3 O Tafun wre naa wa Jehoshaphat kro, ŋgi na hin? Ŋga wra nɔɔ hle kre, kee nyjɛ u tolɛɛ Ŋunu David naa pini yire na wra taa, u nsraa Baal sɛɛnlɛ yire sumi. 4 Wra pe tolɛɛlɛ Nyiɛkpɔɔ wre sumi, mna li u mbra yire na. U nsra taa kee nyjɛ Israel leele naa pini yire na. 5 O Tafun Nyiɛkpɔɔ wre na tia u ŋunumu kre na yire, a kra tia Judah leele kro naa paan na u kee yirɛ, a kra tia wra uyɛ ta, mna buuro ta. 6 Wra lɛɛ wɔ mna taa o Tafun Nyiɛkpɔɔ wre na, mna tia pra sɛɛnlɛ nyjɛ yiraa wa nyambie lawee yire nu yire, na sɛɛn chlɔ Asherah kɛɛn nyjɛ yiraa wa Judah tra nu yire kro kla.

7 Ŋga wra jɔɔn li kre, ki yɛlɛ taarɛ wo na, wra u loplombo plɛ wɔ, mna pe tun mbe pe sɛ Judah chiɛ yire leele nyina o Tafun Nyiɛkpɔɔ wre mbra yire, pre na lɛ, Benhail, na Obadiah, na Zechariah, na Nethanel, na Micaiah. 8 Levi leele mblɛ pra ya pe na na lɛ, Shemaiah, na Nethaniah, na Zebadiah, na Asahel, na Shemiramoth, na Jehonathan, na Adonijah, na Tobijah, na Tob-Adonijah, na srawɔfun Elishama, na srawɔfun Jehoram. 9 Pra o Tafun Mbra Hlɛ kre wru mna kila mna tro Judah chiɛ yire kro na mna leele pre nyina mbra yire.

10 O Tafun Nyiɛkpɔɔ wre fiɛrɛ na wo waŋgrɛ nyjɛ ŋulo pra Judah fɛ mu kun kre na, a kra tia pe wa nsra ja mbe ŋunɔ wi na Ŋunu Jehoshaphat ni. 11 Philistine waŋgra leele plɛ na pan mna Ŋunu Jehoshaphat kɛ yirɛ, na swafinyi. A Arab waŋgra leele na pan mna u kɛ mbaala kagbenyi kɔɔnashin na lafɛɛ kɔɔnashin, na sikaala kagbenyi kɔɔnashin na lafɛɛ kɔɔnashin.

12 Ŋunu Jehoshaphat naa jaŋga taa kpɔɔ na yaa, a wra mboe sin mna chiɛ yire yɛ fɛ mu kun, mna kakpɔɛ sin Judah tra kre nu mnaa yirɛ teeri wa. 13 Wra yirɛ tataara tɛɛ nyinyi yire nu, mna leele mblɛ pe ŋunɔ wi mu chin titi wɔ mu tɛɛ Jerusalem na. 14 Ŋunɔwifɛɛnlɛ pre loplombo titie pre na yiri pe jlon yire na. Adnah na wi Judah jlom kre wifɛɛnlɛ lopom, a wifɛɛnlɛ mblɛ praa wa u kɛɛ naa kagbenyi lafɛɛ taarɛ. 15 Ŋmba wra taa shiin na wi Jehohanan, u wifɛɛnlɛ mblɛ praa wa u kɛɛ naa kagbenyi lafɛɛ shiin na fuloe jijirɛ. 16 Ŋmba wra taa taarɛ na wi Zicri biblɔ Amasiah, u wifɛɛnlɛ mblɛ praa wa u kɛɛ naa kagbenyi lafɛɛ shiin. Amasiah wra uyɛ wɔ na o Tafun Nyiɛkpɔɔ tnumu tuni. 17 Eliada na yiri Benjamin jlom na, mnaa gbun ni na wii, a wre na wi pe wifɛɛnlɛ pre lopom. U wifɛɛnlɛ pre naa kagbenyi lafɛɛ shiin, a pe kro naa wa na bɛnyi, na yirɛ nyjɛ ni wifɛɛnlɛ peyɛ toni ni. 18 Lopom ŋmba wra taa shiin na wi Jehozabad, a u wifɛɛnlɛ mblɛ praa wa u kɛɛ naa bilɛ kagbeŋge lafaa na fuloe jijirɛ na pe ŋunɔwiyirɛ ni. 19 Kena pre ŋunɔwifɛɛnlɛ mblɛ, pre praa wii na ŋunu shio Jerusalem na. Wifɛɛnlɛ mblɛ wra wɔ a praa Judah chiɛ nyjɛ wra mboe sin mu fɛ mu kun yire sri kre nsra chaa.