Egypt Ŋunu Shishak Na Sɛ Wi//Mu Judah Leele Ni
12
Ŋga Rehoboam ŋunumu kre na yirehaa ta, mna faŋga ta kre, wre na Judah leele pre kro na laa o Tafun Nyiɛkpɔɔ wre mbra yire kro. 2 Ŋga pra ayɛte o Tafun Nyiɛkpɔɔ wre na kre ndra na, wra pe ndie tini. Ŋga Rehoboam na jɔɔn kre li, kie pe yɛlɛ kunɔ nyu na kre, Nyiɛkpɔɔ na tia Egypt ŋunu Shishak na pan mna wi na Jerusalem leele ni. 3 Wra pan na sookɛɛ kagbeŋge na lafɛɛ shiin, na soolo nduufɛɛnlɛ kagbenyi fuloe taarɛ, na ŋunɔwifɛɛnlɛ tataara mblɛ pra yiri Libya, na Sukkite leele, na Cush leele. 4 Wra sɛ wi mna chiɛ nyjɛ pra mboo sin mu fɛ mu kun yire krɛrɛ shɔ, hali mna sɛ su Jerusalem na.5 Bawa Nyiɛkpɔɔ keenyanyofun ŋmba praa yeeri Shemaiah wre na pan Ŋunu Rehoboam, na Judah loplombo pre pan. Na Shishak fiɛrɛ tia pe kro pan mu ble Jerusalem na, a wra yo pe pan mbo, “Kee ŋga o Tafun Nyiɛkpɔɔ wre yo yi kre, ‘Ŋga e fɛ mu ni wa kre ndra na, ki tia ni e ti mu Shishak ŋga kre.’”
6 Ŋga pra loo ma kre, loplombo pre na ŋunu wre kro na peyɛ nyjii mna yo mbo, “Ŋga o Tafun Nyiɛkpɔɔ yo kre pe kpra.”
7 Ŋga o Tafun Nyiɛkpɔɔ wre na nya na pe peyɛ nyjii kre, a wra tro Shemaiah na mna yo pe pan mbo, “Ŋga pe ta mu peyɛ nyjii kre ndra na, mba pe kla na, mbe pe shɔ fuŋgaami, mba yire Shishak na mbe ni krɔ sisaa kre wɔ mbe yire Jerusalem leele nyina na. 8 La, mbe ti pe u sumi, imi kie pe mbe pe ŋga kii wa ni sumɛɛ, na haka ŋunu sumɛɛ lalaa chin.”
9 Ŋga Egypt ŋunu Shishak na pan mna wi Jerusalem leele ni kre, wra swa yirɛ nyjɛ kee yira shian o Tafun Nyiɛkpɔɔ wre Suminyuŋgo wa, na ŋunu katoo wa yire kro koli mna sɛ. U n na yaka ti wa, hali Ŋunu Solomon ŋunɔwiyirɛ nyjɛ wra swanyiɛ tɛɛ mna gbeele a wifɛɛnlɛ naa yi teeri na pe yɛ toni yire kro, wra yi koli mu sɛ. 10 Ŋga kra pan ma kre, a Ŋunu Rehoboam na tia pra swafre tɛɛ mna yi yɛ gbeele mna le nyjɛ pra koli yire titɛɛ, a wra yi wru mna le ŋunɔwifɛɛnlɛ loplombo mblɛ praa ŋunu katoo jlonwee nyu siri pre kɛɛ. 11 Kena nyjila ŋga ŋunu we na shie o Tafun Nyiɛkpɔɔ wre Suminyuŋgo wa kpan, pie ŋunɔ wiyirɛ yire wru mbe taa u kro. Na pe sɛ mu pan, mbe pe sɛ yi tɛɛ nyuŋgo ŋga nu pe yi teeri kre nu. 12 Ŋga Rehoboam na uyɛ nyjii kre ndra na, o Tafun Nyiɛkpɔɔ wre krɔ n nsra kun na u ni mu sɛ yiɛ, a u nsra tia pra Judah tra kre kla poŋgo. Wra tia Judah tra kre na ndru mu ki yɛ ta.
13 Ŋunu Rehoboam na jaŋga ta mu ya, mnaa u ŋunumu lii Jerusalem na. Ŋga wra jɔɔn kre li kre, na u li yɛlɛ fuloe shiin na nunu, a wra tni jɔɔn kre na yɛlɛ kɛmbɔkɔɔnashin Jerusalem na. Kre Jerusalem ŋga o Tafun Nyiɛkpɔɔ wre na wɔ Israel tra nu kro, mbe u Mɛɛ tni ki na kre. Rehoboam lo na wi Naamah, a wra yiri Ammon tra nu. 14 Wra sisam pe, ŋgi na hin? U nsra lɛɛ wɔ mnaa o Tafun Nyiɛkpɔɔ wre haa chaa.
15 Kee nyjɛ Rehoboam na pe yire krɛrɛ, mu yire u ŋunumu li nyjila mu sɛ su u kumu nyjila kre, pe yi nyunɔ mu le Nyiɛkpɔɔ keenyanyofɛɛnlɛ Shemaiah, na Iddo fakee hlɛ nyjɛ pra nyunɔ mu tɛɛ yire nu. Rehoboam nyjila kre, nyjila kro nu ŋunɔ naa wa wre na Israel ŋunu Jeroboam lalaa. 16 Rehoboam na sni u blɛm kɛ na, a pra sɛ u le u tolɛɛ David chia, Jerusalem na, a u biblɔ Abijah na u krɔ li mna tni jɔɔn kre na.