16
O Tafun Nyiɛkpɔɔ na paara u keenyanyofun Jehu, Hanani biblɔ wre ni mna u tun mandiɛ ni Baasha pan mbo, 2 “Ndro nsra mu chin, la, mi ni mu yire mu mu pe ni leele Israel wolo pre yɛklo. A mu sisam pe na Jeroboam wi, mu sɛ le na ni leele ni sisam nu. Pe sisam yire tia ni krɔ kun, 3 kena mbe ŋu ŋunu Baasha na mu sele wolo pre kla, imi na ndaa Nebat biblɔ Jeroboam sele wolo pe kre. 4 Mu sele ndro ŋmba we ku chia lam kre, nyikaanla pie u ka, a ŋmba we ku nyaalam kre, kɔkɔsakie pie u li.” 5 Kee nyjɛ ŋunu Baasha na pe, na gbuntitirem kee nyjɛ wra pe yire kro, pra yi nyunɔ mna le hlɛ ŋga nu pra Israel ŋulo fakee nyunɔ kre. 6 Ŋunu Baasha na ku a pra u le Tirzah na, a u biblɔ Elah na u krɔ li mna ŋunumu li.7 Baasha na tia o Tafun Nyiɛkpɔɔ krɔ na kun na u ni, kre ki tia o Tafun Nyiɛkpɔɔ na u keenyanyofun Jehu tun Baasha na u sele wolo pan na mandiɛ sisaa ni. Sisam nyjɛ Jeroboam na pe yire chɔɔ na Baasha na taa, a ŋga wra pe a kra wɛ kuraa na yi na, wra Jeroboam na u sele wolo pre gbo peii.
Israel Ŋunu Elah
8 Ŋga Judah ŋunu Asa na jɔɔn li, ki yɛlɛ fulo na kɔɔnanu wo na Baasha biblɔ Elah na pan mna ŋunumu li Israel na, mna tni Tirzah na yɛlɛ shiin. 9 Ŋunu Elah loplombo pre wa mɛɛ na yi Zimri, a wre wraa u sookɛɛ yire yɔɔ le, a wra jawala sisaa le mbe ŋunu gbo. Ki ble ka, na pee wa Tirzah na wa, a Ŋunu Elah na sɛ simi gbɔ mu to Arza ŋmba wraa ŋunu katoo le wre katoo. 10 Bawa Zimri na le katoo wa, mna sɛ Ŋunu Elah gbo, mna u krɔ li mna ŋunumu kre wru mu li. Ŋga Judah ŋunu Asa na jɔɔn li kre, ki yɛlɛ fulo na kɔɔnashin na kre kee ŋga na pe.
11 Ŋga Zimri wre na pan mna jɔɔn li to, a wra le ŋunu Baasha sele wolo nu mna pe gbo peii. Bibilɛ mblɛ praa wa sele kre nu na pe nɔɔlɔ kro, wra pe gbo peii. 12 O Tafun Nyiɛkpɔɔ nyu kee ŋga wra yire u keenyanyofun Jehu na mna yo mu Baasha taan kre na Zimri na yire mna Baasha sele wolo pre gbo peii. 13 Ŋunu Baasha, na u pɔ Elah na tia o Tafun Nyiɛkpɔɔ, Israel Nyiɛkpɔɔ wre krɔ na kun, ŋga pra sɛ sɛɛnlɛ wɛɛ sumi, mna tia Israel leele na sisam pe kre na. 14 Kee ŋga Elah na pe kro pra ki nyunɔ hlɛ ŋga nu praa Israel ŋulo fakee nyunɔi kre nu.
Israel Ŋunu Zimri
15 Ŋga Judah ŋunu Asa na ŋunumu li, ki yɛlɛ fulo na kɔɔnashin wo na, Zimri na pan mna ŋunumu Israel li mu tni Tirzah na, mna Israel leele le ble kɔɔnashin. Kre nyjila kre na Israel leele wa mu na Gibbethon kakpɔɔ ŋga kraa wa Philistine tra nu kre feni na kuun mbe le ki na mbe wi. 16 Ŋga pe ŋunɔwifɛɛnlɛ pre na loo na Zimri sɛ pe ŋunu wre gbo kre, a pe kro na pe ŋunɔ wifun lopom ŋmba praa yeeri Omri wre kee kpali peyɛ nu, mna u pe Israel leele ŋunu. 17 Ŋga kra pan ma kre, Omri na u ŋunɔwifɛɛnlɛ pre na yili Gibbethon na wa, mna sɛ Tirzah fɛ mu kun. 18 Ŋga Zimri na nya na chia kre to ŋunɔwifɛɛnlɛ pre kɛɛ kre, a wra sɛ ŋunu katoo lam wa, mna sɛ kanhun le ki na, mna uyɛ sro mu gbo. 19 Ŋga wra sisam pe mna o Tafun Nyiɛkpɔɔ taan kre kra tia kre kee ŋga na u da. Imi na Jeroboam ŋmba krɔ wra li kre na pe, a u kee nsra o Tafun Nyiɛkpɔɔ yiɛ nyi kre chɔɔ, pan wra pe na. Wra sisam pe mna tia Israel leele na sisam pe na. 20 Kee nyjɛ Zimri na pe, na jawala fuɛn nyjɛ wra le yire kro, pra yi kee nyunɔ hlɛ ŋga nu pra Israel ŋulo fakee nyunɔ mna le kre nu.
Israel Ŋunu Omri
21 Israel leele pre na yɔ shiin. Pe plɛ naa chaa mbe Ginath biblɔ ŋmba praa yeeri Tibni wre pe ŋunu, a pe plɛ naa chaa mbe pe Omri pe ŋunu. 22 Leele mblɛ pra yire Omri kro kre na yirehaa ta. Ki nsra mu a Tibni na ku, a pra Omri tɛɛ ŋunu. 23 Ŋga Judah ŋunu Asa na jɔɔn li, ki yɛlɛ fulo na kɛmbɔnunu wo na, kre Omri na pan mna pe Israel ŋunu yɛlɛ kɛmbɔshiin mna tni Tirzah na yɛlɛ kɔɔnanu. 24 Kre nyjila kre wra nyambie ŋga praa yeeri Samaria kre lɔ, swafiŋge kradnɛ lafaa na fuloe shiin na kɛ blɔ wa pan, u mɛɛ naa Shemer. Omri na mboo sin mna nyua kre fɛ mu kun, mna chia sin ki na, mna ki mɛɛ tɛɛ Samaria. Blɔ ŋmba pan wra nyambie kre lɔ kre mɛɛ na wra ki tɛɛ.
25 Omri na sisam pe mna o Tafun Nyiɛkpɔɔ wre taan mna wɛ ŋulo mblɛ pra yiɛklu u pan pre na. 26 Pan wra pe na Jeroboam wi. Wra tia o Tafun Nyiɛkpɔɔ, Israel leele Nyiɛkpɔɔ wre krɔ na kun. Wre titi na sisam pe, mna tia Israel leele pre na sisam pe na, mna sɛ sɛɛnlɛ wɛɛ sumi. 27 Kee nyjɛ Omri na pe mu tɛɛ, na u kepele krɛrɛ, pra yi nyunɔ hlɛ ŋga nu pra Israel ŋulo fakee nyunɔ mu le kre nu. 28 Omri na ku a pra u le u chia Samaria kre na, a u biblɔ Ahab na u krɔ li mna tni jɔɔn kre na.
Israel Ŋunu Ahab
29 Ŋga Judah ŋunu Asa na ŋunumu li, ki yɛlɛ fulo na kɛmbɔkɔɔnatarɛ wo na, kre Omri biblɔ Ahab na pan mna jɔɔn li Israel tra nu, mna tni Samaria na yɛlɛ fulo na shiin. 30 Wra sisam pe mna o Tafun Nyiɛkpɔɔ wre taan mna wɛ ŋulo mblɛ pra yiɛklu u pan pre na. 31 U nsraa fiɛ na we taa Jeroboam sisam nyjɛ wra pe yire kro, yire kɔkro ni wra sɛ Sidon ŋunu Ethbaal bichlɔ Jezebel wru mna leŋge, mna sɛ sɛɛn ŋga praa yeeri Baal kre sumi. 32 Wra sɛɛn Baal kre nyuŋgo sin Samaria na, mna sragbunu sin ki pan sɛɛn nyuŋgo kre lam. 33 Wra ndru mna sɛɛn chlɔ Asherah kaan kan mu mbra sɛɛn Baal kre na. Wra krɔ kee tataara pe mna wɛ ŋulo mblɛ pra yiɛklu u pan pre na, a kra tia o Tafun nyiɛkpɔɔ, Israel Nyiɛkpɔɔ wre krɔ na kun.
34 U nyjila, Hiel ŋmba wra yiri Bethel na wre na ndru mna Jericho sin. Ki tia imi na o Tafun Nyiɛkpɔɔ na yire Nun pɔ Joshua na mna yo kre, ŋga Hiel na Jericho chia kre nɔɔ le mbe ki sin to a u biblɔ lopom ŋmba praa yeeri Abiram wre na ku. A ŋga wra kɔ mna chia kre jlonwee nyu krɔɛ yire le to, a u pɔ ble na ku. Kra pe ma imi na o Tafun Nyiɛkpɔɔ na yire Nun pɔ Joshua na mna paara kre.a