2 A leele plɛ na sɛ mandiɛ bɔ Ŋunu Jehoshaphat pan mbo, “Ŋunɔwifɛɛnlɛ tataara plɛ yiri Edom tra ŋga kii wa epo weŋge wo kre kro wa na paan mbe wi na mu ni. Fuŋgaami ŋga pe le Hazazon-Tamar na.” Kre chɔɔ praa yeeri En-Gedi. 3 Fiɛrɛ kpɔɔ na Jehoshaphat yii, a wra o Tafun Nyiɛkpɔɔ wre wie ŋga ki fna u pe, a wra tia Judah leele kro na ble fun. 4 Judah leele pre na yiri pe chiɛ yire kro na mna sɛ fni Jerusalem na mbe o Tafun Nyiɛkpɔɔ wre tali mbe u ya pe na.

5 Jerusalem, na Judah leele pre kro na sɛ fni o Tafun Nyiɛkpɔɔ Suminyuŋgo kre lawee vankam fɔŋgɔ kre nu, a Ŋunu Jehoshaphat na yiri mu yire pe yiɛ mna nyiɛtali kpɔɔ mbo, 6 “O Tafun, o tolɛɛlɛ Nyiɛkpɔɔ, ŋu ma Nyiɛkpɔɔ ŋmba muu wa nyjeeri kree? Ŋu mu ŋunumu lii waŋgrɛ, na ŋulo kro na. Jaŋga kroo wa mu kɛɛ, a ndro wa jaa yire mu yiɛ. 7 Nyiɛkpɔɔ, ŋu ma mna leele mblɛ praa wa mu tni tra ŋga nu fa kre ni mu leele Israel wolo pre yiɛ, mna ki wru mna mu nunu Abraham nanae pre ŋga puli kree? 8 O tolɛɛlɛ pre na tni tra kre nu, mna Suminyuŋgo sin mu mɛɛ na, na yuu na, 9 ‘Na ki pan na kala ka nyini o da, na ŋunɔ yi o, ndee na yira sisaa yi o, ndee na klo ki to o, oo pan mbe yire mu yiɛ Suminyuŋgo ŋga nu, mbe fooro tɛɛ mbe nyɛni mbe mu yeeri. Na ki waa pan ma, jande mu ndie tɛɛ o pan mu o shɔ.’ 10 Fuŋgaami Ammon leele, na Moab leele, na Edom leele paan mbe wi na o ni. La, ŋga o tolɛɛlɛ pre na yili Egypt tra nu fa kre, ŋu mna yo pe pan na pia wi na yire waŋgrɛ yire ni, a ki tia o tolɛɛlɛ pre na pe klɛ mu tro, a pe nsra pe trɛ yire kla. 11 Kena kee ŋga ni pe paan mbe o fɔlɔ tɔ yi na, pe paan mbe o ni mbe tra ŋga mna o ŋga na krɔyira yi kre wru. 12 Nyiɛkpɔɔ, kena ma pe ndie tini ra? Faŋga n wa o nu mbe o wi na leŋunɔ mblɛ pe paan mbe wi na o ni ŋga ni. A o n chin kee ŋga oo pe, kena ŋu na o yiɛ nyi.”

13 Ŋga Judah bilɛ pre, na pe chiɛlɛ, na pe biile kro naa wa mu yire o Tafun Nyiɛkpɔɔ wre yiɛ Suminyuŋgo wa kre, 14 titɛɛ kre nu to, a o Tafun Nyiɛkpɔɔ wre ŋumu na pan mu le Levi ndro Jahaziel wre nu. Zechariah biblɔ na wi, a u tolɛɛlɛ na lɛ Benaiah, na Jeiel, na Mattaniah, na Asaph. 15 A wra yire mu yire pe lalaa mna yo mbo, “Ŋunu Jehoshaphat, na Jerusalem na Judah leele kro, e loo! Kee ŋga o Tafun Nyiɛkpɔɔ wre yuu e pan yi kre mbo, ‘Yaa fiɛ, a yaa ti mbe e sɔɔnrɔ ku pre wifɛɛnlɛ tataara mblɛ ndra na. Ŋgi na hin? Yire ma ee ŋunɔ kre wi, Nyiɛkpɔɔ we ki wi mbe e ŋga. 16 Baŋga na e yiri, e sɛ pe pan, ee pe nya na pe kolo ŋga kii wa Ziz chia kre na kre yii na paan, ee sɛ pe da tablɔ tra ŋga ki mbra Jeruel na kre landɛɛ kre nu. 17 Yire ma ee ŋunɔ kre wi. La, e eyɛ kna, e yire e yire haa nu gbiŋmbi, e na o Tafun Nyiɛkpɔɔ wre le, mbe u wi mbe e shɔ. Jerusalem na Judah leele kro, yaa fiɛ, a yaa ti mbe e kɛ gblɛ, baŋga e yili e sɛ pe fni, o Tafun Nyiɛkpɔɔ wre wa e kro.’”

18 A Jehoshaphat na kosie kan mna yiɛ juule tra, a Jerusalem, na Judah leele pre kro na to to tra mna o Tafun wre sumi. 19 A Levi leele pre plɛ, pra yiri Kohath, na Korah sele nu, na yiri mu yire mna mana kpɔɔ tɛɛ mna o Tafun Israel Nyiɛkpɔɔ wre ŋga mɛɛ.

20 Ŋga nyiŋge na se bnimi pupu, a pra yiri wa mna sɛ tablɔ tra ŋga kra mbra Tekoa na kre nu. Ŋga pra yo pie sɛ kre, a Jehoshaphat na yiri mna yo pe pan mbo, “Yire Jerusalem na Judah leele kro e loo ni pan. E dankna o Tafun Nyiɛkpɔɔ wre na, kre kie ti u e shɔ, e shɔnlie ta u keenyanyofɛɛnlɛ pre nu, kre kie ti e wi mbe yili.” 21 Ŋga wra paara leele pre pan mu kɔ kre, a Jehoshaphat na bilɛ plɛ wɔ mbe praa mɛɛ koni mbe yiɛ klu wifɛɛnlɛ pre pan mbra o Tafun Nyiɛkpɔɔ wre kaan mɛɛ mbra yuu na,

22 Ŋga praa mɛɛ yire koni kre, a o Tafun Nyiɛkpɔɔ wre na tia chaachaa na wo Ammon, na Moab, na Edom leele mblɛ praa paan mbe Judah leele pre tɔ pre na. 23 A Ammon na Moab leele pre na kna mna wi Edom wifɛɛnlɛ pre ni mna pe kla pei. Ŋga pra pe kla mu kɔ kre, a pre titi na kna mu le peyɛ nu na peyɛ kuu.

24 Ŋga Judah leele pre na pan mna da kotum ka na tablɔ tra kre nu, mna yiɛ wa mbe pe loŋgoolo pre le kre, na pre mblɛ pe ku ku mu sni tra, ndro nunu chom kuraa nsra wa pe nu na le. 25 A Jehoshaphat na u leele pre na le pe nu, mna pe yirɛ foolo. Pra ŋunɔwiyirɛ, na yonyi, na yirɛ ndrɔ shelee tataara ta mu koli. Ble nununu taarɛ na pee wa na yi kolii, Yira nɛɛ, ki tia pe nsra ja mu yi kro koli mu sɛ. 26 Ki ble jijirɛ ble na, a pra fni Beracah landɛɛ kre nu mna o Tafun wre ŋga mɛɛ. Beracah kre nɔɔ nyina mɛɛ ŋgaa, pan pe lawee kre yeeri mu mu pan mu su aŋga na. 27 Jehoshaphat na yiɛ klu Jerusalem na Judah leele pre kro pan a pra yɛshɔɔrɔ wru mna ndru mna pan Jerusalem na, ŋgi na hin? O Tafun wre na tia pra pe loŋgoolo ja. 28 Ŋga pra le Jerusalem na kre, a pra mɛɛ koni, mna bnɔɛ, na juru, na saŋgo foo mna sɛ le o Tafun Nyiɛkpɔɔ wre Suminyuŋgo wa.

29 Ŋga waŋgrɛ yire na loo imi Nyiɛkpɔɔ na wi mu Israel leele pre ŋga kre, fiɛrɛ na wo pe na. 30 Ŋga kra pan ma kre, wejinyiŋge na pan Jehoshaphat ŋunumu kre nu. Ŋgi na hin? U Nyiɛkpɔɔ wre na tia wra wuu kolo kro na.

31 Ŋga pra Jehoshaphat tɛɛ jɔɔn na kre, na u li yɛlɛ fulo na kɛmbɔkunɔ, a wra jɔɔn kre li yɛlɛ fulo na kunɔ, mna tni Jerusalem na. U lo na wi Shilhi bichlɔ Azubah. 32 Kee nyjɛ u lɛ Asa naa piin yire kro wra taa. U nsra laa u lɛ kee yire ka kro. Wra kee ŋga ki nyu pe o Tafun Nyiɛkpɔɔ wre yiɛ. 33 La, u nsra sɛɛnlɛ sumindoe nyjɛ yiraa wa Judah tra nu nyambie lawee yire nu yire kla. A kra tia leele pre nsra lɛɛ wɔ mu na pe tolɛɛlɛ Nyiɛkpɔɔ wre sumi.

34 Ŋunu Jehoshaphat kee nyjɛ wra pe yire krɛrɛ, pe yi nyunɔ mu le Hanani biblɔ Jehu kee nyjɛ pra nyunɔ mu le Israel ŋulo fakee hlɛ nu kre nu.

35 Mbakɔ, Judah ŋunu Jehoshaphat na Israel ŋunu Ahaziah sisam pefun wre na sɛ nyu nunu pe. 36 Pra nyu nunu pe mna epo krɔɛ kpɔɛ yire yɛ pe Ezion-Geber na, mnaa shie na yi ni Tarshish na na jafa lii. 37 La, Dodavahu biblɔ Eliezer ŋmba u yiri Mareshah na wre na kee nya mu yo mu Jehoshaphat taan mbo, “Ŋga ŋu na Ahaziah sɛ nyu nunu pe kre ndra na, o Tafun Nyiɛkpɔɔ wre we epo krɔɛ nyjɛ e pe yire kla.” Ŋga kra pan ma kre, epo krɔɛ nyjɛ pra pe yire na yire yi titɛɛ wa mna kla, pe nsra ja mu kolo kun mu sɛ na yi ni haka.