Israel Leele Na Yiri//Mna Rehoboam Taan
10
Ki ble ka, Ŋunu Rehoboam na sɛ Shechem na, na kre Israel leele mblɛ pee wa nyjeeri haa wa pre sɛ fni wa mbe u tɛɛ jɔɔn na. 2 Kre nyjila kre na Nebat biblɔ Jeroboam wa Egypt tra nu, ŋgi na hin? Nyjila ŋga nu Ŋunu Solomon naa wa kre, wraa u chaa mbe yii, a wra fɛ mu sɛ ndra wa. Ŋga wra loo na pe paan mbe Rehoboam tɛɛ jɔɔn na kre, a wra yili Egypt tra nu wa mu pan. 3 Ŋga wra le kre, a Israel jlom nyjɛ yiraa wa na shie nyjeeri haa kre na leele wɔ mna tun u pan, a wra pan, a wre na pe kro na sɛ yo Rehoboam pan mbo, 4 “Mu lɛ Solomon nyjila kre, wra tia o naa tnumu shelee tuni titi, kena na mu ti mbe o tnumu pe o pan foofoo kre, oo mu sumi.”5 A Ŋunu Rehoboam na kna mu yo pe pan mbo, “E sɛ, ble taarɛwo na, mbe e pan.” A kra tia pra ndru mu sɛ.
6 Ŋunu Rehoboam na sɛ kee kre kna na loplombo mblɛ praa wa u lɛ Solomon jaara u ŋmaa nyjila kre ni mbo, “Kee ŋga leele pre pan mu yo ni pan yi kre, kena kee ŋgi ki fna mbe ni yo pe pan hin?”
7 A loplombo pre na kna mbo, “Na mu kee chichie yo pe pan, na mu nyu pe na, mu kee we pe yiɛ nyi, mbe praa mu sumi nyjila kro nu.”
8 La, Rehoboam na jawala ŋga loplombo pre na u ŋga kre je, mna sɛ jawala shɔ yirifumblɔ mblɛ lɛ u ndra ŋmbilɛ, mnaa u sumi pre pan. 9 Wra yo pe pan mbo, “E ni ŋga jawala. Leele mblɛ pe pan na yuu ni pan na ni ti mbe pe tnumu nyjɛ pie na tuni ni pan yire pe foofoo, kena kee ŋgi ki fna mbe ni yo pe pan hin?”
10 A u ndra ŋmbilɛ pre na kna mbo, “Kee ŋga o jawa mbe mu yo pe pan yi kre, pe gbun yomini na, ‘Ni kambɛble gbidiŋge wɛ ndoo sɛlɛ na. 11 Ndoo na tia e naa tnumu tuni kpɔɔ, la, mbe ti e tun kpɔɔ mbe wɛ ma na. Fwa ni ndoo naa e gbuun, la, fotro ni mi we e frɔ.’”
12 Ble taarɛ kɔkro na kre, Jeroboam na leele pre kro na ndru mna sɛ Rehoboam pan, ŋgi na hin? Wra yo pe pan na pe ndru mbe pan ble taara ble na. 13 Rehoboam na loplombo pre jawala ŋga pra u ŋga kre je, mna paara leele pre pan pɔɔrɔ ni. 14 Yirifumblɔ pre jawala ŋga pra u ŋga kre na wra taa mna yo pe pan mbo, “Ndoo na tia e naa tnumu shelee tuni, la, mbe ti mbe e tnumu tun kpɔɔ mbe wɛ ma na. Fwa ni ndoo naa e gbuun, la, fotro ni mbe e gbun.” 15 Ŋunu Rehoboam na je leele pre kee ŋga praa chaa kre na. Ŋgi na hin? Nyiɛkpɔɔ pan kra yiri, imi kie pe mbe o Tafun Nyiɛkpɔɔ wre kee ŋga wra yire Shiloh ndro keenyanyofun Ahijah na mna yo Nebat biblɔ Jeroboam wre pan kre jaa pe ma.
16 Ŋga Israel leele pre kro na nya na ŋunu wre pe nyu kee kre je kre, a pra yo ŋunu wre pan mbo,
“Yira ŋgi oo ta
David nɔɔ leele pan hin?
Tnu ŋgi oo ta Jesse biblɔ wre pan hin?
E tro mbe o sɛ katoo mbe pe ti.
E ti mbe wraa Ŋunu David katoo
kre le.”
Kra tia Israel leele pre na laa, mu sɛ katoo. 17 La, Israel leele mblɛ praa wa Judah chiɛ yire, na Benjamin leele pre na kro Rehoboam jaara.
18 A Ŋunu Rehoboam na Adoniram, ŋmba wraa u tnumu tunfɛɛnlɛ le a praa tnumu tuni u pan jaŋga na kre tun, mbe u sɛ paara mbe Israel leele pre nyina. A wra sɛ a pra u waari dnɛ ni mu gbo. Ŋga Ŋunu Rehoboam na ki loo kre, a wra pe nyaanyaa, mna nduu u sookaa na, mna fɛ mu sɛ Jerusalem na. 19 Mu yire kre ble kre na mu pan mu su aŋga, Israel leele mblɛ praa wa na shie nyjeeri haa wa kre, pee wa mu yiri mu David katoo leele pre taan tɛ.