Keenyanyofun Wa Jehoshaphat Yiɛ Kee Yo U Pan
19
Ŋga Ŋunu Jehoshaphat na ndru mna pan mu le u ŋunu katoo soo Jerusalem na kre, 2 a Hanani biblɔ Jehu, ŋmba na wi keenyanyofun wre na sɛ u da mna yo u pan mbo, “Mu jawa na ki nyu na mu ya Ŋunu Ahab sisampefun wre na mbe ŋu na wre nɔɔlɔ yii ra? Kee ŋga mu pe kre tia o Tafun Nyiɛkpɔɔ wre krɔ kun na mu ni. 3 La, mu kee kro ma ki peere. Kee ŋga mna pe a ki nyu yi na, mna sɛɛn chlɔ Asherah kɛɛn nyjɛ pe kan tra kre nu kro kla, a ki nyina na mu gbeŋmba mbe Nyiɛkpɔɔ yiɛ nyi.”4 Ŋunu Jehoshaphat naa wa mu tni Jerusalem na, nde wra yire Beersheba ŋga kraa wa tapan haa kre na, mna sɛ su Ephraim nyambie lawee nyjɛ yiraa wa na shie nyjeeri haa kre leele pan, na yuu pe pan na pe ndru mbe pan o Tafun, pe tolɛɛlɛ Nyiɛkpɔɔ wre pan. 5 Wra kala lifɛɛnlɛ wɔ mu tɛɛ Judah kakpɔɛ nyjɛ pra mboo sin mu fɛ mu kun yire kro na. 6 A wra paara mna pe nyina mbo, “Kee ŋga ee li kpan, e ki jawa chichie e chin e ki kpra kun, ŋgi na hin? Lewo jaŋga ni ma ee na kala lii, la, o Tafun Nyiɛkpɔɔ wre u e ŋga kre jaŋga kre, a na e kala kpra kuun, uu wa e nu. 7 Kena kee ŋga ee na pini kro, e ti mbe o Tafun Nyiɛkpɔɔ wre fiɛrɛ pe e nu. E na kpra kuun ki kolo na, ŋgi na hin? O Tafun Nyiɛkpɔɔ wre kpra lii, a wra ndro yiɛ le, a u n na dɔlɔɔ kee chaa.”
8 Ŋunu Jehoshaphat na Levi leele pre plɛ, na srawɔfɛɛnlɛ pre plɛ, na pe sele yire loplombo pre plɛ wɔ kala lifɛɛnlɛ, a praa leele mblɛ praa punu Nyiɛkpɔɔ mbra yire na kre kala lii, mbra pe lalɛɛ kaalɛɛ gbeele, a praa wa mu tni Jerusalem na. 9 Ŋga wra pe wɔ kre, a wra yo pe pan mbo, “E o Tafun Nyiɛkpɔɔ wre fiɛrɛ wru e tnumu tun, e li u kee kro na kpra na lɛɛ nunu ni. 10 Kee nyjɛ ni e wolo mblɛ pee wa mu tni kakpɔɛ yire na pre we na paan e pan kpan, na linku kee yi o, na Nyiɛkpɔɔ mbra yire kee yi o, e yi kee le e yo chichie, e leele pre jaari mbe pia na sisam pini mbra o Tafun Nyiɛkpɔɔ wre taanla, na kre ma u krɔ we kun na yire na e wolo pre ni. La, na e waa e tnumu tun chichie, yaa pimi li.
11 Kee nyjɛ yi wru o Tafun Nyiɛkpɔɔ haa kre, srawɔfun lopom titi Amariah we pe yi lopom, mbe Ishmael biblɔ Zebadiah ŋmba wi Judah jlom lopom wre we pe kaalɛɛ nyjɛ yi wru ŋunu haa yire lopom, mbe Levi leele pre na yaa e na. Kena e gbun ta, o Tafun Nyiɛkpɔɔ wre we ya e na, mbe e jaa na ŋga ki fraka piin.”