4 Ŋga Solomon naa lee kre, u chiɛlɛ pre na u jawala kna a wra sɛ na sɛɛnlɛ sumi. U nsra lɛɛ wɔ mna taa u Tafun Nyiɛkpɔɔ wre kro, imi na u lɛ David na lɛɛ wɔ mna pe kre. 5 Ŋunu Solomon na sɛ na Sidon leele sɛɛn chlɔ ŋga praa yeeri Ashtoreth kre sumi, kre na Ammon leele sɛɛn ŋga praa yeeri Molech, a yira pe afuŋgo yirɛ kre. 6 Ki tia Solomon na sisam pe mna o Tafun Nyiɛkpɔɔ taan. U nsra lɛɛ wɔ mna u sumi imi na u lɛ David na pe kre. 7 Nyua ka naa wa Jerusalem yila finhaa, a Solomon na sɛ lawee sin ki na mna Moab leele sɛɛn ŋga praa yeeri Chemosh, na Ammon leele sɛɛn ŋga praa yeeri Molech a yira pe afuŋgo yirɛ ŋga. 8 Wra ndru mna lawee yɛ sin u chiɛlɛ pre pan, a praa shie na tuwe ndiom tɛɛn sroi, na sra woni na pe sɛɛnlɛ kaan.

9 O Tafun Nyiɛkpɔɔ wre krɔ na kun na Solomon ni, ŋgi na hin? Wra laa wre Israel leele Nyiɛkpɔɔ ŋmba wra uyɛ wɔ mna u nyina gbeeshiin wre kro. 10 Wra Solomon jaari na waa shia taa sɛɛnlɛ kro, a wra Nyiɛkpɔɔ nyu kee je. 11 Ki tia o Tafun Nyiɛkpɔɔ wre na yo u pan mbo, “Ŋga mu n li ni nyu nunu ŋga ni pe na mu ni kre na, mu ni nyu kee je kre ndra na, mbe ŋunumu kre shɔ mu pan mbe mu sumifɛɛnlɛ pre wa ŋga ki yi. 12 La, mu lɛ David ndra na, mba kre kee kre pe mu nyjila ŋga nu, mu biblɔ ŋmba we pan mbe jɔɔn kre li wre kɛɛ mbe ŋunumu kre shɔ. 13 Ni sumifun David na Jerusalem ŋga ki pe ni wo kre ndra na, mba ŋunumu kre kro shɔ mbe yili u kɛɛ, mbe jlom nunu ti u pan.”

14 O Tafun Nyiɛkpɔɔ na tia Edom lepɔɔ wa praa u yeeri Hadad na yiri mna Solomon taan. 15 Nyjila ka nu David na sɛ wi na Edom leele ni mna gbo pe nu, a u ŋunɔwifɛɛnlɛ lopom ŋmba praa yeeri Joab wre na sɛ gboolo pre le mbe pe yiɛ krafa. Joab na u leele pre na sɛ kro Edom na wa nyiɛpɔ kɔɔnanu. Kre nyjila ŋga pra li wa kre, pra Edom bilɛ gbo peii. 16 Joab na Israel leele pre kro na tni wa nyiɛpɔ kɔɔnanu, mna hɛ su na pra Edom bilɛ pre gbo peii mna kɔ. 17 La, kre nyjila kre na pɔ wi Hadad, a wre na Edom leele mblɛ pra pe u lɛ sumifɛɛnlɛ pre plɛ na fɛ mna sɛ Egypt tra nu. 18 Ŋga pra yili Midian na kre, pra sɛ Paran na mna sɛ bawa leele pre plɛ wru mna ya peyɛ na mna sɛ Egypt ŋunu Pharaoh pan, a wra Hadad na leele pre ŋga katoo, na tra a pra tni, a wraa pe kaan sro. 19 Pharaoh yiɛ na shɔ Hadad na, a kra tia wra u chɔ ŋmba praa yeeri ŋuchlɔ Tahpenes wre chunu wru mna u ŋga a wra leŋge. 20 Hadad chɔ wre na biblɔ se mna u ŋga, a pra u mɛɛ tɛɛ Genubath, a ŋuchlɔ Tahpenes na pɔ wre pɔɔri ŋunu katoo wa. Pɔ wre na ŋunu Pharaoh biile praa wa katoo wa. 21 Ŋga Hadad naa wa Egypt tra nu kre wra loo na David ku, a u ŋunɔwifɛɛnlɛ lopom Joab wre ku na. Kra tia Hadad na sɛ yo ŋunu Pharaoh pan mbo, “Ni chaa mbe mu ni wa kolo mbe ni ndru mbe sɛ ni waŋgra nu.” 22 A ŋunu wre na kna mna u wie mbo, “Yira ŋgi mu cha mu la mna, a ki tia mna chaa mbe ndru mbe sɛ mu waŋgra nu hin?” A Hadad na yo mbo, “Yaka n ni shian, la, ni ŋga kolo mbe ni ndru mbe sɛ.” A Pharaoh na u ŋga kolo na u sɛ.

23 Nyiɛkpɔɔ na tia Eliada pɔ ŋmba praa yeeri Rezon wre na yiri mu Solomon taan na. Wre Rezon wre na fɛ mu yili u tafun Zobah ŋunu ŋmba praa yeeri Hadadezer wre pan, 24 mna sɛ bilɛ plɛ cha mu ya uyɛ na. A pra peyɛ pe ŋunɔwifɛɛnlɛ, a wra pe pe lopom. Kre kee ŋga na pe nyjila ŋga nu David na wi na Ŋunu Hadadezer ni mna wre na Syria leele mblɛ pra pan mu ya Hadadezer na pre kro gbo. Ŋga kra pan ma kre, Rezon na u wolo pre na sɛ tni Damascus na, a u kotɔmblɔ pre na u pe Syria ŋunu. 25 Rezon na wi ŋunu Aram na, a wra pe Israel leele loŋgo nyjila ŋga Solomon na li tra mna kro nu, mna Israel leele tɔɔra imi na Hadad na pe kre.

26 Nebat biblɔ ŋmba praa yeeri Jeroboam wre na yiri mna Ŋunu Solomon taan. Wra pe Solomon loplombo pre wa, a wra pe Ephraim ndro mna yiri chia ŋga praa yeeri Zeredah kre na. Lekuchɔ na wi u lo, a praa u yeeri Zeruah. 27 Imi na kra pe a wra yiri mna Solomon taan na yi kre. Solomon na lawee sin mna yi yurɔ tra ni a yira pe mbrɛrɛ mna u lɛ David kakpɔɔ kre fɛ mu kun. 28 Jeroboam na pe yirifuŋu ŋmba wra sheli, ki tia ŋga Solomon na u nya ma kre, a kra tia wra u pe leele mblɛ praa teeri na tnumu tuni jaŋga na Manasseh, na Ephraim sele tra nu pre lefun. 29 Ki ble ka Jeroboam na yili Jerusalem na na shie lawee ka nu, a Nyiɛkpɔɔ keenyanyofun ŋmba praa yeeri Ahijah, ŋmba wraa wa Shiloh na wre na u fni kolo, na pre shiin lɛ wa. Na Ahijah dodoŋgi fɔŋgɔ titnɔŋɔ ka le, a pre shiin praa wa nyaa wa. 30 A Ahijah na dodoŋgi fɔŋgɔ ŋga wra le kre yii mna ki tini mu wla knumɛɛ kɛmbɔshiin. 31 Mna kna mu yo Jeroboam pan mbo, “Dodoŋgi knumɛɛ nyjɛ kɛ shɔ mu ta, ŋgi na hin? Kee ŋga Israel Nyiɛkpɔɔ wre yo mu pan yi kre mbo, ‘Le, ni paan mbe ŋunumu kre shɔ Solomon pan, mbe jlom kɛ le mu kɛɛ. 32 La, ni sumifun David, na Jerusalem leele mblɛ ni wɔ Israel jlom kɛmbɔshiin yire nu pre ndra na, mbe jlom nunu ti Solomon pan. 33 Mbe kre kee ŋga pe, ŋgi na hin? Solomon ni je mu sɛ na Sidon leele sɛɛn chlɔ ŋga pe yeeri Ashtoreth kre sumi, kre na Moab leele sɛɛn ŋga pe yeeri Chemosh, na Ammon leele sɛɛn ŋga pe yeeri Molech kre ni, u n ni kolo wru, ndee mu fraka ni yiɛ, ndee mu li mbra yire na imi na u lɛ David na pe kre. 34 La, mba ŋunumu kre kro shɔ u kɛɛ, Solomon we kro mbra ŋunumu lii mbe sɛ su u kumu ble, a ni Sumifun David ŋmba ndaa wɔ a wraa lii ni mbra na wre na mbe yila mbe ki pe ma. 35 Ŋunumu kre, Solomon biile kɛɛ mbe ki shɔ, mbe mu ŋga sele kɛ yire. 36 La, Solomon bibilɛ pre jlom nunu mbe ti pe pan, mbe ki ti mbe David nɔɔ leele na ŋunumu lii Jerusalem na nyjila kro nu, kre kakpɔɔ ŋga ni wɔ mbe ni mɛɛ kro wa. 37 Jeroboam, mbe mu pe Israel leele ŋunu, mbe mu tra kre le mbe sɛ su mna mu chaa. 38 Na mu li ni kee na, mbe taa ni mbra yire na, mbe fraka ni yiɛ kee kro nu, imi na ni Sumifun David na pe kre, kena mi na ŋu wi. Mbe ti mu pe Israel leele ŋunu, a mbe le na mu nanae we mu krɔ li mbe ŋunumu li, imi ndaa pe mu David ŋga kre. 39 Solomon sisam ŋga u pe ŋga ndra na, mbe David nanae ndie tini, la, nyjila kro nu ma.’”

40 Ŋga kra pan ma kre, Ŋunu Solomon naa chaa mbe Jeroboam gbo, la, wra fɛ mna sɛ tni Egypt ŋunu Shishak pan. Wra tni wa mna sɛ su na Solomon ku.

41 Solomon kee hɛnyi, na kaalɛɛ nyjɛ wra pe, na u kachindɛ kee yire kro, pra yi nyunɔ mu le Ŋunu Solomon fakee hlɛ kre nu. 42 Wra ŋunumu li Jerusalem na mna Israel tra kre kro le yɛlɛ fuloe shiin. 43 Solomon na ku a pra u le u lɛ David chia kre na, a u biblɔ Rehoboam na u krɔ li, mna ŋunumu li.