Ŋunu Asa Judah Sɛɛnlɛ Kla
15
Kraa wa wa nyjila ka nu, a Nyiɛkpɔɔ Ŋumu na yiri Oded biblɔ Azariah wre nu, 2 a wra yiri mna sɛ Ŋunu Asa fni mna yo u pan mbo, “Ŋunu Asa, na Judah na Benjamin leele kro, e ni kee ŋga loo. Na e mbra o Tafun Nyiɛkpɔɔ wre na, we mbra e na, na e u haa cha, ee u nya, a na e waa u je naa, kena we e je.3 Israel leele pre tataara na laa pe Nyiɛkpɔɔ wre na mu mu, pe nsraa srawɔfun ŋmba we pe nyina ni, a pe nsraa lii Nyiɛkpɔɔ wre mbra yire na. 4 La ŋga kanyana na pe da kre, pra ndru mna pe Tafun Israel Nyiɛkpɔɔ wre haa cha, a wra tia pra u chin. 5 Kre nyjila kre na ndro wa sro mbe kolo kun, ŋgi na hin? Na wejinyiŋge n wa tra kre nu. 6 Kre nyjila kre nu, waŋgra ka we jaa yiri to mbe sɛ na waŋgra ka leele fiŋge, mbe kakpɔɔ ka leele jaa yiri to mbe sɛ ka tɔ mbra wii na pe ni, Nyiɛkpɔɔ wra tia yire tɔɔra kee yire krɛrɛ na le pe nu. 7 La, yire rɛ, e eyɛ le faŋga, yaa ti mbe e kɛ gblɛ, ŋgi na hin? Na e li u kee na wala, e tnumu ŋga e tuni kro, ee ki fɔtɔɔrɔ ta.”
8 Ŋga Ŋunu Asa na yire kee nyjɛ loo Nyiɛkpɔɔ kee nyanyofun Azariah wre pan kre, wra gbun ta mna sɛɛnlɛ nyjɛ yira pe afunyi yirɛ yire kro wɔ mu yili Judah, na Benjamin tra nu, yire na chiɛ nyjɛ wra wi mu shɔ Ephraim nyambie lawee yire nu kre. A wra o Tafun Nyiɛkpɔɔ sragbunu ŋga kraa wa Suminyuŋgo kre lawee vankam kre yɛsimi kre gbeele mu sin.
9 A wra Judah, na Benjamin, na Ephraim, na Manasseh, na Simeon leele mblɛ pra pan mu tni mu chaa pe nu pre kro yeeri mu fni. Kre nyjila kre na Israel leele tataara fɛ mu pan mu taa Ŋunu Asa kro, ŋga pra nya na u Tafun Nyiɛkpɔɔ wre wa u kro kre ndra na. 10 Ŋga Ŋunu Asa na ŋunumu li kre, ki yɛlɛ kɛmbɔkunɔ kre nyiɛpɔ taarɛwo na, kre leele pre na pan mu fni Jerusalem na. 11 Ki ble kre pra nui lafɛɛ kɔɔnashin, na sikaala na mbaala kagbenyi kɔɔnashin mblɛ pra foolo mu ta ŋunɔ pre plɛ tɛɛ mna sra wɔ mna o Tafun Nyiɛkpɔɔ wre ŋga. 12 A pra da na pie lɛɛ wɔ mbe o Tafun Nyiɛkpɔɔ, ŋmba wi pe tolɛɛlɛ Nyiɛkpɔɔ wre sumi. 13 A pe kro na nyu pe nunu na pe ŋmba we je na wa o Tafun Israel Nyiɛkpɔɔ wre sumi kpan, na pɔ wi o, na lopom wi o, na chlɔ wi o, na blɔ wi o, ki fna mbe pe u gbo. 14 Ŋga pra kɔ kre, a pra gblee tɛɛ mna da o Tafun Nyiɛkpɔɔ wre mɛɛ ni, na pie taa u nyu nunu kee kre na, a pra bnɔɛ fɔɔ tɛɛ mna ble kre li. 15 Judah leele pre kro yiɛ na shɔ na pe lɛɛ nunu tɛɛ mu da mu o Tafun Nyiɛkpɔɔ wre ŋga. Pra Nyiɛkpɔɔ haa cha nyibinyiɛ ni, a wra tia pra u nya. Ki tia o Tafun Nyiɛkpɔɔ wre na pe ŋga wejinyiŋge kolo kro na.
16 Ŋunu Asa na u lelɛɛ Maacah kɔ ŋuchlɔ jɔɔn kre na. Wra sɛɛn chlɔ Asherah kaan ŋga u lelɛɛ wre na kan kre chile mu wo, mna yi koli mu sɛ yi sro Kidron landɛɛ kre nu. 17 Kii wa na Ŋunu Asa nsra sɛɛnlɛ sumi, la, u nsra sɛɛnlɛ sumi ndoe nyjɛ yiraa wa nyambie lawee yire nu Israel tra nu yire kla, a nde u kepele na fraka o Tafun Nyiɛkpɔɔ wre yiɛ, mna sɛ su u kumu nyjila. 18 Swafiŋge, na swanyiɛ yirɛ nyjɛ wre na u lɛ na paala pe, mna yi wru mu Nyiɛkpɔɔ ŋga yire, wra pan na yi ni Nyiɛkpɔɔ Suminyuŋgo wa.
19 Ŋunɔ nsraa wa Judah tra nu na, mna sɛ su na Ŋunu Asa na li yɛlɛ fulo na kɛmbɔkunɔ jɔɔn na.