Abijah Na Pan Mu Pe Ŋunu Judah Na
15
Ŋga Ŋunu Jeroboam na ŋunumu li Israel na kre, ki yɛlɛ kɛmbɔkɔɔnatarɛ wo na, Abijah na pan mu ŋunumu li Judah tra nu, 2 mna tni Jerusalem na yɛlɛ taarɛ. U lo mɛɛ naa Maacah, Absalom bichlɔ na wi. 3 A sisam nyjɛ u lɛ na pe chɔɔ yire kro wra taa. U nsraa kpra lii o Tafun Nyiɛkpɔɔ wre yiɛ, imi na u tolɛɛ David na pe kre. 4 La, David saara na, o Tafun Nyiɛkpɔɔ na Abijah ŋga biblɔ mbe u kɔɔ u krɔ li mbe ŋunumu li Jerusalem na, mbe Jerusalem le chichie. 5 Ŋga na o Tafun Nyiɛkpɔɔ na yila mna ki pe ma yi na, David na kee ŋga ki tna u pan pe, u nsra ndikana pe u nyu kee na, fɔna Hittite ndro Uriah kee kre chiin bɔkɔ.6 Ŋunɔ ŋga Rehoboam na Jeroboam naa wii kre na kro mna sɛ su Abijah kumu nyjila. 7 Kee nyjɛ Abijah na pe yire kro pra yi nyunɔ mu le hlɛ ŋga nu pra Judah ŋulo fakee nyunɔ kre nu. 8 Abijah na ku, a pra u le David chia wa, a u biblɔ Asa na u krɔ li mna ŋunumu li Judah tra nu.
Asa Ŋunumu Lie
9 Ŋga Ŋunu Jeroboam na ŋunumu li Israel leele na kre, ki yɛlɛ fulo wo na, Asa na pan mna ŋunumu li Judah tra nu. 10 Wra jɔɔn li Jerusalem na yɛlɛ fuloe shiin na nunu. U lelɛɛ na wi Maacah Absalom bichlɔ wre.
11 Asa kepele na o Tafun Nyiɛkpɔɔ yiɛ nyi, imi na u tolɛɛ David na pe kre. 12 Sɛɛnlɛ sumi lawee nyjɛ pra sin sin a bilɛ na chiɛlɛ naa tiɛri yi nu yire krɛrɛ wra yi wɔ tra kre nu, a sɛɛnlɛ nyjɛ u tolɛɛlɛ na yiɛklu mu pe yire kro wra yi koli mna sɛ wo. 13 Hali u lelɛɛ Maacah kuraa, wra u ni ŋuchlɔ jɔɔn kre na, ŋgi na hin? Chlɔ wre na sɛɛn chlɔ Asherah kaan kre ka tɛ na sumi. Asa na sɛɛn kre chile, mna sɛ ki sro Kidron lafolo kre nu. 14 Kraa wa na Asa nsra sɛɛnlɛ sumi hɛɛ yire kla peii, nde wra fraka o Tafun Nyiɛkpɔɔ yiɛ mna sɛ su u kumu ble. 15 Asa na sɛ na swafiŋge, na swanyiɛ, na yirɛ nyjɛ wre na u lɛ na pe cheche mna Nyiɛkpɔɔ ŋga yire ni Suminyuŋgo wa.
16 Nyjila ŋga ni Judah ŋunu Asa, na Israel ŋunu Baasha naa ŋunumu lii kre, nyjila kro nu pan praa ŋunɔ wii. 17 Ŋunu Baasha na wi na Judah tra wolo ni, mna chia ŋga praa yeeri Ramah kre sin mna wifɛɛnlɛ tɛɛ ki na, mbe ndro wa jaa yili, ndee mbe le Judah tra nu. 18 Ŋga kra pan ma kre, Ŋunu Asa na swafiŋge na swanyiɛ nyjɛ yira kro Suminyuŋgo wa, na ŋunu katoo wa yire koli, mna u loplombo pre plɛ tun na yi ni Damascus na. Mna sɛ Syria ŋunu Ben-Hadad ŋga yi yi. Ben-Hadad lɛ mɛɛ naa Tabrimmon, a u tolɛɛ mɛɛ naa Hezion. Mandiɛ ŋga Asa na taa yirɛ yire na na yi kre mbo, 19 “Ni chaa mbe mi na ŋu nyu nunu pe imi na o lɛɛlɛ na pe kre. Kena ni mu kɛ swafiŋge, na swanyiɛ nyjɛ. La, ni chaa mbe ŋu na Israel ŋunu Baasha nɔɔlɔ kun, mbe ki ti mbe u u ŋunɔwiyirɛ koli mbe yili ni tra nu.”
20 Ŋunu Ben-Hadad na li Ŋunu Asa kee kre na, mna u ŋunɔ wifɛɛnlɛ loplombo na pe wifɛɛnlɛ tun, a pra sɛ wi Israel leele pre ni. Pra wi mna chiɛ nyjɛ praa yeeri Ijon, na Dan, na Abel-Beth-Maacah, lawee nyjɛ yiraa wa mu mbra Galilee tapla na kre, na Naphtali tra kre kro, pra wi mna yi shɔ. 21 Ŋga ŋunu Baasha na kee ŋga kra pan kre loo kre, wra Ramah chia kre siɛn ti, u nsra yaka pe wa na, mna yiri wa mna sɛ tni Tirzah na.
22 A Ŋunu Asa na mbra le Judah tra kre nu poŋgo, u nsra ndro wɔ, na ndro kro u sɛ Ramah na, mbe sɛ dnɛ, na kɛɛn nyjɛ ni ŋunu Baasha na tɛɛ na mboo siin mbe ki fɛ mbe kun yire koli mbe pan. Pra sɛ yire yirɛ yire koli, a Asa na yi tɛɛ mna mboo sin, mna chiɛ nyjɛ praa yeeri Mizpah, na Geba yire fɛ mu kun. Yire chiɛ yire naa wa Benjamin tra nu.
23 Kee nyjɛ Ŋunu Asa na pe yire kro, na gbuntitirem kee nyjɛ wra pe, na chiɛ nyjɛ wra mboe sin mu fɛ mu kun yire kro, pra yi kro nyunɔ mu le hlɛ ŋga nu pra Judah ŋulo fakee nyunɔ mu tɛɛ kre nu. La, ŋga wra lɛ blɛlɔɔ kre, yira ka na u pe jewrɛ na, a u nsra ja na nyaari. 24 Ŋunu Asa na ku a pra sɛ u le lebiile lehaa David chia kre na, a u pɔ Jehoshaphat na u krɔ li mna jɔɔn li.
Israel Ŋunu Nadab
25 Ŋga Judah ŋunu Asa na jɔɔn li kre, ki yɛlɛ shiinwo na, kre Nadab biblɔ Jeroboam na pan mna jɔɔn li Israel na. Wra ŋunumu li yɛlɛ shiin mna ku. 26 Pan wra pe to imi na u lɛ na jɔɔn li mna pe kre, wra sisam pe mna o Tafun Nyiɛkpɔɔ wre taan, mna tia Israel leele pre na sisam pe.
27 Ki ble ka, Nadab na u ŋunɔwifɛɛnlɛ na sɛ kakpɔɔ ŋga praa yeeri Gibbethon, a kraa wa Philistine tra nu kre fɛ mu kun, na kolo chaa mbe le chia kre na. A Ahijah biblɔ Baasha ŋmba wra yiri Issachar jlom na wre na kolo cha mna sɛ Nadab gbo. 28 Ŋga kra pan ma kre Baasha na sɛ Nadab krɔ li, mna ŋunumu li Israel na. Kre kee ŋga na pe nyjila ŋga ni Judah ŋunu Asa na jɔɔn li kre, yɛlɛ taarɛ wo na. 29 Ŋga Baasha na jɔɔn li kre to, a wra le Jeroboam sele wolo nu mna pe gbo peii, hali ndro nunu chom kuraa nsra kro. Imi na o Tafun Nyiɛkpɔɔ na yire u sumifun Ahijah ŋmba wra yiri Shiloh na mna yo kre. 30 Ŋga kra tia kre kee ŋga na pe na yi na, Jeroboam na sisam pe, mna tia Israel leele pre na sɛ sisam pe na, a kra o Tafun Nyiɛkpɔɔ, Israel Nyiɛkpɔɔ wre krɔ kun.
31 Kee nyjɛ Nadab na pe yire kro, pra yi nyunɔ mu le hlɛ ŋga nu pra Israel ŋulo fakee nyunɔ mu le kre nu. 32 Ŋga Judah ŋunu Asa, na Israel ŋunu Baasha naa ŋunumu lii kre, nyjila kro nu praa ŋunɔ wii peyɛ na.
Israel Ŋunu Baasha Kee