5 La, ŋga ki yiɛklu, ti mbe o sɛ o Tafun Nyiɛkpɔɔ wre wie tun.” 6 A Ahab na u keenyanyofɛɛnlɛ pre kro yeeri, praa lafɛɛ jijirɛ, mna pe wie mbo, “Ni sɛ wi na Ramoth leele ni ree mbaa sɛ hin?” A pra kna mbo, “Sɛ wi na pe ni, o Tafun wre we ti mu wi mbe yili.” 7 La, Jehoshaphat na ndru mna wie mbo, “Nyiɛkpɔɔ keenyanyofun wa n wa na, mbe o yire u na mbe o Tafun Nyiɛkpɔɔ wie ra?” 8 A Israel ŋunu Ahab na kna mbo, “U kro nunu, u mɛɛ Micaiah, a u pe Imlah biblɔ. La, u kee n tna ni pan, ŋgi na hin? Wraa ni kee chichie nya mbe yo. Nyjila kro nu kee sisaa u yuu ni pan.” A Jehoshaphat na kna mbo, “Maa yo ma.” 9 A Ahab na ndro tun na u sɛ Micaiah wru mbe pan nyaanyaa.

10 A ŋulo shiin pre na pe ŋulo dodonyi titnɔnyi le le, mu tni pe ŋujuɛn na shɔlɔ gbun ndoo ŋga kraa wa Samaria jlonwee nyu na kre lawee, a chlɛfɛɛnlɛ pre naa wa mu yire pe yiɛ, na kee nyaa na yuu pe pan. 11 Pe wa mɛɛ naa Zedekiah, a u lɛ na wi Kenaanah. Wra tɔɔnrɔ bnɔɛ yɛ pe, mna pan mu yo Ahab pan mbo, “Kee ŋga o Tafun Nyiɛkpɔɔ yo mu pan yi kre, ‘Yire yirɛ nyjɛ ni mu sɛ wi na Syria leele pre ni mbe pe ja.’” 12 Pan chɔɔ u keenyanyofɛɛnlɛ pre kro na yo na mbo, “Sɛ wi na Ramoth leele pre ni, mu pe ja, o Tafun Nyiɛkpɔɔ we ti mu wi mbe yili.”

13 A ndro ŋmba wra sɛ Micaiah yeeri wre na yo u pan mbo, “chlɛfɛɛnlɛ pre kro ketaan yuu Ŋunu Ahab pan, kena ŋga mu shie ŋga, ki fna mu ketaan yo na.” 14 La, Micaiah na kna mbo, “Ŋga o Tafun Nyiɛkpɔɔ wree wa ŋga, kee ŋga we ni ŋga kre mbe yo.”

15 Ŋga Micaiah na yili Ŋunu Ahab yiɛ na kre, a ŋunu na u wie mbo, “Micaiah ki fna mbe mi na ŋunu Jehoshaphat sɛ wi na Ramoth leele ni, ndee ki n fna o sɛ hin?” A Micaiah na kna mbo, “E sɛ wi, ee wi mbe yili, o Tafun Nyiɛkpɔɔ we ti e wi mbe yili.” 16 A Ahab na kna mu yo Micaiah pan mbo, “Na mu yire o Tafun Nyiɛkpɔɔ wre mɛɛ na na paara ni pan, ta kpra yuu, gbee mni ni n kre kee ŋga yo mu pan hin?” 17 A Micaiah na kna mbo, “Ni nya na Israel wifɛɛnlɛ pre nyina nyua ka na na mbaala mblɛ pe n lefɛɛnlɛ ni lɛ. A o Tafun Nyiɛkpɔɔ yo mbo, ‘Leele mblɛ n wa na yɛklo ni, ti pe ndru mbe sɛ katoo wejinyiŋge ni.’” 18 A Ahab na yo Jehoshaphat pan mbo, “Ni nsra yo mu pan na wra kee chiriri nya mbe yo ni paan? Fɔna kee sisaa.” 19 A Micaiah na ndru mu yo mbo, “Tolɛɛ loo kee ŋga o Tafun Nyiɛkpɔɔ yo, ni o Tafun Nyiɛkpɔɔ wre nya na uu wa mu tni u ŋujɔɔn na nyjeeri, a u nyjeeri bitumblɔ kro wa mu yire u jaara kamɛŋɛ na kalie.^a 20 A o Tafun Nyiɛkpɔɔ wre kna mu wie mbo, ‘Ŋmbi we Ahab fana mbe pe sɛ u gbo Ramoth na hin?’ Na nyjeeri bitumblɔ pre plɛ kee ŋga yo, mbe plɛ fɔŋgɔ yo. 21 Bawa ŋumu ka na yiri mna pan o Tafun Nyiɛkpɔɔ pan mbo, ‘Mbe sɛ u fana.’ 22 A o Tafun Nyiɛkpɔɔ na ŋumu wre wie mbo, ‘Kolo ŋgi na mu tro hin?’ A ŋumu wre na yo u pan mbo, ‘Mbe sɛ ti mbe Ahab chlɛfɛɛnlɛ pre kro kala fnɛ u pan.’ A o Tafun Nyiɛkpɔɔ na yo ŋumu wre pan mbo, ‘Sɛ u fana, mu u ta.’ 23 A kre kee kre ki pe yɛŋgɛ kre. O Tafun Nyiɛkpɔɔ wre tia mu chlɛfɛɛnlɛ pre kala fnɛ mu pan na mu wi mbe yili. La, wre Nyiɛkpɔɔ yo na pie mu kla.”

24 Bawa Kenaanah biblɔ Zedekiah na flo mna da Micaiah na, mna u yiɛ ja, mna kna mu u wie mbo, “Nyjila ŋgi nu o Tafun Nyiɛkpɔɔ wre Ŋumu yili ni nu, mu sɛ paara na mu ni hin?” 25 A Micaiah na kna mbo, “Ŋga ble mu fɛ mbe sɛ ndra nyuŋgo-too nu kre, kre mu kpra yo.” 26 A Ŋunu Ahab na yo u loplombo pre pan mbo, “E Micaiah yii e sɛ Amon ŋmba wi abani lopom, na ŋunu pɔ Joash pre ŋga. 27 E yo pe pan na pe u le nyuŋgo, mbra u kaan paanu na nyumu chiin mbe sɛ su na mbe sɛ mbe ndru mbe pan soo.” 28 A Micaiah na kna mbo, “Tolɛɛ, na maa ndru mu pan soo, kena o Tafun Nyiɛkpɔɔ wre ma u paara ni pan.” A wra ndru mna kna mbo, “Yire mblɛ ee wa mna kro, e kee ŋga ni yuu ŋga dɔɔ ta.”

29 A Israel ŋunu Ahab na Judah ŋunu Jehoshaphat na sɛ wi na Ramoth ŋga kraa wa Gilead tra nu kre leele ni. 30 A Ahab na yo Jehoshaphat pan mbo, “Ŋga o shie ŋga, mbe niyɛ chinɛ, mbe ndro wa ni chin, la, ŋu mu ŋunumu dodonyi le.” Ki tia Israel ŋunu wre na uyɛ chinɛ, mbe ndro wa chin na wre wi, a pra sɛ ŋunɔ kre nu.

31 Syria ŋunu wre na yo u sookɛɛ wifɛɛnlɛ loplombo fulo na kɛmbɔshiin pre pan mbo, “E ti mbe e yiɛ nyina Israel ŋunu wre chiin na.” 32 Kena ŋga pra ŋunu Jehoshaphat nya kre, pe kro naa jawa na Israel ŋunu wre wi, a pra kan mna taa u kro. La, ŋga wra gble le kre, 33 pra nya na Israel ŋunu wre ma, a pra laa u kro. 34 La, Syria ŋunɔwifun wa na u snini ŋu pɛpɛŋgɛ, a kra sɛ to Ŋunu Ahab gbugbuɛ nu, u ŋunɔ wiyira ŋga ni wra uyɛ tɔ kre tapan. A wra kna mbo, “Yira ka ni ta,” mna yo ŋmba u u sookaa kre ŋmaai wre pan mbo, “Yili na ni ni leele pre nu.” 35 Pra ŋunɔ kre wi ble poŋgo, na pee wa mu Ŋunu Ahab yii mu yire u sookaa kre nu, a u yiɛ kan Syria leele pre na. A nyimi na wo u pan mna sookaa kre lam tɔ kro, a wra ku ki yilakɔŋgɔ. 36 Ŋga yila naa koo kre, a pra ki kpali Israel wifɛɛnlɛ pre pan mbo, “E kro, e ndru e sɛ katoo.”

37 Ŋunu Ahab na ku, a pra sɛ na u gboo kre ni Samaria, na mna sɛ u le. 38 A pra sɛ u sookaa kre ni mna sɛ ki je Samaria tapla kre nu, mna tiɛrifɛɛnlɛ naa wru kre, a nyikaanla na u nyimi yire lala, imi na o Tafun Nyiɛkpɔɔ na ki yo na kie pe kre. 39 Kee nyjɛ Ŋunu Ahab na pe, na imi wra u ŋunu katoo san na hlo ŋgaala ni mu da, na kakpɔɛ nyjɛ wra sin sin yire kro, pra yi kee nyunɔ mu le hlɛ ŋga nu pra Israel ŋulo fakee nyunɔ kre. 40 Ŋga Ŋunu Ahab na ku kre, u biblɔ Ahaziah wra u krɔ li mna ŋunumu li.

41 Ŋga Israel Ŋunu Ahab na jɔɔn li kre, ki yɛlɛ jijirɛ kɔkro a Asa pɔ Jehoshaphat na jɔɔn li Judah na. 42 Nyjila ŋga nu Jehoshaphat na ŋunumu li kre, na we pe yɛlɛ fulo na kɛmbɔkunɔ, mna tni Jerusalem na mu ŋunumu li yɛlɛ fulo na kunɔ. U lo mɛɛ naa Azubah, Shilhi bichlɔ wre. 43 Pan wra nyi na u lɛ Asa wi. Wra kee ŋga ki fraka pe o Tafun Nyiɛkpɔɔ yiɛ. La, u nsra sɛɛnlɛ lawee nyjɛ pra sin sin nyambie na yire juari. A kra tia leele pre na kro na shie na sra woni, na tuwe ndiom tɛɛn sroi wa. 44 Ŋunu Jehoshaphat na Israel ŋunu na tni wejinyiŋge nu.

45 Kee nyjɛ Jehoshaphat na, u gbuntitirem ŋga wra ta, na ŋunɛ nyjɛ wra wi kro, pra yi kee nyunɔ mna le hlɛ ŋga nu pra Judah ŋulo fakee nyunɔ mna le kre nu. 46 A bilɛ na chiɛlɛ mblɛ praa tiɛri sɛɛnlɛ sragbuɛnlɛɛ yire lawee u lɛ Asa nyjila kre, wra pe ni wa.

47 Kre nyjila kre na ŋunu n wa Edom tra nu, Judah ŋunu wre wra ndro wɔ a wraa bawa le. 48 Ŋunu Jehoshaphat na epo krɔɛ badɛnyi yire yɛ pe, mbe yiraa shie Ophir na, mbra swanyiɛ tru mbra paan. La yira kla Ezion-Geber na, yi nsra ja mu sɛ. 49 A Israel Ŋunu Ahaziah na yo Ŋunu Jehoshaphat pan na u ti mbe u leele pre, na u wolo pre na krɔɛ tnumu tuni mbra shie mbra paan, a Jehoshaphat na ki je. 50 Jehoshaphat na ku, a pra u le lebiile lehaa David chia kre na, a u pɔ Jehoram na pan mna u krɔ li, mna ŋunumu li.

51 Ŋga Judah ŋunu Jehoshaphat na jɔɔn li kre, ki yɛlɛ kɛmbɔkɔɔnashin na Ahab biblɔ Ahaziah na jɔɔn li Israel na yɛlɛ shiin, mna tni Samaria na. 52 Wra sisam pe mna o Tafun Nyiɛkpɔɔ wre taan, mna taa sisam kee nyjɛ u lɛ Ahab na pe yire na. U lo Jezebel, na Ŋunu Jeroboam Nebat biblɔ wre na tia Israel leele pre na sisam pe. 53 Wra sɛ na Baal sɛɛn sumi, mna tia krɔ na Israel leele Nyiɛkpɔɔ wre kun, imi na u lɛ na yiɛklu mna pe kre chɔɔ.