Micaiah Na Israel Ŋunu Ahab Jaari
18
Ŋga Judah ŋunu Jehoshaphat na swa ta, a u mɛɛ na yili kre, wraa Israel ŋunu Ahab bichlɔ wa chaa mbe u biblɔ ŋga mbe u leŋge, kena pe pe nunu. 2 Yɛlɛ yɛ kɔkro kre, Jehoshaphat na sɛ Ŋunu Ahab shaari haa Samaria kakpɔɔ kre na. Ŋga wra le wa kre, Ŋunu Ahab na tia pra mbaala, na nui gbo tataara, mna wre na u kotɔmblɔ pre frɔ pe mna Jehoshaphat le yɛnyiŋge. Wraa chaa mbe Ŋunu Jehoshaphat jawala kna, mbe u ya u na, mbe pe sɛ wi na Ramoth kakpɔɔ ŋga kii wa Gilead tra nu kre leele ni. 3 Ŋga pra li mu kɔ kre, a wra u wie mbo, “Ŋunu Jehoshaphat, Mu ya ni na mbe o sɛ wi na Ramoth leele ni ra?” A Jehoshaphat na kna mbo, “Fuŋga rɛ, mi na ŋu leele nunu lɛ wre, a ni wifɛɛnlɛ pre mu wolo lɛ, kena oo ya mu na mbe o sɛ wi.”4 La, Jehoshaphat na yo Israel ŋunu wre pan mbo, “Ŋga ki yiɛklu yi na, mu ti mbe o o Tafun Nyiɛkpɔɔ wre wie mbe loo tun.”
5 A Ŋunu Ahab na tia pra Israel keenyanyofɛɛnlɛ pre lafɛɛ jijirɛ yeeri a pra pan mu fni, a wra pe wie mbo, “O sɛ wi na Ramoth-Gilead leele pre ni ndee, o ti hin?” A pe kro na kna mbo, “E sɛ, Nyiɛkpɔɔ we leele pre le mu kɛɛ.”
6 A Jehoshaphat na kna mu wie mbo, “Kena Nyiɛkpɔɔ keenyanyofun wa n wa mna mbe o u wie na ra?”
7 A Israel ŋunu Ahab wre na kna mbo, “Ki kro pe nunu wa, u mɛɛ Micaiah, a u lɛ mɛɛ Imlah. La, u kee ni bin, ŋgi na hin? Wra ni kee chichie nya mbe yo, fɔna ni kee fuɛn bɔkɔ.” A Jehoshaphat na kna mbo, “Tolɛɛ, maa yo ma.”
8 A Israel ŋunu wre na u loplombo pre wa wɔ mna tun, na u sɛ pan na Micaiah ni nyaanyaa.
9 Kre nyjila kre krɛrɛ na pre ŋulo shiin pre pe lebiile dodonyi le, mu tni pe ŋujuɛn na, shunshun ŋga kra mbra Samaria chia jlonwee nyu na kre lawee, a keenyanyofɛɛnlɛ pre naa kee nyjɛ pe nyaa yuu pe pan. 10 Keenyanyofɛɛnlɛ pre nunu wa, praa u yeeri, Zedekiah, a u lɛ mɛɛ naa Kenaanah. Wraa wa na tɔɔnrɔ nyamblɛ yɛ ni, a wra yi wru mu yii, mna kna mbo, “Tolɛɛlɛ, kee ŋga o Tafun Nyiɛkpɔɔ wre yuu e pan yi kre mbo, ‘Yire tɔɔnrɔ nyamblɛ nyjɛ ni ee tɛɛ mbe Syria leele kro suulo mbe gbo.’”
11 Kala nunu keenyanyofɛɛnlɛ hamblɛ pre kro naa nyaa na yuu mbo, “E sɛ wi na Ramoth-Gilead leele pre ni, ee pe ja, ŋgi na hin? O Tafun Nyiɛkpɔɔ wre we ti e wi mbe yili.”
12 Bituŋu ŋmba pra tun Micaiah pan wre na sɛ ju mu yo u pan mbo, “Le, ŋga mu shie ŋga, sɛ ketaan ta mu yo ŋunu pan, ŋgi na hin? Keenyanyofɛɛnlɛ pre kro yuu na, na ŋunu sɛ we wi mbe yili.” 13 A Micaiah na kna mbo, “Ŋga o Tafun Nyiɛkpɔɔ wree wa ŋga, kee ŋga we yo ni pan, kre mbe yo.”
14 Ŋga pra le kre, a Ŋunu Ahab na u wie mbo, “Micaiah, o shie mbe sɛ wi na Ramoth-Gilead leele ni, o sɛ ndee, o ti hin?” A Micaiah na kna mbo, “Tolɛɛ, e sɛ wi na pe ni, ee wi mbe yili, Nyiɛkpɔɔ we ti pe to e kɛɛ.” 15 A Ŋunu Ahab na kna mna yo u pan mbo, “Ni yo mu pan na, na mu yire ni yiɛ na paara o Tafun Nyiɛkpɔɔ wre mɛɛ ni kre, ta kpra yuu ni pan. Gbee mni ni tia mu da mu ni ŋga kre kee ŋga ndra na hin?” 16 A Micaiah na kna mbo, “Tolɛɛ, ni nya na pe Israel leele gbun mu nyina nyambie yire na, na mbaala mblɛ pe n lefun ni lɛ, a o Tafun wre na kna na yuu mbo, ‘Pre leele mblɛ, pe n lefun ni, kena ti mbe pe sɛ pe kalonyi nu wejinyiŋge ni.’”
17 A Ŋunu Ahab na kna mu yo Jehoshaphat pan mbo, “Ni ki yo mu pan, na wa ni kee chichie ka nya mbe yo, fɔna kefɔɔn bɔkɔ.” 18 A Micaiah na kna mbo, “Tolɛɛ, kre chiin ma kple, loo kee ŋga o Tafun Nyiɛkpɔɔ wre yuu. Ni o Tafun Nyiɛkpɔɔ wre nya na uu wa mu tni u ŋujɔɔn na nyjeeri, a u bitumblɔ pre u fɛ mu kun kalie na kamɛŋɛ. 19 A o Tafun Nyiɛkpɔɔ wre na wie mbo, ‘Ŋmbi we jaa Israel ŋunu Ahab wre pe brɛbrɛ mbe u yiri mbe sɛ wi na Ramoth-Gilead leele ni mbe ni ti pe u gbo wa hin?’ A Nyjeeri bitumblɔ pre naa kakra lii peyɛ na, na ŋmba ŋga yo, mbe ŋmba ki kna mbe tɛɛ mna. 20 Ŋga praa paara peyɛ pan ma kre, a ŋumu ka na pan mu yire Nyiɛkpɔɔ yiɛ mna kna mbo, ‘Mbe sɛ u fana.’ A o Tafun Nyiɛkpɔɔ wre na ŋumu wre wie mbo, ‘Kolo ŋgi na mu tro mbe jaa u fana hin?’
21 A wra kna mbo, ‘Mbe sɛ le u keenyanyofɛɛnlɛ pre nu mbe ti pe kala fnɛ u pan.’ A o Tafun Nyiɛkpɔɔ na yo ŋumu wre pan mbo, ‘Mu kolo ŋga mu wru kre nyu, sɛ, mu u ta.’ 22 Kena tolɛɛ, o Tafun Nyiɛkpɔɔ wre u tia ŋumu fɔɔn pan mu le mu keenyanyofɛɛnlɛ pre kro nu, a pe kala fnɛ mu pan kre. Nyiɛkpɔɔ wre titi ki yo mu tɛɛ na kre ŋunɔ ŋga nu mu ku.”
23 A Kenaanah biblɔ Zedekiah wre na yiri mna sɛ Micaiah yiɛ ja, mna kna mu u wie mbo, “Nyjila ŋgi nu Nyiɛkpɔɔ ŋumu wre yili mi nu, mu sɛ paara mu pan hin?” 24 A Micaiah na kna mna yo u pan mbo, “Ŋga ble mu fɛ mbe sɛ ndra nyuŋgo-too nu, kre ble kre mu ki chin.” 25 A Ŋunu Ahab na fuu mna yo mbo, “E Micaiah yii e sɛ na u ni chia lopom Amon, na ŋunu biblɔ Joash pan. 26 Na e sɛ, e yo pe pan na ŋunu yo na, ‘E wre blɔ ŋmba le nyuŋgo. Yaa shia u ŋga yaka mbe u ka, fɔna nyumu na paanu, mbe sɛ su na mbe sɛ ŋunɔ ŋga nu mbe ndru mbe pan soo.’” 27 A Micaiah na kna mbo, “Na maa ndru mu pan soo, a yaka nsra mu ta, kena Nyiɛkpɔɔ ma u yire ni na mu paara.” A wra ndru mu yo mbo, “Yire leele mblɛ e fni mna ŋga kro, yaa shia ni kee ŋga ni yo ŋunu pan ŋga fɛɛ.”
28 A Israel ŋunu Ahab, na Judah ŋunu Jehoshaphat na pe ŋunɔwifɛɛnlɛ wru mna sɛ Ramoth-Gilead na. 29 Ŋga pra yo pie sɛ kre, a Ŋunu Ahab na yo Ŋunu Jehoshaphat pan mbo, “Na o waa da ŋunɔ kre yiɛ na, mbe ni ŋunumu yire chinɛ niyɛ na, mbe pia ni chin. La mu wee ti muyɛ na.” Ŋga pra da wa kre, a Israel ŋunu wre na u yirɛ chinɛ uyɛ na, na wii. 30 Ŋga pra gɔli peyɛ na na wii kre, Syria ŋunu wre na yo u sookɛɛ yire lefɛɛnlɛ pan mbo, “Yaa ti mbe e yiɛ nyina ndro wa na, fɔna Israel ŋunu wre bɔkɔ.” 31 Ŋga sookɛɛ yire lefɛɛnlɛ loplombo pre na Jehoshaphat nya kre, praa jawa na Israel ŋunu wre wi, a pra taa u kro, a Ŋunu Jehoshaphat na gble fɔɔri mu le, a o Tafun Nyiɛkpɔɔ wre na ya u na, a wra tia pra laa u kro. 32 Kena ŋga sookɛɛ lefɛɛnlɛ loplombo pre na nya na Israel ŋunu wre ma kre, a pra laa u kro. 33 Ŋga praa wii kre, Syria wifɛɛnlɛ pre wa na u snimi wa pɛpɛŋgɛ, a kra sɛ to Israel ŋunu Ahab wre na. Kra to u wiyirɛ shiin nyjɛ wra le yire lalaa. A ŋunu wre na yo u sookaa ŋmaafun wre pan mbo, “Viŋge mu kna mu yili na ni ni ŋunɔ kre lawee, ŋgi na hin? Snimi to ni na.” 34 Ki ble kre, pra ŋunɔ kre wi chiin a yila na pan mu kɔ. Kre nyjila kre krɛrɛ, na pe Ŋunu Ahab yii mu yire sholo sookaa kre nu, a wra yiɛ kan Syria leele pre na. Pan yila naa tuuri to, a wra fii.