2 Ŋunu Asa na fraka o Tafun Nyiɛkpɔɔ yiɛ. 3 Wra lawee nyjɛ nu praa shie na sɛɛnlɛ peerii nyambie lawee yire nu kro kla, mna sragbuɛnlɛɛ nyjɛ pra sin na sra woni na sɛɛnlɛ kaan yire gbun mu juari, yire na dnɛ nyjɛ praa peerii yire ni kro, mna sɛɛn chlɔ Asherah kɛɛn nyjɛ pra kan na yi peerii yire kro chile mu wo. 4 Wra mbra le Judah leele pre kro pan na, pra o Tafun Nyiɛkpɔɔ wre chiin sumi, imi na pe tolɛɛlɛ pre naa pini kre, mbe pe li Nyiɛkpɔɔ wre mbra na u kee yire na. 5 Wra tia pra sɛɛnlɛ pɛɛri ndoe nyjɛ yiraa wa nyambie lawee yire nu, na tuwe ndiom tɛɛn sragbuɛnlɛɛ yire kro kla pei Judah tra nu, kra tia wejinyiŋge na pan tra kre nu u nyjila. 6 Wra ka ya mboe nyjɛ pra sin mu Judah kakpɔɛ yire fɛ mu kun yire na, a ndro nsra ŋunɔ wi na u ni, ŋgi na hin? O Tafun Nyiɛkpɔɔ wre na u ŋga wejinyiŋge tra kre nu.

7 Wra yo Judah leele pre pan mbo, “E ti mbe o ka ya mboe nyjɛ yi o kakpɔɛ yire fɛ mbe kun yire na, mbe nyinyi gedenyi nyjɛ na pe yire na chia sri yire sin, mbe jlonwee nyu krɔɛ le yi na, mbe jaa na yi kani kro. Fuŋgaami tra kre wa o kɛɛ, ŋgi na hin? O kee ŋga o Tafun Nyiɛkpɔɔ wre chaa pe mu u ŋga. A u kɛ tɔ o na, mu na o le kolo kro na.” Leele pre na ki nɔɔ loo, mna ŋga wra yo kre pe.

8 Ŋunu Asa ŋunɔwifɛɛnlɛ mblɛ ni wra nyi Judah tra kre nu naa bilɛ kagbenyi lafɛɛ taarɛ, a wra pe kro ŋga ŋunɔwiyirɛ nyjɛ ni pe pe snimi na chombo shio, yire na chomboolo ni. Wifɛɛnlɛ pre plɛ na yiri Benjamin leele nu, praa kagbenyi lafɛɛ shiin na fuloe jijirɛ, pre ŋunɔ wiyirɛ nyjɛ ni praa chomboolo shio yire naa bɛɛlɛ, yire na pe bɛnyi ni.

9 Blɔ wa naa wa, u mɛɛ naa Zerah, a wra pe Cush ndro, wre wra yiri mna yiɛklu na u wifɛɛnlɛ tataara pre ni, na pe sookɛɛ lafɛɛ taarɛ, mna peyɛ kna mna pan mu yire pe chia ŋga pe yeeri Mareshah kre na Judah tra. 10 A Ŋunu Asa na u wolo na sɛ pe fni mbe wi Zephathah landɛɛ ŋga kra mbra Mareshah na kre nu.

11 Bawa Ŋunu Asa na o Tafun Nyiɛkpɔɔ tali mna yo mbo, “Nyiɛkpɔɔ, na ŋu bɔkɔ, ndro wa n wa mbe jaa ya fɔɔnrɔfun na, mbe u jaa wi na faŋgafun ni. Kena o Tafun Nyiɛkpɔɔ, jande ya o na, ŋu na o kaan, a mu mɛɛ ni o shie mbe sɛ wi na ŋunɔwifɛɛnlɛ tataara mblɛ ni. O Tafun, ŋu wi o Nyiɛkpɔɔ, o chin na ndro wa mu ja.”

12 O Tafun Nyiɛkpɔɔ wre na ya Asa, na u wifɛɛnlɛ pre na a pra Cush wifɛɛnlɛ pre ja, a pra fɛ pe yiɛ. 13 A Ŋunu Asa na u ŋunɔwifɛɛnlɛ pre na pe kɔŋgɔ ni mna sɛ su Gerar na. Cush wifɛɛnlɛ pre tataara na to ŋunɔ ki ble kre, ndro nunu nsra kro mbe jaa wi, ŋgi na hin? O Tafun wre na ya Asa ŋunɔwifɛɛnlɛ pre na a pra pe gbo peii. Ki ble kre Judah leele pre na pe yirɛ ta mu foolo tataara. 14 Leele mblɛ praa wa kabɛɛlɛ nyjɛ yira Gerar fɛ mu kun yire na pre na ki loo, mna o Tafun Nyiɛkpɔɔ wre fiɛ. Judah wifɛɛnlɛ pre na Ethiopia wifɛɛnlɛ pre yira tataarɛ ta mu foolo. 15 Pra sɛ lawee nyjɛ nu yurɛ kɔɔnrifɛɛnlɛ na nyi mu tni yire nu, mna sɛ wi na pe ni, mna pe mbaala, na sikaala, na nyuuma tataara kɔɔnri mna sɛ na pe ni Jerusalem na.