6 A Ŋunu Rehobam na sɛ loplombo mblɛ praa wa u lɛ Solomon nyjila, na u sumi pre wie mbo, “Loplombo, e ni ŋga jawala mbe ni ja mbe leele pre kee ŋga ni pe pan kre nyu wɔ.” 7 A loplombo pre na yo mbo, “Tolɛɛ na mu muyɛ nyjii na sumifun wi, mbe leele mblɛ ŋga, mbe kee chichie ta mbe yo pe pan aŋga, kena mu pe ta mbe pra mu sumi nyjila kro nu.” 8 La, Rehoboam na jawala ŋga loplombo pre na u ŋga kre je, mna sɛ u ndra nyini yirifumblɔ mblɛ wre na pre yiri, a pra pe u sumifɛɛnlɛ pre yeeri, na pe u ŋga jawala. 9 A wra pe wie mbo, “E jawala yi ŋgi hin? Leele mblɛ pan mu yo ni pan na, ni ka kun pe kanyana, na fnaa ŋga ni lɛ na tia praa fnai kre na.” 10 A yirifumblɔ pre na yo mbo, “Tolɛɛ, yo leele mblɛ pe pan na kre kee kre ni mu pan pre pan na, ‘Ni kambɛble kpɔɔ mu wɛ ndoo sɛlɛ na.’ 11 Yo pe pan na, ‘Na ni lɛ na tia e kanyana na kpɔɔ kre, mi we ti e kanyana kpɔɔ mbe wɛ. Na fwɛ ni ndoo naa e gbuun kre, fotro ni mi we e gbun.’”

12 Ble taarɛ kre kɔkro kre, Jeroboam na leele pre kro na ndru mna sɛ Ŋunu Rehobam pan, imi na wra yo pe pan kre. 13 Ŋunu Rehoboam na loplombo pre jawala ŋga pra u ŋga kre je, mna paara leele pre pan krɔ ni. 14 Wra taa yirifumblɔ pre wo na mna kna mu yo loplombo pre pan mbo, “Ndoo na tia e na kala nya, la, mi we ti mbe e kanyana kpɔɔ mbe wɛ. Fwɛ ni wraa e gbuun, la, fotro ni mi we na e gbuun.” 15 Kee ŋga Ŋunu Rehobam na pe kre, Nyiɛkpɔɔ chaara na yi, mbe ki ti mbe kee ŋga Nyiɛkpɔɔ keenyanyofun Ahijah, ŋmba wra yiri Shiloh na wre na yo Nebat biblɔ Jeroboam pan kre pe yɛŋgɛ.

16 Ŋga Israel leele pre na nya na ŋunu wa taa kee ŋga pe yuu kre na kre, a pra gble le mbo,

18 Ŋunu Rehoboam na Adoniram ŋmba wra wɔ a wraa leele le pra tnumu tuni jaŋga na wre tun Israel leele pre pan, a pra u waari dnɛ ni mna gbo. La, Rehoboam na kolo ta mna to u sookaa na, mna fɛ nyaanyaa mu sɛ Jerusalem na. 19 Mu yire kre nyjila kre to, a Israel leele mblɛ praa wa nyjeerihaa pre na yiri mna David na u katoo leele taan mu pan mu su aŋga na.

20 Judah jlom wolo pre chiin pra kro mu taa David nanae pre kro. Ŋga pre Israel leele mblɛ praa wa nyjeeri haa pre kro na loo na Jeroboam yiri Egypt na mu le kre, a pra sɛ fni mna u yeeri mna u pe pe ŋunu.

21 Ŋga Rehoboam na le Jerusalem na kre, wra sɛ ŋunɔwifɛɛnlɛ titie wru mna yili Judah na Benjamin sele wolo nu. Leele kagbenyi lafaa na fuloe jijirɛ, pre wra wru mbe sɛ wi na Israel sele nyjɛ yiraa wa nyjeeri haa wa yire ni mbe u ŋunumu kre shɔ. 22 La, Nyiɛkpɔɔ na yo u kee nyanyofun Shemaiah pan mbo, 23 “Yo Judah ŋunu Rehoboam, Solomon pɔ wre, na Judah, na Benjamin sele wolo pre na leele hamblɛ pre kro pan na, 24 ‘Mi Nyiɛkpɔɔ yo na yaa shia wi na e sele wolo Israel leele pre ni. E ndru e sɛ katoo. Kee ŋga ki pe kre, mi ni tia ki pan ma.’” A pe kro na li Nyiɛkpɔɔ nyu kee kre na, mna ndru mu sɛ katoo.

25 Ŋunu Jeroboam na sɛ chia ŋga praa yeeri Shechem, a kraa wa Ephraim nyambie lawee yire nu kre pɔ, mna mboo sin mu ki fɛ mu kun mna tni wa. Kre kɔkro wra sɛ mboo sin mna chia ŋga praa yeeri Peniel kre fɛ mu kun na. 26-27 Jeroboam na yo uyɛ pan mbo, “Imi na kaalɛɛ shie ŋga, na ni n dɔɔta na ni leele mblɛ waa sɛ Jerusalem na mbe sɛ sra wɔ mbe o Tafun Nyiɛkpɔɔ wre ŋga Suminyuŋgo wa kre, pie kɔɔ pe jawala chinɛ mbe sɛ na Judah ŋunu Rehoboam sumi, mbe kɔɔ paan ni gbo.” 28 Kra tia wra jawala cha mna swanyiɛ tɛɛ mna nui biile shiin pe, mna yo leele pre pan mbo, “Na e yo ee na shie Jerusalem na mbra sumi wa kie pe fnaa ni titi, kena Israel leele, e sɛɛnlɛ nyjɛ yira e wɔ Egypt na yire yi kre.”^a 29 A wra swanyiɛ nui biile pre wa tɛɛ Bethel na, mna haŋu wre tɛɛ Dan na. 30 Ki tia leele pre na sisam pe mnaa shie na sumi Bethel na Dan na wa. 31 Jeroboam na sɛɛnlɛ nyini nyini sin nyuɛ ndrɛ na, mna yi pɛɛrifɛɛnlɛ wɔ sele nyjɛ yi nsra pe Levi sele wolo pre nu.

32 Jeroboam na ble kpɔɛ lie yire tɛɛ nyiɛpɔ kɔɔnatarɛ wo kre ble kɛmbɔkunɔ na, imi na Judah ble kpɔɛ lie na nyi kre. Wra sragbunu sin Bethel na wa na sra woni na swanyiɛ nui biile pre kaan mna sɛɛnlɛ yire pɛɛrifɛɛnlɛ wɔ mu tɛɛ lawee nyjɛ wra sin yire na. 33 Ŋga nyiɛpɔ kɔɔnatarɛ wo kre ble kɛmbɔkunɔ na da kre, wre titi na sɛ Bethel na mna sɛ sra wɔ sragbunu kre na, mna ble kpɔɔ lie ŋga wre titi na le kre nyu nyaa mna Israel leele ŋga.