Jeroboam Biblɔ Kumu
14
Kre nyjila kre na Ŋunu Jeroboam biblɔ ŋmba praa yeeri Abijah wre yaa. 2 A Jeroboam na yo u chɔ pan mbo, “Muyɛ pe, na pe mu nya mbe pie chin na ŋu wi. Mbe mu sɛ Shiloh na, Nyiɛkpɔɔ keenyanyofun Ahijah ŋmba wra yo na pie ni pe Israel ŋunu wre pan. 3 Na mu shie, ta shie na paanu kɛ, na mahɛɛn, na srɛ gbolo nunu ni u pan. Na mu sɛ, we kee ŋga kie pɔ wre ta yo mu pan.”4 A Jeroboam chɔ wre na yiri mna yirɛ nyjɛ u plɔ na yo u cha yire cha, mna sɛ Ahijah katoo Shiloh na. Kre nyjila kre na lɛlɛm tia Ahijah fun nyiɛlɛ na. 5 A na Nyiɛkpɔɔ klu mu paara Ahijah pan mbo, “Jeroboam biblɔ yaa a u tia u chɔ na paan mu pan mbe paan pɔ wre kee wie. Na u pan, we uyɛ pe na wre ma.” A Nyiɛkpɔɔ na Ahijah nyina kee ŋga we yo chlɔ wre pan.
6 Kena ŋga Ahijah na loo na chlɔ wree pan mu yire krɔkro kre, a wra yo mbo, “Le nyuŋgo, ni mu chin na Jeroboam chɔ wi ŋu, mni a mna muyɛ pini na ndro fuŋu wa wi ŋga hin? Kee ŋga ni ta mbe yo mu pan kre n tna. 7 Sɛ yo Jeroboam pan na kee ŋga o Tafun Nyiɛkpɔɔ, Israel Nyiɛkpɔɔ wre yo yi kre, ‘Ndaa mu wɔ mna yili mu leele nu, mna mu pe ni leele Israel leele pre ŋunu. 8 Ndaa ŋunumu kre shɔ David nanae pan mna mu ŋga. La, mu n ja mu pe na ni sumifun David wi. Wre rɛ, wra kpra li mna ni ŋga poŋgo, mna li ni kee na, a kee nyjɛ yi fraka wraa pini. 9 Mu sisam kpɔɔ pe mu wɛ mblɛ pra yiɛklu mna ŋunumu li pre kro na. Mu ni je mu swanyiɛ tɛɛ mu sɛɛnlɛ pe na sumi. Mu tia ni krɔ kun na mu ni. 10 Kre kee ŋga mu pe ŋga ndra na, mbe ti mbe kala mu da mu katoo. Mbe mu nanae bibilɛ gbo peii, mbe yire pe lebiile na mbe sɛ su pe tinlɛ na kro. Mbe mu sele leele nɔɔ pɔ, imi na pe kra poo lawee mbe yi kɔ kre. 11 Mu sele leele pre ŋmba we ku chia lam kpan, nyikaanla pie u ka, a ŋmba we ku nyaalam kpan kɔkɔsakie pie u kaara li. Mi e Tafun Nyiɛkpɔɔ wre ni ki yo.’”
12 A Ahijah na ndru mu yo Jeroboam chɔ wre pan mbo, “Ndru mu sɛ katoo. Pan mu na lee chia to, mbe mu biblɔ wre ku. 13 A Israel leele pre kro we u nyɛni mbe u wru mbe sɛ le. Wre chiin wi Jeroboam sele ndro ŋmba we ta mbe le chiriri, ŋgi na hin? Wre pɔ wre chiin yiɛ na o Tafun Nyiɛkpɔɔ, Israel Nyiɛkpɔɔ wre yiɛ shɔ.
14 O Tafun Nyiɛkpɔɔ we ŋunu tɛɛ Israel leele na. Wre we ti mbe Jeroboam ŋunumulie kre nyu to. Ble kre haa n le, ki da mu kɔ. 15 O Tafun Nyiɛkpɔɔ wre we Israel leele ndie tini, pie na seeri imi na nyaa we yire nyumu nu mbra seeri kre. We Israel leele kɔ kre tra taan ŋga wra pe tolɛɛlɛ ŋga kre na, a we pe gbun mbe nyina Euphrates lɔɔ kre kro, ŋgi na hin? Pe sɛɛn chlɔ ŋga pe yeeri Asherah kre pe, mu na ki sumi, mu tia u krɔ yiri. 16 O Tafun Nyiɛkpɔɔ we laa Israel leele kro, ŋgi na hin? Jeroboam sisam pe, mu tia Israel leele pre sisam pe na.”
17 Jeroboam chɔ wre na ndru mna sɛ Tirzah na. Ŋga wraa lee katoo to, a pɔ wre na ku. 18 A Israel leele pre na u nyɛni mna sɛ u le, imi na o Tafun Nyiɛkpɔɔ na yire u sumifun Ahijah na mna paara kre.
19 Kee nyjɛ Ŋunu Jeroboam na pe kro, ŋunɛ nyjɛ wra wi, na imi wra ŋunumu li mu da kro, pe yi nyunɔ mu le Israel ŋulo fakee hlɛ kre nu. 20 Jeroboam na ŋunumu li yɛlɛ fulo na shiin. A wra ku a pra u le u sele leele lehaa, a u biblɔ Nadab na u krɔ li mna jɔɔn kre li.
Judah Ŋunu Rehoboam Kee
21 Solomon biblɔ Rehoboam na li yɛlɛ fuloe shiin na nunu mna pan mu ŋunumu li Judah tra nu. A wra ŋunumu li Jerusalem na yɛlɛ kɛmbɔkɔɔnashin. Kre kakpɔɔ kre o Tafun Nyiɛkpɔɔ titi na wɔ Israel leele kro trɛ yire nu mbe u mɛɛ tni wa. Rehoboam lo mɛɛ naa Naamah, a wra yiri Ammon na. 22 Judah leele pre na sisam pe mna o Tafun Nyiɛkpɔɔ taan mna tia u krɔ na kun na pe ni, mu wɛ nyjɛ pe tolɛɛlɛ pre kro na pe na. 23 Pra sɛɛnlɛ lawee sin sin, mna dnɛ pe pilɛɛ, mna Asherah kɛɛn pe, a yi yɛ naa wa nyuɛ na, a yɛ naa wa tinyi wrɛ wee jaara, a pra yi sumi. 24 Kee nyjɛ praa pini a yi nsra nyu kuraa na yi na, chiɛlɛ na bilɛ naa wa pe sumindoe yire nu na tiɛri. Judah leele pre naa nyifɛɛrɛ kee nyjɛ mu chin ŋga kro pini, a yire kee yire chɔɔ leele mblɛ praa wa tra kre nu fa kre naa pini, a o Tafun Nyiɛkpɔɔ na pe ni, mna Israel leele pre tɛɛ ki nu.a
25 Ŋga Ŋunu Rehobam na li yɛlɛ kunɔ jɔɔn na kre, Egypt ŋunu Shishak na pan mu wi na Jerusalem leele ni. 26 Egypt ŋunu wre na yirɛ chichiele nyjɛ yiraa wa Suminyuŋgo, na ŋunu katoo wa yire kro, na swanyiɛ yirɛ nyjɛ ni ŋunɔwifɛɛnlɛ peyɛ toni, nyjɛ Solomon na pe mu tɛɛ wa yire kro, pra yi koli mu sɛ. 27 Ŋga kra pan na Ŋunu Rehobam we wiyirɛ yire yɛ pe mbe tɛɛ yi titɛɛ kre, swafre wee wra pe, mna yi wru mu le loplombo mblɛ praa leele mblɛ praa ŋunu katoo jlonwee sri pre kɛɛ. 28 Nyjila kro nu na ŋunu shie o Tafun Nyiɛkpɔɔ Suminyuŋgo wa kre, mbe u shiefɛɛnlɛ pre wiyirɛ yire tio mbe taa u na, na pe waa sɛ mu pan, mbe pe paan yi tɛɛ lawee shiefɛɛnlɛ pre nyuŋgo.
29 Kee nyjɛ Ŋunu Rehobam na pe yire kro, pra yi nyunɔ mu le hlɛ ŋga nu pra Judah ŋulo fakee nyunɔ kre nu. 30 Mu yire kre nyjila kre nu, Ŋunu Rehobam na Ŋunu Jeroboam na pe leele kro naa ŋunɔ wii na peyɛ ni. 31 Rehoboam na ku a pra u le lebiile lehaa David chia kre na. U lo mɛɛ naa Naamah a wra pe Ammon ndro. Rehoboam biblɔ Abijah wra u krɔ li mna pe ŋunu Judah tra nu.