2 Ŋga Ŋunu Asa na ki nya ma kre, a wra swafiŋge, na swanyiɛ nyjɛ yiraa wa o Tafun Nyiɛkpɔɔ Suminyuŋgo wa, na ŋunu katoo swa tɛɛhaa wa yire koli, mna leele tun na yi ni mbe pe sɛ Syria ŋunu Ben-Hadad ŋmba wraa Damascus le wre ŋga, mna yo u pan mbo, 3 “Ti mbe mi na ŋu nyu nunu pe, imi na kraa wa ni lɛ, na mu lɛ lalaa kre. Kena ni leele tun na swafiŋge, na swanyiɛ ni na pe paan mu ŋga, mbe mu ŋu na Israel ŋunu Baasha lalaa nyu nunu kre kun, mbe ki ti mbe u laa o na.”

4 Ŋunu Ben-Hadad na kee ŋga Ŋunu Asa na yo u pan kre nɔɔ loo, mna u ŋunɔwifɛɛnlɛ tun na pe sɛ wi Israel chiɛ yire leele ni. Pra sɛ wi na pe ni mna chiɛ nyjɛ pe yeeri Ijon, na Dan, na Abel-Maim, na Naphtali leele trɛ nyjɛ na praa yirɛ teeri yire kro ja. 5 Ŋga Israel ŋunu Baasha na kre kee ŋga loo ma kre, a wra Ramah chia ŋga wraa siin kre ti. 6 A Ŋunu Asa na Judah bilɛ kro wru, a pra sɛ dnɛ, na kɛɛn nyjɛ ni Baasha na tia praa tnumu tuni yire koli Ramah na, mna pan mu u ŋga, a wra yi tɛɛ mna mboe nyjɛ yira Geba, na Mizpah fɛ mu kun yire sin.

7 Kre nyjila kre keenyanyofun ŋmba praa yeeri Hanani wre na sɛ yo Ŋunu Asa pan mbo, “Ŋga mu dankna Syria ŋunu na, a mu n muyɛ wru mu taa o Tafun Nyiɛkpɔɔ wre na kre ndra na, kre nyjila n wa mbe maa wi na Syria ŋunu ŋunɔwifɛɛnlɛ ni mbe pe ja fio. 8 Sɔɔnri imi Cush, na Libya ŋunɔwifɛɛnlɛ pre naa faŋga ni mu da, pe soolo, na sookɛɛ na nɛɛ tataara. Nde ŋga mna dankna mu Tafun Nyiɛkpɔɔ wre na kre, wra tia mna pe ja. 9 O Tafun Nyiɛkpɔɔ wre yiɛ wa waŋgra ŋga kro na, a wra leele mblɛ pee wa ki nu, mu lɛɛ wɔ mu na lii u kee na kre leni faŋga. La, ŋu rɛ mu jijiere kee pe, ki tia mu yire fuŋgaami na shie ŋunɔ mu na wii suwi.”

10 Ŋga kra pan ma kre, Ŋunu Asa krɔ na kun kpɔɔ na keenyanyofun wre ni, a wra tia pra u yii mu le nyuŋgo. Mu yire kre nyjila kre krɛrɛ, Ŋunu Asa naa leele pre plɛ fiŋge ndrashelee ni.

11 Kee nyjɛ Ŋunu Asa na pe mu yire nyjila ŋga wra jɔɔn li mna sɛ su u kumu nyjila kre, pe yi kro nyunɔ mu le Judah, na Israel ŋulo fakee hlɛ kre nu. 12 Ŋga wra jɔɔn li kre, ki yɛlɛ fulo na kɛmbɔkɔɔnanyjirɛ wo na, yira na u gbun u jenyaarɛɛ na. Yira kre na kɔ mu kpɔɔ, a nde u nsraa kaan o Tafun Nyiɛkpɔɔ wre na. Yambla trafɛɛnlɛ na wra uyɛ wru mu taa. 13 Ŋga wra da yɛlɛ fuloe shiin na nunu jɔɔn na kre, wra u tolɛɛlɛ kɔŋgɔ ni. 14 A pra u le wre titi faŋga ŋga wra tuu mu wa nu, David kakpɔɔ kre na Jerusalem na. Pra u fa na tuwe ndiom tɛɛn, na tlade nyininyini ni. Ŋga pra kɔ kre, a pra u le, mna kejenyi fa mu ble mna yi sro mu u le yɛnyiŋge.