7 Ŋga Obadiah na to kolo na shie kre to, mna Elijah fni. Ŋga wra u fni kre wra u chin, a wra lɛɛlɛ u yiɛ mna u wie mbo, “Ni Tafun Elijah ŋu wi woo?” 8 A Elijah na kna mbo, “Mi wi, sɛ yo mu tafun ŋunu pan na nii wa mna.” 9 A Obadiah na kna mbo, “Yira ŋgi ni pe a mna chaa mbe ni le kala nu, mbe Ŋunu Ahab ni gbo ŋga hin? 10 Ŋga o Tafun Nyiɛkpɔɔ, mu Nyiɛkpɔɔ wree wa nyjila kro nu ŋga wala, mba mu fana, ŋunu mu cha waŋgra ŋga, na tra ŋga kro nu. Na u waŋgra ka ŋunu wie a u yo na u n mu nya kre, Ahab we ti mbe ŋunu wre pan mbe da na yɛŋgɛ yi na mu n wa wa. 11 Kre mu chaa mbe mi sɛ yo u pan na ‘Muu wa mnaa?’ 12 Na ni waa yili mna mu sɛ mandiɛ kre bɔ haa, a o Tafun Nyiɛkpɔɔ Ŋumu waa pan mu mu bali mu sɛ lawee ŋga ni n chin nu, a ndaa ndru mu pan mu mu cha mu la, we ti mbe pe ni gbo. Sɔɔnri na mu yire ni bimi, kre ni o Tafun Nyiɛkpɔɔ wre sumi na kpra ni. 13 Mu n loo na ŋga Jezebel naa o Tafun Nyiɛkpɔɔ Keenyanyofɛɛnlɛ pre kuu kre, ndaa pe lafaa wru mna pe yɔ shiin mna sɛ pe le nyua weele yɛ nu, mnaa pe kaan sro na nyumu? 14 Kre mu yo ni sɛ yo ŋunu pan na muu wa mnaa? Na ni sɛ wa mba niyɛ ndra ta.” 15 A Elijah na kna mbo, “Ŋga o Tafun Nyiɛkpɔɔ Jaŋgafun ŋmba ni sumi wre wa ŋga, mbe ni yɛ wɔ mbe Ŋunu Ahab nyina aŋga.”

16 A Obadiah na sɛ Ŋunu Ahab pan mna sɛ Elijah kee yo u pan, a Ahab na yili mbe sɛ Elijah fni. 17 Ŋga Ŋunu Ahab na Elijah nya kre, kee ŋga wra yo yi mbo, “Ŋu wi ŋmbaa? Ŋu mu Israel leele le kre kanyana ŋga sembremu nu.” 18 A Elijah na yo mbo, “Mi ma ni Israel leele le kanyana nu. Ŋu na mu lɛ katoo leele e pan na ki ni. Yire e ndikana pe o Tafun Nyiɛkpɔɔ nyu kee na, mu sɛ na Baal sɛɛnlɛ yire sumi. 19 Ni chaa mbe mu Israel leele pre kro yeeri mbe pe ni fni Nyua Carmel na fuŋgaami. Ta paan na Baal pɛɛrifɛɛnlɛ lafɛɛ jijirɛ na fuloe shiin na kɛ, na Asherah pɛɛrifɛɛnlɛ lafɛɛ jijirɛ mblɛ pe lii Jezebel yiɛ pre kro ni.”

20 A Ahab na Israel leele pre kro yeeri, pre na pe sɛɛnlɛ yire pɛɛrifɛɛnlɛ ni kro, a pra sɛ fni Nyua Carmel na wa. 21 A Elijah na yo leele pre pan mbo, “Nyjila ŋgi e sri mbe tɛɛ mbe jawala wru tɛ hin? Na e jawa na o Tafun Nyiɛkpɔɔ wre wi Nyiɛkpɔɔ yɛŋgɛ, kena e u sumi, la, na Baal wi Nyiɛkpɔɔ kena e ki sumi.” La, leele pre nsra nyu kun. 22 A Elijah na kna mbo, “Mi chiin wi o Tafun Nyiɛkpɔɔ keenyanyofun ŋmba u kro, la, Baal pɛɛrifɛɛnlɛ lafɛɛ jijirɛ na fuloe shiin na kɛ pee wa. 23 E pan na nabilɛ shiin ni, e Baal pɛɛrifɛɛnlɛ pre ŋga nunu, mbe pe u gbo mbe u knumu bujibuji, mbe taa kejenyi na, la, yaashia kanhun le yi na. Nablɛm haŋu wre, mbe mi u pe ma na. 24 Kena e ti mbe Baal pɛɛrifɛɛnlɛ pre pe sɛɛn kre tali, mbe mi o Tafun Nyiɛkpɔɔ wre tali, Nyiɛkpɔɔ ŋmba we pan kanhun ni, kena wre wi Nyiɛkpɔɔ titi.” A leele pre na gble le mna pni shɔ.

25 A Elijah na yo Baal pɛɛrifɛɛnlɛ pre pan mbo, “Ŋga yire nɛɛ ŋga, e klu e e nuu wɔ e e wo pe. Na e kɔ mbe e e sɛɛn kre tali, la yaashia kanhun le kejenyi yire na.” 26 A pra nuu ŋmba pra pe ŋga wre wru, mna u gbo mna u pe. Ŋga pra kɔ kre, a pra gble le mna Baal yeeri chiin mu yire bnimi mu sɛ su lafo na, mnaa yuu mbo, “Baal shɔ o pan ɛ.” Praa yoo na sragbunu ŋga pra sin kre feni na kuun. Ande Baal nsra shɔ pe pan. 27 Ŋga lafo na da kre, a Elijah naa pe pini na tɛɛ mbo, “E u tali kpɔɔ, e nyiɛ wi, aada lafo ŋunɛ u ŋnu, ndee uu wa mu tni na jawa, ndee aada kolo u kun, ndee aada u sni na ŋnu, kena e gble le kpɔɔ mbe u nyi.” 28 A pra gble le kpɔɔ, na peyɛ knumu na brɔfiɛnlɛ yiɛshiin, na chomboolo ni, a nyimi naa woni, imi na pe paala nyina kre. 29 Pra kro na gble badɛnyi leni a yila na pan na koo, na pra yaka loo.

30 A Elijah na yo leele pre pan mbo, “E flo e da ni na.” A pe kro na pan mna u fɛ mu kun. Bawa wra o Tafun Nyiɛkpɔɔ sragbunu ŋga kra juari mu wo kre gbeele mu yire, 31 mna dnɛ kɛmbɔshiin koli. Dnɛ yire yire mu Jacob bibilɛ kɛmbɔshiin pre ŋga. Wre Jacob wre o Tafun Nyiɛkpɔɔ na ŋga mɛɛ Israel kre.^a 32 Yire dnɛ yire ni wra tɛɛ mna o Tafun Nyiɛkpɔɔ sragbunu kre gbeele mu sin. A wra wee kun mna ki fɛ mu kun. Wee kre na vala mbe nyumu galɔm jijirɛ jaa yire ki nu. 33 A wra kejenyi yire koli mu taa sragbunu kre na, mna nuu wre knumu bujibuji mna taa kejenyi yire na. A wra yo leele pre pan mbo, “E chɔɛ badɛnyi jijirɛ tɛɛ e nyumu ko e wo sra yurɔ wre, na kejenyi yire na.” A leele pre na ki pe ma. 34 A wra yo pe pan mbo, “E ko e wo na.” A pra ko mu wo, a wra ndru mu tia pra ko mu wo na ma gbee taarɛ. 35 Nyumu kre na sragbunu kre nyiŋge, mna wee ŋga pra tuu mna ki fɛ mu kun kre nyi.

36 Ŋga yila kɔŋgɔ sra wɔ nyjila na da kre, a Nyiɛkpɔɔ keenyanyofun Elijah na flo mna da sragbunu kre na mna nyiɛtali mbo, “O Tafun Nyiɛkpɔɔ, Abraham, na Isaac, na Israel Nyiɛkpɔɔ, aŋga ble ŋga, ti mbe leele mblɛ chin na ŋu wi Israel leele Nyiɛkpɔɔ, a mu sumifun wi mi, a kee nyjɛ ni pini ŋga kro mu nyu kee na ni yire na yi pini. 37 Kena Nyiɛkpɔɔ jande shɔ ni pan, mbe ki ti leele mblɛ chin na ŋu wi o Tafun Nyiɛkpɔɔ, ti mbe pe chin na ŋu wi Nyiɛkpɔɔ ŋmba mu pe jawala chinɛ, mbe pe ndru mbe pan mu pan.” 38 O Tafun Nyiɛkpɔɔ wre na tia u kanhun na yiri nyjeeri mna pan mu sra yurɔ wre, na kejenyi, na dnɛ yire kro sro, mna nyi mu tro tra kre yiɛ na, a nyumu kre na yua wee kre nu. 39 Ŋga leele pre na kee kre nya ma kre, a praa tuuri tra na yuu mbo, “O Tafun Nyiɛkpɔɔ wre, Nyiɛkpɔɔ wi yɛŋgɛ!”

40 A Elijah na yo mbo, “E Baal pɛɛrifɛɛnlɛ pre yii, yaashia ti mbe pe wa fɛ.” A leele pre na pe yii kro, a Elijah na tia pra sɛ na pe ni Kishon lafolo kre mbɛɛ na mna sɛ pe gbo wa peii.

41 Bawa Elijah na yo Ŋunu Ahab pan mbo, “Fuŋga rɛ, sɛ li mu gbɔ. Ni nyiɛ tiŋge ndru.” 42 Ŋga Ahab na sɛ lihaa kre, a Elijah na nduu Nyua Carmel kre ndra na, mna sɛ kosie kan tra, mna ndra kru mna le u kosie lalaa, 43 mna yo u sumifun wre pan mbo, “Sɛ yire mna le epo haa wa.” A u sumifun wre na sɛ le wa mna ndru mu pan mu yo u pan mbo, “Ni n yaka nya wa.” Elijah na tia wra sɛ le wa ma gbee kɔɔnashin. 44 Gbee kɔɔnashin wo kre na kre, wra ndru mna pan mu yo u pan mbo, “Ni tlo fiɛn ka nya, ki kpɔɔrɔm n da na lewo kɛ ni, a ki yili epo kre nu na paan.” A Elijah na yo u sumifun wre pan mbo, “Sɛ yo Ŋunu Ahab pan na u le u sookaa nu mbe sɛ katoo nyaanyaa, mbe nyiɛ waa shia u kun kolo.” 45 Ki nsra da nyjila ka, na nyiɛ wɔ poŋgo, a fuflɛ naa gbuun, a nyiɛ badaaŋga ka naa paan. A Ahab na sɛ nduu u sookaa na mna ndru mna sɛ chia ŋga praa yeeri Jezreel kre na. 46 O Tafun Nyiɛkpɔɔ jaŋga na pan mna le Elijah nu, a wra u dodonyi yii mna pɔ u sɛlɛ chiriri mna fɛ mna sɛ Ahab tro mna sɛ le Jezreel na.