Kraa wa wa nyjila ka nu a Abijah, na Israel ŋunu Jeroboam wre na to peyɛ na mna ŋunɔ wi. 3 Ŋunu Abijah ŋunɔwifɛɛnlɛ naa kagbenyi lafɛɛ jijirɛ mblɛ nu faŋga nyi, a Ŋunu Jeroboam na u fni na wifɛɛnlɛ kagbenyi lafɛɛ kɔɔnatarɛ mblɛ nu faŋga nyi ni.

4 Abijah na sɛ nduu mu yire nyua Zemaraim na Ephraim nyambie lawee yire nu mna fuu mu yo mbo, “Jeroboam na Israel leele kro, e loo ni pan! 5 Kena e n chin na o Tafun, Israel leele Nyiɛkpɔɔ wre na nyu nunu ŋga kia jaa kla fio pe na Ŋunu David ni, mna Israel ŋunumu kre le wre na u nanae kɛɛ ra? 6 A ŋu Jeroboam, Ŋunu Solomon lopom na wi ŋu, a mna yiri mna mu tafun Solomon wre taan. 7 Ŋga pra Rehoboam tɛɛ jɔɔn kre na mu kɔ kre, a lewaala plɛ na yiri mna ya mu na, a e na sɛ Rehoboam nyu kaanri, ŋgi na hin? Na ŋu Jeroboam n da ndro mbe jaa jawala ŋga lewaala pre na mu ŋga kre je.

8 Fuŋgaami ŋga, mu mu jawala pe na mu yiri mbe o Tafun Nyiɛkpɔɔ wre ŋunumu ŋga u David nanae ŋga kre taan na. Mu kaan mu ŋunɔwifɛɛnlɛ faŋgafɛɛnlɛ tataara pre na, ki tia e jawa na ee jaa yiri mbe ŋunumu ŋga o Tafun Nyiɛkpɔɔ wre David nanae pre ŋga kre taan. Swanyiɛ sɛɛnlɛ nyjɛ Jeroboam na faanri mu tɛɛ na nui biile lɛ yire na e kaan. 9 Ŋu ma mna o Tafun Nyiɛkpɔɔ wre srawɔfɛɛnlɛ mblɛ na lɛ Aaron bibilɛ pre, na Levi leele pre gbun mu ni, mna ŋu titi srawɔfɛɛnlɛ cha imi na leele mblɛ pee wa tra yɛ nu pini kre. A ndro ŋmba we pan na napɔlɔ, na mbapilɛ kɔɔnashin ni to, we jaa pe e sɛɛnlɛ yire sɔfu.

10 Wre rɛ, o Tafun Nyiɛkpɔɔ wre wi o Nyiɛkpɔɔ, a o n laa u kro tun. A o srawɔfɛɛnlɛ mblɛ pe u sumi pre kro, Aaron bibilɛ lɛ, a Levi leele pre na yaa pe na. 11 Bnimi na yilakɔŋgɔ kpan, pe yirɛ sroo sra woni, na yirɛ ndiom taan sroi na o Tafun Nyiɛkpɔɔ wre kaan. Pe Nyiɛkpɔɔ paanu yire taari tebru ŋga ki pe cheche kre na, na kaniɛ kɔɔnashin nyjɛ yi kan kan swanyiɛ kaan kre na yire muni yilakɔŋgɔ. Ŋga Nyiɛkpɔɔ chaa kre o piin, la yire rɛ, e u je. 12 Nyiɛkpɔɔ wa o kro, a wre u yiɛklu na o ni. A na ki pan na oo wi kre, u srawɔfɛɛnlɛ pie bnɔɛ fɔ o pan, mbe o chiin wi na e ni. Kena yire Israel leele yaa tuwi mbe wi na e tolɛɛ Nyiɛkpɔɔ wre ni, ŋgi na hin? Ee wi mbe to.”

13 Nyjila ŋga nu Abijah naa wa na paara kre, na Jeroboam klu mu tia u ŋunɔwifɛɛnlɛ pre plɛ kun mu sɛ ja nyaa pe kro, kena na ki pan na pe wii kre, kena pe yire wa mbra wii na pe ni, mbe hamblɛ pre yire yiɛ mbra wii. 14 Ŋga Judah ŋunɔwifɛɛnlɛ pre na kna mna nya na Jeroboam wifɛɛnlɛ pre pe wa lalaa kre, a pra yire wa mna nyɛni mu o Tafun Nyiɛkpɔɔ wre yeeri, a srawɔfɛɛnlɛ pre na pe bnɔɛ yire fɔ, 15 a Judah wifɛɛnlɛ pre na bibɛɛ fɔɔri mu le, a Abijah na yiɛklu a pra le pe nu na wii, a Nyiɛkpɔɔ na tia pra Jeroboam na Israel leele pre ja. 16 Ki ble kre, Nyiɛkpɔɔ na tia Israel leele pre na fɛ Judah leele pre yiɛ. 17 Abijah na u wifɛɛnlɛ pre na Jeroboam ŋunɔwifɛɛnlɛ pre ja mna pe gbo titi. Pra pe faŋgafɛɛnlɛ kagbenyi lafɛɛ kunɔ gbo ki ble kre. 18 Judah wifɛɛnlɛ pre na wi ki ble kre mna yili, ŋgi na hin? Pra peyɛ wru mu taa pe tolɛɛlɛ Nyiɛkpɔɔ wre na.

19 Judah ŋunu Abijah na Jeroboam na u ŋunɔwifɛɛnlɛ pre kɔŋgɔ ni, mna sɛ Bethel, na Jeshanah, na Ephron, na seechiɛ nyjɛ yira yi fɛ mu kun yire kro shɔ pe pan. 20 Mu yire nyjila ŋga Abijah na pe ŋunu kre, Jeroboam nsra jaŋga ta na u fa kre yi na. O Tafun Nyiɛkpɔɔ wre na u ndie tini, a wra ku. 21 La, Abijah ŋunumu kre na jaŋga ta kpɔɔ mu ya. U chiɛlɛ naa kɛmbɔjijirɛ, a u bibilɛ naa fulo na shiin, a u bichiɛlɛ naa kɛmbɔkɔɔnanu.

22 Ŋunu Abijah kee nyjɛ wra pe, na nyjɛ wra yo u ŋunumu lie nyjila yire nu krɛrɛ kre, pe yi nyunɔ mu le Nyiɛkpɔɔ keenyanyofun ŋmba pe yeeri Iddo wre fakee hlɛ nu.