Judah Nyiɛkpɔɔ Wa
13
O Tafun Nyiɛkpɔɔ na tia u keenyanyofun wa na yiri Judah tra nu mna sɛ Bethel na wa. Nyjila ŋga nu wra le wa kre, na Jeroboam wa mu yire sragbunu kre na mbe sra wɔ. 2 A Nyiɛkpɔɔ keenyanyofun wre na yire o Tafun Nyiɛkpɔɔ nyu kee na mna paara mna sragbunu kre taan mbo, “Ŋu sragbunu, kee ŋga o Tafun Nyiɛkpɔɔ yo yi kre, ‘Pie biblɔ wa se David katoo, mbe u mɛɛ tɛɛ Josiah. Wre we sɛɛnlɛ pɛɛrifɛɛnlɛ mblɛ pe paan na sra woni mu na pre gbo, mbe pe kajle sro mu na.’” 3 A Nyiɛkpɔɔ keenyanyofun wre na ndru mu yo mbo, “Kre sragbunu ŋga we juari, mbe tɔɔnrɔ nyjɛ yii wa ki na kre wo mbe nyina, kre ee chin na o Tafun Nyiɛkpɔɔ wre u yire ni na na paara.” 4 Ŋga Ŋunu Jeroboam na kre kee ŋga loo kre, a wra kna mna kɛ nyini Nyiɛkpɔɔ keenyanyofun wre na mbo, “E wre blɔ ŋmba yii!” Titɛɛ kre nu to, a ŋunu kɛ ŋga wra nyini blɔ wre na kre na ku mu kro ma, a u nsra ja mbe ki kru mbe mbra na. 5 A sragbunu kre na juari, a tɔɔnrɔ nyjɛ yiraa wa ki na kre na nyina mna wo tra, imi na Nyiɛkpɔɔ keenyanyofun wre na ki yo Nyiɛkpɔɔ mɛɛ ni kre. 6 A Ŋunu Jeroboam na yo Nyiɛkpɔɔ keenyanyofun wre pan mbo, “Jande mu Tafun Nyiɛkpɔɔ wre tali ni pan mbe u ni kɛ kre tra ni pan.” A Nyiɛkpɔɔ keenyanyofun wre na o Tafun Nyiɛkpɔɔ wre tali a wra u kɛ kre tra. 7 A ŋunu wre na yo Nyiɛkpɔɔ keenyanyofun wre pan mbo, “Pan mu sɛ li ni katoo. Mbe kee ŋga mu pe ni na kre fɔlɔ tɔ mbe mu ŋga.” 8 A Nyiɛkpɔɔ keenyanyofun wre na kna mbo, “Hali na mu ni ŋga mu yirɛ nyjɛ yii wa pan kro yɔɔ, mba taa mu na, mbe sɛ yaka ka, ndee mbe gbɔ mu lawee. 9 Ŋgi na hin? O Tafun Nyiɛkpɔɔ paara ni pan na mbaa shia li, a mbaa shia gbɔ, a mbaa shia ndru mbe tro kolo ŋga na ni tro mu pan mna kre na.” 10 Ki tia u nsra ndru mu tro kolo ŋga wra yii mu pan kre na, la, kofɔŋgɔ wra wru.11 Kre nyjila kre na Nyiɛkpɔɔ keenyanyofun blɛlɔɔ waa wa Bethel na, a u bibilɛ plɛ na sɛ kee nyjɛ wre Nyiɛkpɔɔ keenyanyofun ŋmba u yiri Judah na wre na pan mu pe, na kee ŋga u yo Ŋunu Jeroboam pan yire nya mna pan mu bɔ pe lɛ pan. 12 A blɛlɔɔ Nyiɛkpɔɔ keenyanyofun wre na pe wie mbo, “Ŋga u yili na shie kre kolo ŋgi u yii hin?” A pra u nyina ki yi. 13 A wra yo u bibilɛ pre pan mbo, e ni bubnɔ wre san e ni ŋga. A pra u san mna u ŋga, a wra u nduu, 14 mna Nyiɛkpɔɔ keenyanyofun wre kɔŋgɔ ni mna sɛ u da na uu wa mu tni tiŋge badaaŋga ka jaara. A blɛlɔɔ wre na u wie mbo, “Ŋu wi Nyiɛkpɔɔ keenyanyofun ŋmba u yiri Judah na wree?” A wra kna mbo, “Mi wi.” 15 A blɛlɔɔ wre na kna mbo, “Ti mbe o sɛ katoo mbe mu sɛ yaka le nyuu.” 16 La, Nyiɛkpɔɔ keenyanyofun ŋmba wra yiri Judah tra nu wre na yo u pan mbo, “Mi na ŋu wa jaa ndru mbe sɛ mu katoo, mbe sɛ yaka ka, ndee mbe sɛ gbɔ. 17 Ŋgi na hin? o Tafun Nyiɛkpɔɔ paara ni pan na mbaa shia li, a mbaa shia gbɔ, a mbaa shia ndru mbe kolo ŋga ni wru mu pan kre yii mbe sɛ.” 18 A blɛlɔɔ Nyiɛkpɔɔ keenyanyofun ŋmba wra yiri Bethel na wre na kna mna yo u pan mbo, “Mi chɔɔ Nyiɛkpɔɔ keenyanyofun wi mi na ŋu wi, a o Tafun Nyiɛkpɔɔ yire nyjeeri bituŋu na mu paara ni pan na ni paan mu wru mbe sɛ katoo, mbe sɛ mu ŋga yaka mbe mu ka, mbe gbɔ.” Nde na kala blɛlɔɔ wre fni. 19 A Nyiɛkpɔɔ keenyanyofun ŋmba wra yiri Judah na wre na kna mna taa Nyiɛkpɔɔ keenyanyofun blɛlɔɔ wre na, mna sɛ u katoo mna sɛ li, mna gbɔ wa.
20 Ŋga pra tni na lii kre, a o Tafun Nyiɛkpɔɔ na paara Nyiɛkpɔɔ keenyanyofun blɛlɔɔ wre pan, 21 a wra kna mna fuu mna yo Nyiɛkpɔɔ keenyanyofun ŋmba wra yiri Judah na wre pan mbo, “O Tafun Nyiɛkpɔɔ yo na mu ndikana pe u na, a mu n taa kee ŋga u yo mu pan kre na. 22 Mu je mu ndru mu pan mu li mu gbɔ lawee ŋga nu u yo na maashia li kre nu. Kre kee ŋga ndra na mu ku, a pia mu le mu sele leele faŋga nu.” 23 Ŋga pra li mna kɔ kre, a blɛlɔɔ wre na bubnɔ san mna Nyiɛkpɔɔ keenyanyofun ŋmba wra yiri Judah na wre ŋga. 24 A wra to kolo na shie to, mna sɛ blɛkpɔɔ fini, a blɛkpɔɔ wre na u gbo. Blɔ wre gboo wre naa wa mu sni kolo wa, a bubnɔ wre na blɛkpɔɔ wre naa wa mu yire gboo wre jaara. 25 A leele plɛ naa tro mna gboo wre nya kolo wa, na blɛkpɔɔ wree wa mu yire u jaara. A pra sɛ Bethel na, chia ŋga na Nyiɛkpɔɔ keenyanyofun blɛlɔɔ wre na nyi kre na, mna sɛ mandiɛ kre bɔ.
26 Ŋga Nyiɛkpɔɔ keenyanyofun blɛlɔɔ wre na mandiɛ kre loo kre, a wra yo mbo, “Wre Nyiɛkpɔɔ keenyanyofun ŋmba, u ndikana pe o Tafun Nyiɛkpɔɔ kee na, kre ki tia u blɛkpɔɔ tun, a u pan mu u gbo, imi na wra yo na we u pe kre.” 27 A wra yo u biile pre pan mbo, “E ni bubnɔ wre san e ni ŋga.” A pra u san mna u ŋga. 28 A wra sɛ Nyiɛkpɔɔ keenyanyofun wre gboo da na uu wa mu sni kolo wa. Na bubnɔ wre na blɛkpɔɔ wree wa mu yire u jaara. Blɛkpɔɔ wre nsra gboo wre ka, a u nsra bubnɔ wre pe yaka. 29 A Nyiɛkpɔɔ keenyanyofun blɛlɔɔ wre na gboo wre wru mna taa u bubnɔ wre na, mna ndru mu pan na u ni Bethel na, a pra u nyɛni mna u le. 30 Wra gboo wre le wre titi sele wolo faŋga, a wre na u biile pre na u nyɛni chichie mnaa yuu mbo, “Ni ŋmbrɔ atɛ, Ni ŋmbrɔ atɛ!”
31 Ŋga pra gboo wre le mna kɔ kre, a Nyiɛkpɔɔ keenyanyofun wre na yo u biile pre pan mbo, “Na ndaa ku e ni le kre faŋga ŋga nu, e ni sniŋge e mbra gboo ŋmba na. 32 Ni chin na kee nyjɛ wra yire o Tafun Nyiɛkpɔɔ nyu kee na mna yo mna sragbunu ŋga kraa wa Bethel na taan, na kee nyjɛ wra yo mna sumi lawee nyjɛ pra sin Samaria na taan yire kro, yie pe yɛŋgɛ.”
Jeroboam Na Sisam Kpɔɔ Pe
33 Hali yire kee nyjɛ krɛrɛ kɔkro, Ŋunu Jeroboam nsra ja mna chinɛ mna laa u sisam kee yire kro. Wra je mna kro na sɛɛnlɛ pɛɛrifɛɛnlɛ woni sele hɛnyi yire nu, pra shie na tnumu tuni sragbuɛnlɛɛ nyjɛ wra sin yire na. A ndro ŋmba we na chaa mbe pe sɛɛnpɛɛrifun kpan, we u wru. 34 Kre sisam ŋga Jeroboam na pe kre na tia u ŋunumu lie kre na to.