraa chaa mbe David katoo kre kla. Nyiɛkpɔɔ na nyu yo David pan fa na nyjila kro nu, u nana we yiri mbe jɔɔn kre li.
8 Nyjila ŋga Ŋunu Jehoram naa wa jɔɔn kre na kre, Edom leele na yiri mna u taan mna pre titi ŋunu tɛɛ. 9 Ŋga kra pan ma kre, Jehoram na uyɛ wru a wre na u loplombo na sookɛɛ wru mna sɛ Edom tra kre tɔ. A Edom wifɛɛnlɛ pre na pe fɛ mu kun. La, Ŋunu Jehoram na kolo ta mna yiri mna fɛ mu shɔ. 10 Hali mu pan mu su aŋga na, Judah leele pre jaŋga n wa Edom leele pre na. Kre nyjila kre nu na chɔɔ, chia ŋga praa yeeri Libnah kre leele na yiri mna Jehoram taan na. Kra yire ŋga Jehoram na laa u Tafun, u tolɛɛlɛ Nyiɛkpɔɔ wre kro kre ndra na. 11 Wra sɛɛnlɛ sumindoe pe pe Judah nyambie yire na, a kra tia Jerusalem leele naa sɛɛnlɛ sumi mna peyɛ wa mu fun.
12 Ki ble ka, Ŋunu Jehoram na hlɛ ta mu yiri Nyiɛkpɔɔ keenyanyofun Elijah wre pan. Kee ŋga kra wa ki nu na yi na, “Kee ŋga o Tafun, mu tolɛɛ David Nyiɛkpɔɔ wre yo yi kre mbo, ‘Mu n taa kee nyjɛ mu tolɛɛlɛ Jehoshaphat, ndee Judah ŋunu Asa naa piin yire na. 13 La, kee nyjɛ Israel ŋulo pre naa piin yire na mu taa, mu tia Jerusalem na Judah leele ayɛte Nyiɛkpɔɔ na, imi na Ahab na u katoo wolo pre na pe kre. Kre chiin ma kple, mu ndru mu mu lɛ biile mblɛ pe prɔ mu na kre yii mu gbo. 14 Yire kefuɛn nyjɛ mu pe kre ndra na, o Tafun Nyiɛkpɔɔ wre we mu chiɛlɛ na mu biile na mu leele na mu kɛyira kro kla. 15 A lɛɛ yira sisaa we to ŋu titi na, lɛɛ we mu yaa chiin mbe sɛ su na mu ku.’”
16 O Tafun Nyiɛkpɔɔ wre na tia Philistine, na Arab leele mblɛ pra tni mu mbra Cush leele na kre na ŋunɔ kun na Judah ŋunu Jehoram na u leele pre ni. 17 Pra pan mu Judah leele tɔ, mna yirɛ nyjɛ pra nya ŋunu katoo wa kro wru mu ya u chiɛlɛ, na u biile na mu sɛ, fɔna u bihaŋu ŋmba praa yeeri Ahaziah wre chiin bɔkɔ.
18 Nyjɛ krɛrɛ kɔkro kre, o Tafun Nyiɛkpɔɔ wre na tia lɛɛ yira sisaa na to Jehoram na, u nsra ja mu yi tra. 19 Yɛlɛ nununu shiin, na lɛɛ yira yire wa tɛ, hali a u lɛɛ bie na kɔ na yilii fimi na, mna u gbo kanyana kpɔɔ nu. U leele pre nsra kejenyi ble mu yi sro mna u le yɛnyiŋge imi na pra ki pe u lɛ na u tolɛɛlɛ kumu nu kre. 20 Jehoram na li yɛlɛ fulo na kɛmbɔshiin mna chin mu tni jɔɔn kre na, a wra jɔɔn kre li mu tni Jerusalem na yɛlɛ kɔɔnatarɛ. U kumu n nsra ndro pe fooro ni, a pra u wru mna sɛ le u lɛ David kakpɔɔ kre na Jerusalem na, la, pe n nsra u le ŋulo fanyi yire ka nu.