Elijah Na Sɛ Nyua Horeb Na
19
Ŋunu Ahab na kee nyjɛ Elijah na pe yire kro yo u chɔ Jezebel pan, imi na pra Baal pɛɛrifɛɛnlɛ pre gbo gbo. 2 A chlɔ wre na ndro tun Elijah pan mbo, “Baŋga imi nyu na ni nsra mu pe imi na mna Baal pɛɛrifɛɛnlɛ pre pe kre, kena sɛɛnlɛ yire yi ni gbo.” 3 Ŋga kra pan ma kre, fiɛrɛ na Elijah yii, na pie u gbo, a wra u sumifun wre wru a pra sɛ Beersheba ŋga kraa wa Judah tra nu kre na. A wra sɛ u ti wa, 4 mna nyaari ble poŋgo mna sɛ tablɔ tra lawee kre nu. Wra sɛ da tiŋge ka nyimi mna tni wa mbe wuu, bawa wraa nyiɛtali na na wra ku kaa ki prɔ u pan, a wraa yuu mbo, “O Tafun Nyiɛkpɔɔ fuŋga rɛ ni fna, jande ni nyiɛ wru mbe ni sɛ wuu, ni n prɔ ni tolɛɛlɛ pre na.” 5 A wra gblɛka mna sni tiŋge kre jaara na ŋnu. Titɛɛ kre nu to a nyjeeri bituŋu wa na pan mna kɛ taa u na, mna yo u pan mbo, “Yiri mu li.” 6 A wra nyi mna kna mu le mna paanu ŋga pe fɔ kanhun na nyumu nya gbolo ni u ndra nyjeeri. A wra wru mna ka, mna gbɔ, mna ndru mna gblɛka mu sni na. 7 A o Tafun Nyiɛkpɔɔ nyjeeri bituŋu wre na ndru mna pan mu u nyi shiinwo na mna yo u pan mbo, “Yiri mu li, ŋgi na hin? Kolo ŋga mu kuun kre le.” 8 A Elijah na yiri, mna ka mu gbɔ. Sro kre na tia wra faŋga ta mna nyaari ble fuloe shiin mna sɛ nyua cheche Sinai na.a 9 Bawa wra sɛ le nyua wee ka nu mna sni wa. A o Tafun Nyiɛkpɔɔ na paara na u ni wa mbo, “Elijah, yira ŋgi mu pini mna hin?”10 A wra kna mbo, “Ni Tafun Nyiɛkpɔɔ Jaŋgafun, ni yiɛ nyina mu sumiɛ na. La, mu nyu nunu ŋga mna pe na Israel leele ni kre, pe ki kla, mu mu sragbuɛnlɛɛ yire juari, mu mu keenyanyofɛɛnlɛ pre gbo peii brɔfiɛn yiɛshiin ni. Mi chiin ni sɛ kro, a pra ni chaa mbe gbo na.”b 11 A o Tafun Nyiɛkpɔɔ na yo u pan mbo, “Sɛ yire ni yɛsimi nyua kre ndra na, mbe ni tro mu yiɛ tata.” Ŋga wra sɛ yire wa kre, o Tafun Nyiɛkpɔɔ na tia fuflɛ kpɔɔ ka na gbun mna nyua kre yɔɔlɛ mu dnɛ juari, la, o Tafun Nyiɛkpɔɔ nsraa wa fuflɛ kre nu. Ŋga fuflɛ kre na tro kre, a tra naa seeri, la o Tafun Nyiɛkpɔɔ nsraa wa tra seeree kre nu. 12 Ŋga tra seeree kre nyu na to kre, a kanhun naa nyi poŋgo, la, o Tafun Nyiɛkpɔɔ nsraa wa kanhun kre nu. Ŋga kanhun kre na nyi mu tro kre, bawa mana fiɛn ka na yili. 13 Ŋga Elijah na mana kre loo kre, a wra u dodoŋgi tɛɛ mna u ndra tɔ, mna sɛ yire nyua wee kre nyu na. A mana kre na yo u pan mbo, “Elijah yira ŋgi mu pini mna hin?” 14 A Elijah na yo mbo, “O Tafun Nyiɛkpɔɔ Jaŋgafun, ni yiɛ nyina mu sumiɛ na. La, mu nyu nunu ŋga mna pe na Israel leele ni kre, pe ki kla, mu mu sragbuɛnlɛɛ yire juari, mu mu keenyanyofɛɛnlɛ pre gbo peii brɔfiɛn yiɛshiin ni, mi nunu ni kro, a pra ni chaa mbe gbo na.” 15 A o Tafun Nyiɛkpɔɔ na yo u pan mbo, “Ndru mu sɛ tablɔ tra ŋga ki mbra Damascus na kre na. Na mu sɛ le chia kre na, mbe mu sɛ olive simi kna mbe wo Hazael ndra na mbe ki nyina na Syria ŋunu wi.c 16 Mbe mu ndruu sɛ olive simi kna mbe wo Nimshi biblɔ Jehu wre ndra na, mbe ki nyina na wre wi Israel ŋunu, mbe mu Shaphat ŋmba u yiri Abel Meholah na wre biblɔ ŋmba pe yeeri Elisha wre fa simi ni mbe u mu krɔ li mbe pe ni keenyanyofun. 17 Ndro ŋmba Hazael we yo we gbo mbe u fɛ mbe shɔ kpan, Jehu we u ta mbe gbo, a ŋmba we fɛ mbe shɔ Jehu kɛɛ kpan, Elisha we u ta mbe gbo. 18 Leele kagbenyi kɔɔnashin wa Israel na, a pe fraka ni pan, a pe n kosie kan sɛɛn Baal yiɛ, ndee mu nyu kan sɛɛn kre na mu ki shiun.”d
Elisha Yeeree
19 Elijah na yili wa mna sɛ Shaphat biblɔ Elisha wre nya na uu wa na fali na nui mblɛ pe mbra shiin shiin pre kɛmbɔshiin ni. Wre titi wraa fali na kɛmbɔshiin wolo pre ni. A Elijah na u dodoŋgi fimi wo kre laa mna wa Elisha na. 20 A Elisha na u nui mblɛ ni wraa fali pre ti wa mna fɛ mna sɛ yo Elijah pan mbo, “Ti mbe ni sɛ ni lɛ na ni lo kla mbe pan mbe o sɛ.” A Elijah na yo u pan mbo, “Sɛ pe kla, ni n mu tɔ kolo.” 21 A Elisha na sɛ u nui shiin mblɛ ni wraa fali pre yii, mna pe gbo. Mna kɛɛn nyjɛ pra taa taa pe yulɔɛ na, na fali yire pe kejenyi mna kanhun gbɛɛri mna pe sɔɔ, mna leele kɛ kaara yire a pra ka, a wra sɛ taa Elijah kro na yaa u na.