1 Kings 17

Elijah Na Tia Wam Na Yire

Nyiɛkpɔɔ keenyanyofun wa praa u yeeri Elijah, a wra yiri chia ŋga praa yeeri Tishbe, ŋga kraa wa Gilead tra nu kre na. Ki ble ka wra yo Ŋunu Ahab pan mbo, “O Tafun, Israel Nyiɛkpɔɔ ŋmba uu wa nyjila kro nu, a ndaa u sumi wre mɛɛ ni, ni yuu mu pan na mɛŋɛ, ndee nyiɛ wa wo yɛlɛ nyjɛ o yiɛ ŋga nu, fɔna ni yo yi wo mbe yi chiin wo.” 2 A o Tafun Nyiɛkpɔɔ wre na yo Elijah pan mbo, 3 “Yili lawee ŋga nu, mu sɛ yila finhaa, mu sɛ ndra lɔɔ Cherith ŋga kii wa Jordan yilafinhaa kre lawee. 4 Kre lɔɔ kre nu mu na gboo, a bawa mbe ti gɔɔgɔɔe na paan mbra mu kaan sro.” 5 Elijah na li o Tafun Nyiɛkpɔɔ nyu kee na, mna sɛ tni Cherith lɔɔ kre mbɛɛ na. 6 Lɔɔ kre nu wraa gboo, a gɔɔgɔɔe naa paan na u kaan paanu na kaara bnimi na yilakɔŋgɔ. 7 Kraa wa wa a lɔɔ kre na yua, ŋga nyiɛ nsraa paan kre ndra na.

Elijah Na Zarephath Lekuchɔ Wre

8 A o Tafun Nyiɛkpɔɔ na yo Elijah pan mbo, 9 “Yiri mu sɛ Sidon mbɛɛ chia ŋga pe yeeri Zarephath kre na mu sɛ tni wa. Lekuchɔ waa wa chia kre na, ni yo u pan na wra mu kaan sro.” 10 A Elijah na yiri mna sɛ Zarephath na wa, ŋga wraa dani chia kre jlonwee nyu na to, mna lekuchɔ wa nya na u kejenyi chaa. A Elijah na yo u pan mbo, “Jande maa, ni ŋga nyumu ka mbe ni gbɔ.” 11 Ŋga chlɔ wre naa shie mbe sɛ nyumu ko mbe pan kre, a Elijah na kna mbo, “Jande paanu ka cha mu ya nyumu kre na ni pan.” 12 A chlɔ wre na kna mbo, “O Tafun Nyiɛkpɔɔ ŋmba uu wa nyjila kro nu wre mɛɛ nu, ni yuu mu pan na paanu fiɛn kuraa n wa ni pan. Yira ŋga kii wa ni pan kro yi mimi kie pe kɛ nyini, kre kii wa ni pan chɔ nu, kre na olive simi chiɛri ka gbolo nu. Yire na ni pan kejenyi cha haa, mbe sɛ yi pe mbe mi na ni biblɔ ta mbe ka. Kre kie pe o sro haŋa, na ki kɔ to, klo kie o gbo.” 13 A Elijah na yo lekuchɔ wre pan mbo, “Maa kawa na ki ni, sɛ sro kre pe mu pan mu ni ŋga tun, mu chin mu sɛ ka pe mbe ŋu na mu pɔ wre li. 14 Ŋgi na hin? Kee ŋga o Tafun Nyiɛkpɔɔ, Israel Nyiɛkpɔɔ wre yo yi kre, ‘Mimi wa kɔ chɔ ŋga nu ki nyi kre nu, a simi kre wa kɔ ki gbolo nu mbe sɛ su na mi e Tafun Nyiɛkpɔɔ we ti nyiɛ pan.’”^a 15 A lekuchɔ wre na sɛ kee ŋga Elijah na yo u pe kre pe, ŋga kra pan ma kre wra sro ta na pini blenyini, a wre na Elijah, na u sele wolo na ta na lii. 16 Imi na o Tafun Nyiɛkpɔɔ na yo Elijah pan kre, mimi nsra kɔ chɔ kre nu, a pan chɔɔ simi kre nsra kɔ gbolo kre nu.

17 Nyjila ka nu, lekuchɔ wre biblɔ wre naa yaa. Yira kre nsraa prɔ, mna kɔ mu pɔ wre gbo. 18 A lekuchɔ wre na sɛ yo Elijah pan mbo, “Nyiɛkpɔɔ ndro, mni a mu ni pe imi ŋga hin? Paan mu pan mbe ti ni pɔ ku, mu ni sɔɔnri na ni sisaa pe mu Nyiɛkpɔɔ taan ree?”

19 A Elijah na yo mbo, “Pan na pɔ wre ni mu ni ŋga.” A wra pɔ wre shɔ u lo wre kɛɛ, mna nduu na u ni nyuŋgo nyjeeri wo ŋga nu wre Elijah na nyi kre nu, mna sɛ u taa u dɛŋglɛ na, 20 mna nyɛni mu Nyiɛkpɔɔ yeeri mbo, “Ni Tafun Nyiɛkpɔɔ, mni a mu keesaa ŋga nyini pe lekuchɔ ŋmba pan ni nyi ŋga na, mu u pɔ gbo ŋga hin?” 21 Elijah na kna mna juule pɔ wre na gbee taarɛ mna nyiɛtali mbo, “Ni Nyiɛkpɔɔ, jande ti mbe pɔ ŋmba nyi.” 22 A o Tafun Nyiɛkpɔɔ na Elijah nyiɛtalaa loo, a pɔ wre na ndru na ŋuni, mna yiri. 23 A Elijah na pɔ wre wru u nyuŋgo wa, mna tii na u ni tra, mna sɛ u lo ŋga u wi mna yo u pan mbo, “Le, mu pɔ wre nyi.” 24 A lekuchɔ wre na kna mbo, “Fuŋga ni chin na Nyiɛkpɔɔ ndro wi ŋu, a ki pe kpra na o Tafun Nyiɛkpɔɔ wre u yire mu na na paara.”