4 Ŋga kra pan ma kre, Ahab yiɛ na je, a krɔ na u kun Naboth kee ŋga u yo u pan kre na. A wra sɛ to mu sni u dɛŋglɛ na, mna yiɛ kan mboo mbɛɛ na, mna je na wa yaka ka. 5 A u chɔ Jezebel na sɛ u wie mbo, “Mni a mu yiɛ je, a mu je na ma li ŋga hin?” 6 A Ahab na yo u pan mbo, “Kee ŋga Naboth yo ni pan kre ndra na yi. Ni yo u pan na mbe u kagbla kre lɔ, ndee na u chaa mbe ni u ŋga ka ki titɛɛ, a u je na wa ni ŋga ki yi.” 7 A Jezebel na yo mbo, “Ŋu ma ŋunu kree? Yiri dɛŋglɛ yire na, mu li mbe mu yiɛshɔ. Mbe Naboth kagbla kre shɔ mbe mu ŋga.”

8 A chlɔ wre na Ahab mɛɛ tɛɛ mna hlɛ nyunɔ, mna yira ŋga ni ŋunu yirɛ tnɔ yi kre tɛɛ mna yi nyu yii, mna tia pra sɛ na yi ni mna sɛ u loplombo, na lekpɔɛ mblɛ praa wa Naboth chia pre kro ŋga. 9 Kee ŋga pra nyunɔ hlɛ yire nu na yi kre, “E ble ka wɔ e tɛɛ blefun ble, e leele pre kro yeeri mbe pe fni, mbe e Naboth ŋga kpɔɔmu tnihaa leele pre nu. 10 E ti mbe kafinɛfɛɛnlɛ shiin tni mbe yiɛ kan u na, mbe kala baa Naboth wre na, na u Nyiɛkpɔɔ na Ŋunu sun. Na ki pan ma mbe e u wru mbe sɛ chia kre mbookrɔ, mbe sɛ u waari dnɛ ni mbe gbo.”

11 Loplombo pre, na chia kre lekpɔɛ pre na kee ŋga Jezebel na yo pe pe kre pe. 12 A pra ble ka wɔ mu tɛɛ mna blefun, mna leele yeeri a pra pan mna fni, a pra Naboth ŋga kpɔɔmu lawee. 13 A kafinɛfɛɛnlɛ pre na tni mu yiɛ kan u na leele pre nu mna kalafnɛ mu taa Naboth na na u Nyiɛkpɔɔ na ŋunu sun, a leele pre kro na u yii mna sɛ na u ni chia kre mbookrɔ, mna sɛ u waari dnɛ ni mu gbo. 14 A pra sɛ mandiɛ kre bɔ Jezebel pan mbo, “Pe Naboth waari dnɛ ni mu gbo.”

15 Ŋga Jezebel na mandiɛ kre loo kre, a wra yo Ahab pan mbo, “Naboth Jezreel ndro wre ku, sɛ u kagbla ŋga u je na wa ki prɛ mu pan kre wru mu ta.” 16 Titɛɛ kre nu a Ahab na yiri mbe sɛ kagbla kre wru mbe ta.

17 A o Tafun Nyiɛkpɔɔ na yo u keenyanyofun Elijah ŋmba wra yiri Tishbe na wre pan mbo, 18 “Sɛ Ŋunu Ahab Samaria wo wre pan. Na mu shie mu u nya Naboth kagbla wa, na u shie ki wru haa mbe ta. 19 Yo u pan na, ‘Mi mu Tafun Nyiɛkpɔɔ wre yo na, u blɔ wre gbo mu kɔ, na shie mbe sɛ u krɔ wru mbe yaa?’ Yo u pan na kee ŋga ni yo yi kre, ‘Lawee ŋga chɔɔ nu nyikaanla Naboth nyimi lala kre, bawa chɔɔ nyikaanla we mu nyimi lala na.’”

20 Ŋga Ahab na Elijah nya na u paan kre, a wra yo mbo, “Ni loŋgo mu ni nya ra?” A Elijah na kna mbo, “Ɛnhɛɛn ni mu nya.” A Elijah na yo u pan mbo, “Mu muyɛ kɔ mu tɛɛ, na kee fuɛn mu na pini o Tafun Nyiɛkpɔɔ yiɛ na. 21 Kena kee ŋga o Tafun Nyiɛkpɔɔ yuu mu pan yi kre mbo, ‘Mbe ti mbe kala kpɔɔ mu da. Mbe mu gbo, a mbe bibilɛ mblɛ pee wa mu katoo kro gbo, pe lebiile, na pe tinlɛ kro. 22 Pan mu katoo we pe na Nebat biblɔ Ŋunu Jeroboam katoo yi. Mbe pe na Ahijah biblɔ ŋunu Baasha sele wolo pre lɛ, ŋgi na hin? Mu tia Israel leele pre sisam pe, mu tia ni krɔ kun.’ 23 A mu wru Jezebel haa kre, o Tafun Nyiɛkpɔɔ yo na nyikaanla we u kaara ka kakpɔɔ Jezreel na. 24 A Ahab sele ndro ŋmba we ku chia lam kpan, nyikaanla pie u ka, a ŋmba we ku nyaa kpan kɔkɔsakie pie u kaara li.”

25 Ndro nsraa wa mna uyɛ kɔ mu tɛɛ na we sisam pe o Tafun Nyiɛkpɔɔ yiɛ mu da na Ahab ni, a yi krɛrɛ u chɔ Jezebel wra ya. 26 Ahab na nyifɛɛrɛ sisam pe mna sɛ sɛɛlɛ sumi, imi na Amora leele mblɛ o Tafun Nyiɛkpɔɔ na ni Israel leele pre yiɛ kre na pe kre.

27 Ŋga Elijah na paara mna kɔ kre, A Ahab na u dodonyi tini mna wla, mna yi wɔ mu wa. Mna sɛ kumu yoŋgo wru mna tɔ. Wra je kuraa u nsra sro li, mna sni na kumu yoŋgo kre ni ma, a u jawala na u tɔɔra, a wra yiɛ san. 28 O Tafun Nyiɛkpɔɔ na yo Tishbe ndro Elijah pan mbo, 29 “Mu nya imi Ahab uyɛ nyjii mu ni ŋga ŋgaa? Kre kee ŋga u pe ŋga ndra na, mba ti mbe kee sisaa u da u ŋmaa nyjila ŋga nu, u biile nyjila mbe ti mbe kala sisaa pe da.”