Nyiɛkpɔɔ Keenyanyofun Shemaiah//Wre Na Rehoboam Jaari
11
Ŋga Ŋunu Rehoboam na le Jerusalem na kre, a wra ŋunɔwifɛɛnlɛ kagbenyi lafaa na fuloe jijirɛ wru Judah, na Benjamin jlom yire na mbe pre na Israel leele pre sɛ wi, mbe ki ti u jɔɔn kre ta mbe li nyjeeri haa wa. 2 A o Tafun Nyiɛkpɔɔ na yire u keenyanyofun Shemaiah na mna paara mbo, 3 “Yo Ŋunu Solomon biblɔ Rehoboam, Judah ŋunu wre, na Israel leele mblɛ pee wa mu tni Judah, na Benjamin jlom yire na pre pan na, 4 ‘Kee ŋga pe Tafun Nyiɛkpɔɔ wre yo yi kre, yaa shia sɛ wi na e sele wolo pre ni. E ndru e sɛ katoo. Kee nyjɛ yi lii nyjɛ krɛrɛ, mi ni yi pini.’” Pra kee ŋga o Tafun na yo kre loo, mna ndru. Pe n nsra sɛ wi na Jeroboam na u leele pre ni na.5 Rehoboam na kro Jerusalem na, mna tia pra yɛ sin mu ya mboe nyjɛ yira Judah na Benjamin chiɛ yire yɛ fɛ mu kun yire na. Chiɛ yire na yi, 6 Bethlehem, na Etam, na Tekoa, 7 na Beth-Zur, na Soco, na Adullam, 8 na Gath, na Mareshah, na Ziph, 9 na Adoraim, na Lachish, na Azekah, 10 na Zorah, na Aijalon, na Hebron. Yire chiɛ nyjɛ krɛrɛ, wra tia pra mboe sin mna yi fɛ mu kun Judah, na Benjamin trɛ nyjɛ wra ta yire na. 11 Wra ŋunɔwifɛɛnlɛ loplombo wɔ mu tɛɛ tɛɛ chiɛ yire nyu na, mbe ki ti mbe pe faŋga ta, mna tia pra sɛ sro tɛɛ tɛɛ pe pan wa, yire na olive simi, na simi gbɔ wee ni. 12 Wra ŋunɔ wiyirɛ nyjɛ ni wifɛɛnlɛ peyɛ toni, na chomboolo pe mu tɛɛ chiɛ yire kro na, a kra tia chiɛ yire leele na faŋga ta. Kra tia Judah, na Benjamin trɛ yire naa wa u kɛɛ.
13 Sɔfue, na Levi leele mblɛ praa wa Israel nyjeeri haa wa pre kro naa wa Ŋunu Rehoboam kro. 14 Ŋunu Jeroboam na u bibilɛ mblɛ pie kɔɔ jɔɔn li pre nsra tia Levi leele pre naa sɔfum tunumu kre tuni, a kra tia Levi leele pre na fɛ mna pe trɛ nyjɛ pra ta yire, na pe yurɛ kahɛɛ tra yire ti, mna pan mu tni Jerusalem, na Judah chiɛ yire na. 15 Jeroboam na wre titi srawɔfɛɛnlɛ wɔ, a praa tnumu tuni u sɛɛnlɛ pɛɛri lawee yire nu. Wra pooro tɛɛ mna sikaala na nui gbeele sɛɛnlɛ. 16 La, Israel jlom yire leele mblɛ praa o Tafun Israel Nyiɛkpɔɔ wre haa chaa kre, na taa Levi leele pre na mna pan Jerusalem na, mbe paan sra wɔ mbe pe Tafun Nyiɛkpɔɔ ŋmba wi pe tolɛɛlɛ Nyiɛkpɔɔ wre ŋga. 17 Kra tia Judah ŋunumu kre na faŋga ta. Pra pan mu taa Solomon pɔ Rehoboam wre kro yɛlɛ taarɛ, mna taa Ŋunu David, na Ŋunu Solomon kee nyjɛ wra pe nyina mna chin mu ku yire na.
18 Ŋunu Rehoboam na Mahalath wru mu leŋge, David biblɔ Jeremoth wre bichlɔ na wi Mahalath, a wra u se Abihail na. Abihail lɛ na wi Jesse biblɔ ŋmba praa yeeri Eliab kre. 19 Rehoboam na Mahalath na se bibilɛ taarɛ, pre na lɛ Jeush na Shemariah, na Zaham. 20 A wra ndru mna Absalom bichlɔ Maacah wre leŋge mna Abijah, na Attai, na Ziza, na Shelomith se. 21 Rehoboam na Absalom bichlɔ Maacah wre kori mu wɛ u chiɛlɛ, na u bichilɛ hamblɛ pre kro na. U chiɛlɛ naa kɛmbɔkɔɔnatarɛ, a u bichilɛ naa fuloe taarɛ, a u bibilɛ naa fulo na kɔɔnatarɛ, a bichiɛlɛ naa fuloe taarɛ. 22 Rehoboam na u biblɔ ŋmba praa yeeri Abijah, ŋmba na wi u chɔ Maacah biblɔ wre, wre wra wɔ mbe u kɔɔ u krɔ li, mbe tni jɔɔn kre na. 23 Rehoboam na tro kachindɛ kolo na mna u bibilɛ pre plɛ nyina, a pra sɛ tni Judah na Benjamin tra yire chiɛ nyjɛ na wra mboe yɛ sin mu ya yire na. Wra pe ŋga yirɛ nyjɛ yi pe shian kro, mna chiɛlɛ leŋge tataara mna pe ŋga.